Stret or Rong: Samting Iumi Evriwan Mas Tingim

If iu laek for travel lo eni ples wea iu no kasem bifor, wat nao bae iu duim?

1. 1. Go followim direction wea iu ting hem stret.

2. 2. Followim olketa narawan from iu ting olketa savve lo datfala ples.

3. 3. Askem wanfala fren wea iu trustim wea savve lo road for kasem datfala ples, or chekim wanfala map or GPS.

If iumi chusim option wan or tu, iumi bae kasem wanfala ples bat hem no datfala destination wea iumi laek go lo hem. Bat if iumi chusim option thri, iumi sure iumi bae kasem datfala destination.

Laef blo iumi hem olsem wanfala journey, wea bae leadim iumi for kasem wanfala hapi future. For kasem datwan or nomoa, hem depend lo wea nao iumi kasem advaes taem iumi mekem olketa disison.

Staka disison wea iumi mekem hem smol nomoa bat samfala hem barava important. Olketa important disison hia showim hao iumi ting lo wat hem stret and no stret. Olketa disison olsem, nomata hem gud or nogud bae hem affectim iumi and olketa wea iumi lovem for longtaem. Olketa disison hia hem includim:

• Sex and marit

• For honest, waka, and selen

• Hao for lukaftarem pikinini

• Hao for treatim olketa narawan

Hao nao bae iu savve if disison wea iu mekem abaotem olketa samting hia bae mekem iu and famili blo iu for garem hapi future?

Samting wea iumi evriwan tingim hem: Wat nao bae helpem mi for mekem gud disison abaotem wat hem raet and wat hem rong?

Disfala magasin bae explainim why iu fit for trustim advaes from Bible and hao hem savve helpem iu.