Olketa Tru Christian Mas Showimaot Love—No Tingim Seleva Nomoa and No Kros Kwiktaem

WHY HEM IMPORTANT: Jesus sei olketa disaepol bilong hem mas showimaot love. (Joh 13:34, 35) For showimaot love olsem Jesus, iumi mas tingim olketa narawan and no kwiktaem for kros.—1Co 13:5.

WANEM FOR DUIM:

• Taem narawan talem or duim samting wea mekem iu feel nogud, tingim why nao hem duim datwan and wanem nao bae kamaot from wanem iu ting for duim.—Provebs 19:11

• Tingim iumi evriwan no perfect, and samfala taem iumi savve talem or duim samting wea mekem iumi sorre bihaen

• Kwiktaem stretem problem

LUKIM VIDEO “IUFALA LOVEM IUFALA EVRIWAN”—NO TINGIM SELEVA NOMOA AND NO KROS KWIKTAEM, THEN ANSAREM OLKETA KWESTIN HIA:

• Taem Tom askem Larry for meet bihaen long meeting, wanem nao Larry talem, and why nao datwan hem no fitim?

• From Tom tingting firstaem, hao nao datwan helpem hem for no kros?

• Wanem gud samting nao kamaot from wei wea Tom tok kaen long Larry?