Followim Example Bilong Profet Nahum
1. Wanem nao iumi lanem from buk bilong Nahum?
1 No staka samting stap long ples wea Nineveh stap bifor, olsem Nahum hem profesi abaotem. Datwan helpem iumi for luksavve Jehovah hem finisim olketa enemy bilong Hem and no eni enemy bilong Hem savve winim Hem. (Nah. 1:2, 6) Taem iumi ting raonem profesi bilong Nahum, iumi savve lanem olketa samting wea helpem iumi long ministry tu.
2. Taem iumi preach, wanem nao hem gud for iumi storyim?
2 Strongim and Givim Hope Long Pipol: Taem iu readim buk bilong Nahum, maet iu tingse hem storyim nomoa judgment message againstim Nineveh, datfala kapitol taon bilong Assyria bifor. (Nah. 1:1; 3:7) Bat datfala message mekem pipol bilong Jehovah hapi. Nahum, wea nem bilong hem minim “man for strongim narawan,” talem olketa nara Jew klosap nao enemy bilong olketa bae finis. Nahum sei tu, Jehovah hem “wanfala sef ples for haed long taem bilong trabol.” (Nah. 1:7) Taem iumi preach, iumi tu talemaot gud nius and encouragem olketa narawan for trustim Jehovah.—Nah. 1:15.
3. Wanem nao Nahum duim taem hem preach, wea iumi savve followim?
3 Iusim Olketa Example: Nahum comparem wei wea Jehovah finisim Nineveh witim wei wea olketa long Assyria finisim Thebes (No-amon), wanfala taon long Egypt. (Nah. 3:8-10) Taem iumi preach long pipol abaotem wei wea disfala nogud world bae finis, iumi savve storyim olketa Bible profesi wea pruvim Jehovah bae duim evri samting wea hem sei hem bae duim. Olsem example, taem olketa bilong Babylon and Media faet againstim olketa long Nineveh long 632 B.C.E., bigfala rain hem mekem Tigris River for flood, and datfala flood aotem wanfala part bilong strongfala wall bilong Nineveh. Kwiktaem nomoa, olketa tekovarem Nineveh olsem Jehovah talem.—Nah. 1:8; 2:6.
4. Wanem nao iumi savve duim for helpem pipol minim message wea iumi preachim?
4 Story Long Kliafala Wei for Mekem Pipol Minim: Wei wea Nahum raetem buk bilong hem, hem klia and hem isi for man minim wanem hem bae happen. (Nah. 1:14; 3:1) Iumi tu laek for talem toktok wea pipol isi for minim taem iumi preach. (1 Cor. 14:9) Long firstaem iumi meetim man, talem klia why iumi kam long haos bilong hem. Taem iumi studyim Bible witim pipol, iumi helpem olketa for garem faith long Jehovah and long Bible, and iumi helpem olketa for luksavve olketa bae kasem gud samting from wanem olketa lanem.—Rome 10:14.
5. Long wanem wei nao profesi bilong Nahum encouragem iumi?
5 Long buk wea Nahum raetem, iumi luksavve Nahum barava trustim wei wea Jehovah bae duim wanem hem talem. Distaem world bilong Satan hem klosap for finis and iumi hapi for savve “no enitaem moa bae trabol kamap,” olsem Jehovah promisim.—Nah. 1:9.