Protectim Konsens Bilong Iu
1. Wanem nao theme bilong spesol assembly day for 2013, and why nao olketa redyim datfala program?
1 Evriday iumi feisim olketa samting wea savve mekem iumi for duim samting wea savve spoelem konsens bilong iumi. Dastawe spesol assembly day for 2013 service year wea bae start long September 1, 2012, hem garem theme “Protectim Konsens Bilong Iu.” (1 Tim. 1:19) Olketa redyim datfala program for helpem iumi for tingting strong long hao iumi iusim konsens wea hem nambawan present wea God givim long iumi.
2. Olketa wanem important kwestin nao bae iumi herem ansa bilong olketa long datfala assembly?
2 Lisin for Olketa Point Hia: Datfala program bae ansarem sevenfala important kwestin abaotem konsens:
• Olketa wanem samting nao savve spoelem konsens bilong iumi?
• Wanem nao iumi savve duim for garem gudfala konsens?
• Wanem nao iumi savve duim mekem iumi no kasem blame, sapos eniwan hem no sev?
• Wanem nao tingting bilong iumi and wanem iumi duim wea followim olketa Bible principle showimaot abaotem iumi?
• Wanem nao iumi savve duim for no spoelem konsens bilong olketa narawan saed long samting wea iumi wanwan savve disaedem?
• Olketa young wan, wanem nao iufala savve duim for no givap taem iufala kasem test?
• Taem holy spirit leadim konsens bilong iumi, olketa wanem blessing nao bae iumi kasem?
3. Wanem nao iumi savve duim for kasem gud samting from datfala program?
3 Jehovah savve helpem iumi for againstim eni samting wea Satan iusim for spoelem konsens bilong iumi. Dadi long heven wea lovem iumi hem iusim Bible and organization bilong hem for talem iumi: “Diswan nao road for iufala wakabaot followim.” (Isa. 30:21) Datfala assembly hem wanfala wei wea Jehovah duim datwan. So hem gud for plan distaem for attendim full program. Long taem bilong program, lisin gud and ting raonem hao iuseleva savve duim samting for followim wanem iu herem. Famili savve storyim tugeta wanem olketa herem long program. Taem iumi followim wanem iumi herem long program, datwan bae strongim iumi for gohed “garem gudfala konsens” and hem helpem iumi for no letem world bilong Satan for switim iumi for duim eni samting wea bae spoelem wei wea iumi fren witim Jehovah.—1 Pet. 3:16.