No Fraet for Preach Long Bisnis Territory
1. Sapos iumi fraet for duim bisnis territory, example bilong hu nao savve encouragem iumi?
1 Samfala pablisa fraet for duim bisnis territory. Sapos iu fraet for duim bisnis territory tingim aposol Paul. Paul hem man wea no fraet for preach, nomata olsem, hem mas depend long God for “strongim” hem bikos samfala taem hem barava no isi for hem duim preaching. (1 Thess. 2:2) Iumi bae storyim samfala samting wea maet mekem iumi fraet, and wanem iumi savve duim for deal witim datwan.
2. Why nao iumi shud no hol bak for story long olketa wakaman?
2 Waswe, Olketa Wakaman Bae Kros? Long staka bisnis olketa wakaman mas story witim eniwan wea kam lukim olketa. From olketa laekem iu for gohed baem samting from stoa bilong olketa long future, olketa bae tok kaen long iu. Taem iu story kaen long olketa and respectim olketa, olketa tu bae respectim iu.
3. Wanem nao iumi savve duim for no mekem olketa kastoma kros?
3 Waswe, Mi Mas Story Front Long Staka Kastoma? Maet hem gud for go story witim olketa wakaman long taem wea olketa no busy tumas. Story witim boss taem hem stap seleva and no story longtaem.
4. Wanem nao maet iumi savve talem taem iumi duim bisnis territory?
4 Wanem Nao Bae Mi Talem? Story witim boss sapos tu-thri wakaman stap. Maet iu savve sei: “Hem no isi for faendem bisnis pipol long haos bilong olketa, so mifala kam visitim iufala long ples wea iufala waka. Bae mi story lelebet nomoa witim iu bikos iu busy.” No storyim donation arrangement sapos olketa no askem hu nao sapotim waka bilong iumi saed long selen, nogud olketa tingse iumi olketa man for salem samting. Sapos hem fitim, askem boss sapos hem olraet for story lelebet witim olketa wakaman. Then iusim sem wei for startim story wea iu duim for story witim boss. Sapos wanfala wakaman hem busy, story lelebet nomoa and givim hem wanfala tract. Sapos hem no fitim for iu story witim olketa wakaman, maet olketa savve letem iu for leavim samfala samting for readim long reception or long nara ples wea fitim.
5. Why nao iumi mas no fraet for preach long olketa bisnis territory?
5 Jesus and Paul no fraet for preach long waka ples bilong pipol. So iu tu savve duim olsem. (Matt. 4:18-21, 9:9; Acts 17:17) Prea long Jehovah for helpem iu for no fraet. (Acts 4:29) Staka taem iumi faendem pipol long waka ples, so hao sapos iu traem disfala wei for preach?