Conductim Bible Study wea Gohed Gud
1. Wanem responsibility nao olketa pablisa wea conductim Bible study garem?
1 Hard for eni man worshipim God sapos Jehovah no “leadim hem kam” long hem. (John 6:44) Nomata olsem, olketa pablisa wea conductim Bible study mas traem best bilong olketa for helpem pipol fren gud witim Dadi bilong olketa long heven. (Jas. 4:8) Diswan minim iumi mas prepare firstaem. Sapos iumi readim nomoa olketa paragraf and askem olketa kwestin long olketa paragraf hia, datwan bae no helpem Bible study for minim message wea iumi storyim and bae hem no gohed gud long spiritual wei.
2. Gudfala wei for conductim Bible study bae helpem student for duim wanem?
2 Iumi savve conductim olketa Bible study wea gohed gud sapos iumi helpem olketa for (1) minim wanem Bible teachim, (2) bilivim wanem Bible teachim, and (3) followim wanem Bible teachim. (John 3:16; 17:3; Jas. 2:26) Hem savve tekem samfala month for helpem wanfala Bible study for duim thrifala samting hia. Nomata olsem, evri samting hia savve helpem hem for start fren witim Jehovah and gogo hem dedicate long hem.
3. For teach long gudfala wei, wanem kaen kwestin nao iumi savve askem?
3 Wanem Nao Tingting Bilong Bible Study?: Taem iumi no story tumas and letem Bible study for talem tingting bilong hem, datwan bae helpem iumi for luksavve sapos hem minim wanem iumi storyim and hem bilivim wanem hem lanem. (Jas. 1:19) Waswe, hem minim wanem Bible hem talem abaotem subject wea iutufala storyim? Waswe, hem savve explainim datfala subject long toktok bilong hemseleva? Wanem nao tingting bilong hem abaotem olketa samting wea hem lanem? Waswe, hem bilivim wanem Bible teachim hem stret? (1 Thess. 2:13) Waswe, hem luksavve hem shud changem samfala samting long laef bilong hem for fitim wanem hem lanem? (Col. 3:10) Iumi bae savve long olketa samting hia sapos iumi askem olketa gudfala kwestin, then iumi lisin taem hem story.—Matt. 16:13-16.
4. Wanem nao iumi shud duim sapos hem no isi for Bible study minim wanem hem lanem long Bible or hem no followim datwan?
4 Hem no isi for man kwiktaem lusim wei bilong hem bifor and changem strongfala tingting wea hem garem firstaem. (2 Cor. 10:5) Waswe sapos Bible study bilong iumi no bilivim or no followim wanem hem lanem? Iumi mas patient and givim taem for Bible and holy spirit for changem heart bilong hem. (1 Cor. 3:6, 7; Heb. 4:12) Sapos hem no isi for Bible study minim wanfala Bible teaching or hem no followim datwan, plande taem hem gud for go long nara subject firstaem. Taem iumi gohed patient and showimaot love taem iumi teachim hem, maet datwan helpem hem for changem samfala samting wea hem mas changem.