Leta From Governing Body
Dear Olketa Witness Bilong Jehovah:
Mifala hapi tumas for raet kam long iufala olketa faithful wakaman bilong Jehovah, wea distaem iufala winim seven million brata and sista. Taem iu meetim wanfala brata or sista wea kam from nara kantri, hem olsem iu savve gud long hem finis olsem hem fren bilong iu. (John 13:34, 35) Dastawe, taem iu read abaotem olketa faithful waka wea olketa brata and sista duim long olketa difren kantri long Yearbook, iu bae barava tingim olketa.
Olketa report wea mifala kasem from evriwea long world, showimaot iufala no miss for duim Famili Worship evri week. Iufala olketa famili wea garem olketa smol pikinini iusim staka interesting wei for duim Famili Worship wea helpem olketa smol pikinini bilong iufala for interest long datwan. (Eph. 6:4) Taem olketa hasband and waef duim Famili Worship tugeta, datwan strongim marit bilong olketa. (Eph. 5:28-33) Tru tumas, evriwan nao kasem gud samting from disfala arrangement for barava studyim gud Bible.—Josh. 1:8, 9.
Mifala barava tingim iufala evriwan wea lusim staka samting from olketa natural disaster wea happen no long taem go nomoa. Mifala laek for talem thankiu long staka brata and sista wea no hol bak for sapotim relief waka long olketa hard taem olsem. (Acts 11:28-30; Gal. 6:9, 10) Mifala laek talem thankiu tu long iufala olketa brata and sista wea luksavve long need bilong olketa narawan insaed long kongregeson and duim samting for helpem olketa. Iufala “helpem pipol and duim gud samting for pipol wea poor,” olsem Dorcas wea Bible storyim. (Acts 9:36) Jehovah hem luksavve long olketa samting wea iufala duim and hem bae blessim iufala.—Matt. 6:3, 4.
Long samfala kantri, pipol trae for stopem waka bilong iufala long wei wea olketa ‘iusim law for mek trabol,’ long iufala. (Ps. 94:20-22) Iufala savve Jesus storyim finis pipol bae spoelem iufala. Datwan helpem iufala for no givap and iufala depend long Jehovah for strongim iufala. (John 15:19, 20) Mifala prea evritaem for iufala, taem iufala no givap and gohed “ansarem eniwan wea askem kwestin abaotem hope bilong iufala.”—1 Pet. 3:13-15.
Mifala praisem iufala brata and sista wea gohed for stap faithful nomata Satan gohed iusim enikaen wei for switim man for durong. Long disfala taem wea wei bilong pipol hem barava nogud tumas, iufala “kasem strong from Lord and from bigfala strong bilong hem.” (Eph. 6:10) Iufala “werem evri samting for faet wea God givim” and from datwan iufala strong for againstim “olketa kleva trik bilong Devil.” (Eph. 6:11, 12) Jehovah hem iusim example bilong iufala for givim ansa long Satan wea tok spoelem hem!—Prov. 27:11.
Taem mifala kasem report for 2011 service year, mifala hapi for lukim 19,374,737 nao hipap long Memorial. Wanfala samting wea mekem staka pipol for hipap long Memorial, hem from iufala willing for duim auxiliary pioneer long April last year. Staka million pipol wea stap long earth, herem datfala message abaotem Jehovah wea olketa faithful Witness bilong hem talemaot! (Rom. 10:18) Mifala barava hapi long iufala evriwan from iufala willing and strong for duim datfala waka, nomata iu wanfala long 2,657,377 pablisa wea duim auxiliary pioneer long datfala month or iu wanfala wea traem best for duim moa samting long ministry bilong iu.—Ps. 110:3; Col. 3:23.
Last year, 263,131 niu brata and sista nao baptaes. Mifala thankiu long Jehovah for diswan, and mifala thankiu long iufala evriwan tu for sapotim mifala for talemaot disfala invitation long samfala moa, wea sei: “‘Kam!’ And eniwan wea herem diswan mas sei: ‘Kam!’ Eniwan wea laek drink mas kam and eniwan wea laekem datfala wata wea savve mekem man laef hem mas kam and tekem free.” (Rev. 22:17) Iumi lanem staka samting long 2011 distrik convention abaotem Kingdom bilong God wea rul finis. Bihaen datwan, iumi strong for talem disfala toktok winim enitaem bifor, ‘Kingdom bilong God bae kam!’ Jesus hem sei: “Mi klosap kam nao.” Datfala toktok bilong Jesus hem encouragem iumi for talem witim full heart sem toktok wea aposol John talem long Jesus, wea sei: “Amen! Kam Lord Jesus.”—Rev. 22:20.
Taem iu gohed for lukaot for datfala nambawan samting wea bae happen, iufala mas savve, mifala barava lovem iufala evri brata and sista wea showimaot iufala lovem Jehovah “long samting wea iufala duim”!—1 John 3:18.
Olketa brata bilong iufala,
Governing Body Bilong Olketa Jehovah’s Witness
[Chart long page 3-4 and 7-8]
2011 SERVICE YEAR REPORT BILONG OLKETA JEHOVAH’S WITNESS EVRIWEA LONG WORLD