Lukluk Gud Long ‘Wei Bilong Iu for Teach Gud’
“Preach, . . . stretem, kaonselem, encouragem, and garem long-safaring and wei for teach gud.”—2 TIM. 4:2.
1. Jesus givim wanem kaen waka long olketa disaepol bilong hem, and wanem example nao hem showimaot?
NOMATA Jesus duim olketa nambawan samting taem hem stap long earth, pipol ting long hem olsem wanfala teacher and no wanfala man for duim olketa mirakol. (Mark 12:19; 13:1) Barava nambawan waka Jesus duim nao hem for story abaotem Kingdom bilong God. Olketa wea followim Jesus duim olsem tu distaem. Olketa Christian kasem wanfala waka for gohed for mekem pipol kamap disaepol taem olketa teachim olketa for obeyim evri samting wea Jesus talem.—Matt. 28:19, 20.
2. For duim waka bilong iumi for preach long gudfala wei, wanem nao iumi need for duim?
2 For duim disfala waka for helpem nara pipol kamap disaepol, iumi laek for kamap moabeta evritaem saed long wei for teach. Aposol Paul mekhae long wei wea hem important for savve hao for teach taem hem raet long Timothy. Hem sei olsem: “Lukluk gud evritaem long iuseleva and wei bilong iu for teach. Followim olketa samting hia, bikos wei for duim olsem bae sevem iu and olketa wea lisin long iu.” (1 Tim. 4:16) Disfala wei for teach wea Paul storyim hem no minim for givim savve long man nomoa. Christian wea teach long gudfala wei bae hem kasem heart bilong pipol, and muvim olketa for changem samting long laef bilong olketa. Diswan nao hem wei for teach gud. So for win long disfala “wei for teach gud” taem iumi preachim gud nius abaotem Kingdom bilong God, wanem nao iumi mas duim?—2 Tim. 4:2.
Win Long ‘Wei Bilong Iumi for Teach Gud’
3, 4. (a) For win long “wei for teach gud,” wanem nao iumi need for duim? (b) Long wanem wei nao Theocratic Ministry Skul helpem iumi for teach gud?
3 For savve hao for “teach gud” hem minim man lukluk gud long samting, duim evritaem, and lukluk gud for lanem samting. For iumi savve teach gud, iumi need for lukluk gud long thrifala samting hia. For kasem stretfala savve long samting iumi lanem, iumi mas prea long Jehovah for helpem iumi taem iumi studyim datwan. (Readim Psalm 119:27, 34.) Wei for lukluk long olketa nara brata and sista taem olketa teachim narawan savve helpem iumi for lanem hao olketa teach and followim example bilong olketa. And tu, wei for traem best for evritaem followim samting iumi lanem bae mekem savve bilong iumi kamap moa big.—Luke 6:40; 1 Tim. 4:13-15.
4 Jehovah hem Nambawan Teacher bilong iumi. Thru long organization bilong hem long earth, hem trainim olketa servant bilong hem for duim waka bilong olketa for preach. (Isa. 30:20, 21) For fitim diswan, evri kongregeson garem Theocratic Ministry Skul, wea savve helpem evriwan wea join insaed for savve hao for preach abaotem Kingdom bilong God. Bible nao main buk wea olketa iusim insaed datfala skul. Bible wea kam from Jehovah nao showim iumi wanem for teachim. And tu, hem showimaot wanem kaen wei for teach nao gud and fitim. Theocratic Ministry Skul hem evritaem showimaot hao iumi bae savve gud go moa for teach sapos iumi iusim Bible for teach, askem gudfala kwestin, mekem hem isi for minim, and garem wei for barava kea long nara pipol. Distaem bae iumi lukluk long olketa point hia. Then bae iumi storyim hao for kasem heart bilong Bible study.
Iusim Bible for Teach
5. Iumi mas iusim wanem for teach, and why nao olsem?
5 Jesus, wea hem best teacher long earth, hem iusim olketa scripture for teach. (Matt. 21:13; John 6:45; 8:17) Hem no talem samting from tingting bilong hemseleva bat hem talem tingting bilong God wea sendem hem kam long earth. (John 7:16-18) Iumi followim example bilong hem. Dastawe samting wea iumi talem long preaching waka or long olketa Bible study bilong iumi mas kam from Word bilong God. (2 Tim. 3:16, 17) Nomata iumi iusim barava kleva wei for story, iumi no savve winim toktok insaed Bible wea barava explainim gud samting. Bible hem garem paoa. Best wei for helpem Bible study bilong iumi for minim wanfala samting hem for askem hem for readim wanem Bible talem abaotem datwan.—Readim Hebrews 4:12.
6. Wanem nao iumi savve duim for mek sure Bible study bilong iumi minim gud samting wea iumi studyim?
6 Waswe, diswan minim iumi no need for prepare bifor iumi duim wanfala Bible study? Nomoa. Iumi shud barava tingting gud firstaem for disaedem wanem scripture nao Bible study bae readim long taem bilong datfala study. Hem gud for readim olketa scripture wea sapotim wanem iumi bilivim. Hem gud tu for helpem datfala Bible study for minim each scripture wea hem readim.—1 Cor. 14:8, 9.
Askem Olketa Gudfala Kwestin
7. Why nao wei for askem olketa kwestin hem gudfala wei for teach?
7 Taem iumi askem olketa gudfala kwestin, diswan mekem Bible study for tingting, and tu, diswan savve kasem heart bilong hem. So iu no minim olketa scripture long hem bat hem nao for minim kam long iu. For helpem hem barava minim wanem iufala studyim, maet hem gud for askem olketa nara kwestin tu. Taem iu lanem hem long diskaen wei, iu helpem hem for kasem ansa, and tu, for bilivim datwan.—Matt. 17:24-26; Luke 10:36, 37.
8. Hao nao iumi savve luksavve long trufala tingting bilong Bible study bilong iumi?
8 Olketa buk bilong iumi iusim olketa kwestin and ansa for teach. Luk olsem staka pipol wea iumi studyim Bible witim olketa kwiktaem for faendem ansa long olketa paragraf. Nomata olsem, teacher wea laek for kasem heart bilong Bible study bae no interest for herem ansa nomoa. Olsem example, maet study bilong iu storyim stretfala samting abaotem wanem Bible talem saed long dirty fasin. (1 Cor. 6:18) Bat sapos iu askem olketa kwestin for hem ting raonem, maet iu savve faendemaot trufala tingting bilong hem long samting wea hem lanem. Maet iu savve ask olsem: “Why nao Bible tambuim dirty fasin? Wanem nao tingting bilong iu abaotem why God tambuim diswan? Waswe, iu ting eni gud samting savve kamaot from wei for obeyim wanem God markem saed long fasin?” Ansa bilong Bible study bilong iu long olketa kwestin hia bae showimaot wanem nao trufala tingting bilong hem.—Readim Matthew 16:13-17.
Isi for Minim
9. Taem iumi storyim Bible, wanem samting nao iumi mas tingim?
9 Staka truth insaed Word bilong God hem isi nomoa for minim. Bat maet olketa teaching bilong giaman religion hem mekem pipol wea iumi study witim for konfius. Goal bilong iumi olsem teacher hem for mekem Bible isi for pipol minim. Gudfala teacher hem story abaotem truth long stretfala wei, long wei wea klia, and isi for minim. Sapos iumi duim olsem, bae iumi mekem truth isi for minim. No storyim evri sismol samting. Iumi no need for storyim evri part bilong scripture wea iumi readim. Storyim nomoa important samting wea bae mekem datfala point kamap moa klia. Gogo datfala Bible study bae luksavve long olketa deep truth insaed Bible taem savve bilong hem kamap big moa.—Heb. 5:13, 14.
10. Wanem nao bae helpem iumi for luksavve haomas paragraf for storyim long wanfala study?
10 Haomas paragraf nao bae iumi storyim long wanfala study? Iumi needim fasin for luksavve. Savve and living bilong Bible study and teacher hem difren, bat iumi shud no forgetim hao goal bilong iumi hem for helpem study for garem strongfala faith. So diswan minim iumi bae givim hem inaf taem for minim and acceptim truth wea stap insaed long Bible. Bae iumi no study kwiktaem tumas winim wanem hem fit for minim. Bat long semtaem, iumi bae no study slow tumas. Taem Bible study hem minim wanfala samting, iumi shud storyim nextfala samting.—Col. 2:6, 7.
11. Iumi savve lanem wanem samting from wei bilong aposol Paul for teach?
11 Taem aposol Paul story abaotem gud nius long olketa niu wan, hem duim long wei wea isi for olketa minim. Nomata hem man wea barava skul gud, hem no staelem tumas toktok bilong hem. (Readim 1 Corinthians 2:1, 2.) Pipol wea garem gudfala heart interest and satisfae long truth insaed Bible bikos hem isi for minim. Man no need for skul gud for minim Bible.—Matt. 11:25; Acts 4:13; 1 Cor. 1:26, 27.
Helpem Olketa Bible Study Tinghae Long Samting Olketa Lanem
12, 13. Wanem samting nao bae muvim Bible study for followim wanem hem lanem? Givim example.
12 For teach gud, wei bilong iumi for teach mas kasem heart bilong Bible study bilong iumi. Hem mas luksavve hao samting hem lanem long Bible hem fitim hem, hao datwan helpem hem, and hao laef bilong hem bae kamap moabeta sapos hem followim datwan.—Isa. 48:17, 18.
13 Olsem example, maet iumi readim Hebrews 10:24, 25, wea encouragem olketa Christian for kasem strong from Bible taem olketa hipap witim olketa spiritual brata and sista. Sapos datfala Bible study no kam long olketa meeting long kongregeson yet, iumi savve story lelebet long hao iumi duim olketa meeting bilong iumi and samting iumi storyim long olketa meeting. Iumi savve talem hao olketa meeting bilong kongregeson hem wei for worship tu, and iumi wanwan kasem gudfala samting from olketa meeting hia. Bihaen iumi story olsem, iumi savve invaetem hem for kam long olketa meeting. Feeling for laek obeyim Jehovah nao shud muvim hem for obeyim wanem Bible talem, no bikos hem laek mekem man wea study witim hem for hapi.—Gal. 6:4, 5.
14, 15. (a) Bible study savve lanem wanem samting abaotem Jehovah? (b) Hao nao Bible study savve kasem gudfala samting from wei for savve long fasin bilong God?
14 Gogo, Bible study wea followim wanem hem lanem bae fren gud witim Jehovah. (Isa. 42:8) Jehovah hem wanfala loving Dadi and Creator and hem Owner bilong universe. And tu, hem showimaot fasin bilong hem and samting hem savve duim long olketa wea lovem and servem hem. (Readim Exodus 34:6, 7.) For showimaot hu nao hem, Jehovah talem disfala toktok taem Moses redi for leadim olketa Israelite go aot from Egypt: “Mi bae kamap wanem mi bae kamap.” (Ex. 3:13-15) Diswan showimaot Jehovah bae fit for change for duim eni samting for mekem kamap tru olketa plan bilong hem for pipol wea hem chusim. From diswan, olketa Israelite savve long Jehovah olsem God wea sevem olketa, faet for olketa, provaedem wanem olketa needim, fulfillim olketa promis wea hem talem and samfala samting moa.—Ex. 15:2, 3; 16:2-5; Josh. 23:14.
15 Maet olketa Bible study no lukim bigfala mirakol from Jehovah olsem Moses hem lukim. Bat, taem olketa garem strongfala faith and olketa tinghae long wanem olketa lanem and start for followim datwan, gogo bae olketa luksavve olketa need for depend long Jehovah for strongim olketa, givim wisdom long olketa, and leadim olketa. Taem olketa duim olsem, bae olketa savve long Jehovah olsem God wea wise, savve givim gudfala kaonsel, and hem kaen tumas for givim evri samting wea olketa needim.—Ps. 55:22; 63:7; Prov. 3:5, 6.
Showimaot Iu Kea
16. For kamap gudfala teacher, wanem nao winim savve for teach wea iumi born witim?
16 Maet long tingting bilong iu, iu no savve teach gud. Bat no feel wikdaon. Jehovah and Jesus nao lukaftarem disfala waka for teachim pipol wea gohed long full world distaem. (Acts 1:7, 8; Rev. 14:6) Tufala savve blessim waka wea iumi duim mekem toktok wea iumi talem bae helpem man wea garem gudfala heart. (John 6:44) Love wea iumi garem for Bible study bilong iumi hem moa important winim hao iumi iusim savve for teach wea iumi born witim. Aposol Paul tinghae long wei wea hem important for lovem olketa wea hem teachim.—Readim 1 Thessalonians 2:7, 8.
17. Long wanem wei nao iumi savve showimaot iumi barava kea long each Bible study?
17 Long sem wei, iumi savve showimaot iumi kea long each Bible study long wei for savve gud long hem. Taem iumi story abaotem olketa Bible principle witim hem, gogo bae iumi savve gud long living bilong hem. Maet iumi lukim hao hem gohed for followim wanem hem lanem from Bible. Bat long samfala samting, maet hem need for change yet. So taem iumi helpem hem for followim samting hem lanem long olketa study, iumi helpem hem for kamap trufala disaepol bilong Christ.
18. Why nao hem important for prea witim Bible study bilong iumi and storyim hem taem iumi prea?
18 Barava important samting nao, iumi savve prea witim Bible study bilong iumi, and storyim hem taem iumi prea. Hem shud barava luksavve goal bilong iumi nao hem for helpem hem savve gud long Creator bilong hem, barava fren gud witim Hem, and kasem gud samting from help bilong Hem. (Readim Psalm 25:4, 5.) Taem iumi prea for Jehovah blessim hard waka bilong Bible study for followim samting wea hem lanem, datwan savve helpem hem for luksavve why hem important for kamap ‘man wea followim samting hem herem.’ (Jas. 1:22) And taem datfala study lisin long olketa prea bilong iumi, hem tu bae lane hao for prea. Taem iumi helpem olketa Bible study for fren seleva witim Jehovah, iumi bae barava hapi!
19. Wanem nao bae iumi storyim long nextfala article?
19 Taem iumi savve hao winim six and haf million Witness evriwea long world trae hard for kamap moabeta long wei for “teach gud,” and goal bilong olketa hem for helpem pipol wea garem gudfala heart for obeyim evri samting wea Jesus talem, datwan hem barava encouragem iumi. Waswe, eni gud samting kamaot from preaching waka wea iumi duim? Nextfala article bae ansarem datfala kwestin.
Waswe, Iu Remember?
• Why nao olketa Christian need for lukluk gud long ‘wei bilong olketa for teach gud’?
• For mekem wei bilong iumi for teach kamap moabeta, wanem nao iumi savve duim?
• Wanem nao hem winim savve for teach wea iumi born witim?
[Piksa long page 9]
Waswe, iu joinim finis Theocratic Ministry Skul?
[Piksa long page 10]
Why nao hem important for Bible study bilong iu for read from Bible?
[Piksa long page 12]
Prea witim Bible study bilong iu and storyim hem taem iu prea