Announcement

◼ Buk for iusim long February: Secret for Kasem Hapi Famili or eni old magasin or brochure wea man interest long hem. March: Wanem Nao Really Samting wea Bible Teachim? Trae for startim study long firstaem iu meetim man. Sapos haosholder garem finis datfala buk and no acceptim Bible study, pablisa savve givim eni old magasin or brochure wea man interest long hem. April and May: Wastaoa and Awake! magasin. Taem iu meetim samwan wea interest iusim tract Waswe, Iu Laek for Savve Long Tru Samting? for startim Bible study. Offerim buk Wanem Nao Really Samting wea Bible Teachim? taem iu duim return visit long pipol wea interest and wea kam long Memorial or olketa nara hipap, bat wea no hipap evritaem witim iumi long olketa meeting. Trae for startim Bible study long disfala buk.

◼ Spesol tok bae kamap long weekend bilong Memorial and title hem, “Waswe, Iu Luksavve End Hem Klosap?”

◼ Taem iu plan for go long nara kantri wea mifala no raetem long last service year report or wea no stap long last page long niufala Yearbook, plis story long branch office for savve wanem for duim and no duim long datfala kantri. Maet gavman tambuim preaching waka long datfala kantri. (Matt. 10:16) Long samfala kantri, maet hem no fitim man wea visit for ringim olketa brata and sista or kongregeson. Branch maet talem tu sapos hem fitim for iu duim enitaem witnessing, and sapos hem fitim for karem samfala buk bilong iumi or nomoa. Iu bae no kasem staka problem and spoelem preaching waka long kantri wea iu visitim, taem iu followim wanem branch talem.—1 Cor. 14:33, 40.

◼ Start long February, olketa circuit overseer bae givim pablik tok wea garem title “Waswe, Iu Trust Long Jehovah?”

◼ Start long week bilong April 9, 2012, iumi bae studyim buk “Gohed Kasem Gud Samting From Love Bilong God” long Kongregeson Bible Study. Evri kongregeson shud mek sure olketa garem inaf buk.