Stret or Rong: Hao Staka Mekem Disison

Klosap evriwan agree dat samfala samting wea man duim, hem barava stret or barava rong. For example, lo staka ples, murder, rape, and child sexual abuse, man wea duim savve kasem panis. Bat lo olketa nara situation lo laef olsem hu nao for sex witim, honest, or hao for lukaftarem pikinini, staka pipol ting no eni rong or raet disison for datwan. Olketa ting evri disison hem olraet nomoa. Staka taem pipol mekem disison followim tingting blo olketa nomoa and tingting blo narawan. Hao, datwan hem gud idea?

HAO, IUMI SHUD MEKEM DISISON FOLLOWIM TINGTING BLO IUMI NOMOA?

Staka taem iumi mekem disison followim hao iumi feel abaotem wat hem stret and rong. (Rome 2:​14, 15) Nomata olketa pikinini savve taem samting hem no fair, and olketa feel guilty taem olketa duim rong samting. Taem iumi growap, iumi lane for luksavve lo wat hem stret and rong from famili blo iumi, frens, olketa teacher, community, religion, and culture. Taem iumi mekem olketa disison, konsens blo iumi bae talem if wat iumi disaedem hem stret or rong.

Feeling blo iumi abaotem wat hem stret and rong savve mekem iumi for tingim olketa narawan, appreciatim, no fevarem, and kaen lo olketa narawan. And tu, hem savve mekem iumi hol bak for duim samting wea bae mekem olketa wea iumi lovem feel nogud or maet hem mekem iumi shame and feel guilty.

Hao, for mekem disison followim tingting blo iumi nomoa hem evritaem help? Garrick, wanfala young man hem sei, “Mi savve duim eni samting wea mi laek for duim.” Bat hem luksavve, for duim wat hem tingse hem stret nating helpem hem. Hem sei, “mi nating hapi lo laef bikos mi man for durong, iusim drug, savve drunk tumas, and raf tumas.”

HAO, IUMI SHUD FOLLOWIM TINGTING BLO NARAWAN

Staka taem olketa disison wea iumi mekem hem base lo tingting blo narawan. Datwan savve helpem iumi bikos olketa garem experience lo laef. Olketa lo famili, frens, and lo community bae respectim iumi bikos iumi duim samting followim tingting blo olketa.

Hao, for mekem disison followim tingting blo narawan hem evritaem help? Priscila wanfala young woman, followim samting wea staka frens blo hem duim and sex witim olketa wea hem no maritim. Bat hem luksavve, for duim samting followim wat olketa narawan ting hem stret, nating mekem hem hapi. Hem sei: “For followim wat evri narawan duim nating mekem mi hapi nomoa. Hem mekem mi duim olketa karangge samting and laef blo mi stap lo danger.”

ENI HELP STAP FOR MEKEM GUD DISISON?

Taem iumi disaedem wat hem stret and wat hem rong, tingting blo iumiseleva and tingting blo narawan savve help. Bat, for duim datwan nomoa hem no evritaem helpem iumi. Samtaems, from iumi no tingim outcome blo disison wea iumi mekem, datwan savve spoelem iumiseleva and olketa narawan. (Proverbs 14:12) And nomata if tingting blo iumi or olketa narawan abaotem samting hem stret, hem still savve spoelem iumi and iumi savve changem. Distaem staka pipol acceptim olketa wei, wea lo bifor olketa ting hem rong.

Hao, eni help stap for disaedem wat hem stret and wat hem rong? Hao, eni gud advaes stap wea iumi savve followim distaem wea bae helpem iumi for olowe?

Iumi hapi wanfala buk stap wea garem best advaes wea evritaem helpem pipol evriwea. Next article bae storyim wea iumi savve faendem best advaes for disaedem wat hem stret and wat hem rong.