Hem Important for Olketa Christian Prea
1. Wanem nao savve helpem iumi for duim gud ministry?
1 Iumi no savve duim gud disfala preaching waka seleva, dastawe iumi needim Jehovah for helpem iumi. (Phil. 4:13) Hem iusim olketa angel for helpem iumi faendem pipol wea hambol. (Rev. 14:6, 7) Jehovah nao mekem olketa seed bilong truth wea iumi plantim and watarem for grow. (1 Cor. 3:6, 9) Hem barava important for olketa Christian for prea evritaem long Dadi bilong iumi long heven!
2. Wanem nao samfala samting for prea abaotem?
2 For Iumiseleva: Taem iumi go preach, hem gud for iumi prea evritaem. (Eph. 6:18) Wanem nao samfala samting for prea abaotem? Iumi savve prea for garem gudfala tingting abaotem ples wea iumi preach and for no fraet. (Acts 4:29) Iumi savve prea long Jehovah for helpem iumi faendem pipol wea hambol for iumi studyim Bible witim olketa. Sapos haosholder askem kwestin, iumi savve talem shortfala prea, mekem Jehovah helpem iumi for ansa long gudfala wei. (Neh. 2:4) Iumi savve askem wisdom tu, for mekem iumi gohed tingim ministry olsem main samting. (Jas. 1:5) And tu, Jehovah hem hapi taem iumi prea and talem long hem iumi hapi long privilege wea iumi garem for kamap pipol bilong hem.—Col. 3:15.
3. Hao nao wei for prea for olketa narawan helpem preaching waka gohed?
3 For Olketa Narawan: Iumi shud ‘prea tu for each other,’ and talem long prea nem bilong olketa nara Christian sapos hem fitim. (Jas. 5:16; Acts 12:5) Waswe, iu no duim tumas preaching waka from iu sik? Sapos olsem, prea for olketa nara Christian wea no sik. No ting smol long gud samting wea olketa prea bilong iu savve duim for helpem olketa narawan! Hem fitim tu for prea for olketa long gavman for letem preachim waka gohed, mekem olketa brata and sista bilong iumi ‘stap gud.’—1 Tim. 2:1, 2.
4. Why nao iumi shud gohed for prea?
4 For talemaot gud nius evriwea long earth hem bigfala waka. Sapos iumi “gohed for prea,” Jehovah bae helpem iumi for duim gud disfala waka.—Rom. 12:12.