Iusim Olketa Audio Recording
1. Long jw.org staka pablikeson stap for readim, bat wanem moa hem stap long datfala website wea savve helpem iumi?
1 Staka pipol laekem tumas for iusim jw.org for readim olketa trufala samting abaotem Bible. (Eccl. 12:10) Bat samfala no lisin yet long olketa audio recording wea stap long website bilong iumi. Olketa audio recording hia savve helpem pipol for herem staka samting wea stap long datfala website. Wanem taem nao hem gud for iumi iusim olketa audio recording?
2. Hao nao iumi savve iusim olketa audio recording long famili worship or long taem wea iumi duim study seleva?
2 Iusim Long Famili Worship or Taem Iu Duim Study Seleva: Sapos iumi lisin long olketa audio recording bilong Bible, olketa magasin, or wanfala pablikeson taem iumi travel or duim olketa nara samting, datwan bae helpem iumi for iusim gud taem bilong iumi. (Eph. 5:15, 16) Sapos famili lisin long recording bilong wanfala pablikeson and lukluk followim long buk, datwan savve mekem famili worship interesting. Sapos iumi lisin long olketa audio recording taem iumi duim study seleva, datwan bae helpem iumi for read gud or helpem iumi for lanem nara languis.
3. Olketa audio recording bilong iumi savve helpem wanem kaen pipol?
3 Iusim Long Ministry: Pipol long territory bilong iumi wea no garem taem for read maet willing for lisin long olketa audio recording. Or maet iumi meetim pipol wea story long difren languis and wea bae hapi for herem message abaotem Kingdom long ‘languis bilong olketa.’ (Acts 2:6-8) Long samfala kantri, hem wei bilong pipol for lisin long olketa story. Olsem example, hem wei bilong pipol long Hmong for storyim history bilong olketa long olketa young pipol bilong olketa, and olketa young wan hia no savve forgetim wanem olketa herem. Hem wei bilong staka nara pipol tu for lanem history and culture from olketa story, olsem iumi long Solomon Islands and olketa long Africa.
4. Wanem nao samfala kwestin wea iumi savve tingim, mekem iumi helpem pipol long territory?
4 Waswe, iu tingim samfala long territory bilong iu wea bae hapi for herem wanfala audio recording long languis bilong olketa? Waswe, iu savve tingim eniwan wea iu savve sendem long hem wanfala audio pablikeson long email? Waswe, iu savve daonlodim wanfala audio pablikeson go long wanfala CD and givim witim datfala buk tu long wanfala haosholder wea interest? Sapos iu givim wanfala full electronic buk, brochure, or magasin long samwan long ministry, iu savve raetem datwan long report bilong iu. Iumi savve iusim olketa audio recording taem iumi duim study, and tu, for helpem pipol long ministry savve long Kingdom.—1 Cor. 3:6.