“Gohed Followim” Jesus Afta Iu Baptaes

1-2. Wat nao olketa blessing wea samwan savve kasem bihaen hem baptaes?

HEM hapi samting taem iumi baptaes and kamap part lo famili blo Jehovah. Hem privilege for garem klos wei for fren witim Jehovah. Iumi agree witim toktok blo David wea raetem disfala psalm, wea sei: “Man wea iu [Jehovah] chusim and tekem kam klosap for stap lo olketa courtyard blo iu hem hapi.”—Ps. 65:4.

² Jehovah no letem eniwan nomoa for kam insaed courtyard blo hem. Olsem iumi storyim lo first article, Jehovah chus for fren witim olketa wea duim samting for showimaot olketa laek for fren klos witim hem. (Jas. 4:8) Taem iu dedicate lo Jehovah and baptaes, iu garem spesol wei for fren klos witim Jehovah. Iu savve sure hao bihaen iu baptaes, Jehovah bae gohed ‘pourim blessing lo iu go kasem taem iu bae no short lo eni samting.’—Mal. 3:10; Jer. 17:​7, 8.

3. Olketa Christian wea dedicate and baptaes garem wanem important responsibility? (Ecclesiastes 5:​4, 5)

³ Bat, baptism hem start lo service blo iu for Jehovah. So afta iu baptaes, iu bae laek for duim best for keepim dedication vow blo iu, nomata iu kasem olketa temptation or feisim olketa hard taem wea testim faith blo iu. (Readim Ecclesiastes 5:​4, 5.) From iu disaepol blo Jesus, iu bae followim example blo hem and barava followim gud olketa komand blo hem. (Matt. 28:​19, 20; 1 Pet. 2:21) Disfala article bae helpem iu for duim datwan.

“GOHED FOLLOWIM” JESUS NOMATA IU KASEM TEMPTATION AND HARD TAEM

4. Wat nao Jesus minim taem hem sei olketa disaepol blo hem bae “karem post” blo olketa seleva? (Luke 9:23)

⁴ Afta iu baptaes, hem no minim iu bae free from olketa problem. Olsem Jesus talem, olketa disaepol blo hem bae “karem post” blo olketa seleva. And tu, hem sei olketa bae duim datwan “evriday.” (Readim Luke 9:23.) Waswe, wat Jesus talem minim bae olketa follower blo hem bae safa evritaem? Barava nomoa. Really hem laek strongim point hao olketa bae no kasem blessing nomoa, bat olketa bae kasem samfala challenge tu. Samfala lo olketa challenge hia maet bae hem hard tumas.—2 Tim. 3:12.

5. Olketa wanem blessing nao Jesus promisim lo olketa wea mekem olketa sakrifaes?

⁵ Maet famili blo iu againstim iu or maet iu sakrifaesim samfala material samting mekem iu putim Kingdom first lo laef blo iu. (Matt. 6:33) Sapos olsem, iu savve sure hao Jehovah lukim evri samting wea iu duim. (Heb. 6:10) For sure, iu experiencem wat Jesus talem: “Eniwan wea lusim haos or olketa brata or sista or mami or dadi or pikinini or olketa garden bikos long mi and bikos long datfala gud nius bae hem kasem bak staka samting distaem winim wanem hem lusim. Bae hem kasem olketa haos, olketa brata, sista, mami, pikinini, and olketa garden, and tu, pipol bae spoelem hem. Then long world wea bae kam, bae hem kasem laef olowe.” (Mark 10:​29, 30) Olketa blessing wea iu bin kasem hem barava winim eni sakrifaes wea iu mekem.—Ps. 37:4.

6. Afta iu baptaes, why nao iu need for faet againstim olketa ‘samting wea body laekem’?

⁶ Afta iu baptaes, iu bae still need for faet againstim olketa ‘samting wea body laekem.’ (1 John 2:16) Diswan hem bikos iu kam from laen blo Adam. Maet samfala taem iu feel olsem aposol Paul. Hem sei: “Mi barava lovem law bilong God long heart bilong mi, bat mi luksavve nara law wea stap long body bilong mi hem againstim law wea stap long mind bilong mi. Nara law hia hem law bilong sin wea stap long body bilong mi and hem bossim mi.” (Rome 7:​22, 23) Maet iu discourage bikos iu mas faet againstim feeling for laek duim sin. Bat, taem iu ting abaotem dedication promis blo iu lo Jehovah, datwan bae strongim disison blo iu for faet againstim eni temptation. Tru nao taem iu feisim eni temptation, dedication vow blo iu bae helpem iu. Hao nao bae hem helpem iu?

7. Hao nao dedication blo iu lo Jehovah savve helpem iu for gohed faithful lo hem?

⁷ Taem iu dedicate lo Jehovah, iu disaed for no duim samting wea iuseleva laekem. Diswan minim iu bae sei no lo eni goal and eni samting wea iuseleva laekem wea mekem Jehovah no hapi. (Matt. 16:24) So taem iu kasem test, iu bae no need for ting raonem moa wat for duim. Hem bae olsem iu satem door from evri nara tingting, and wanfala nomoa bae open, hem nao for faithful lo Jehovah. Iu bae gohed disaed strong for mekem Jehovah hapi. Iu bae garem sem tingting olsem Job. Nomata hem kasem barava hard taem, hem disaed strong and sei: “Mi bae no letem eni samting for mekem mi no faithful!”—Job 27:5.

8. Hao nao wei for ting raonem dedication prea blo iu savve helpem iu for againstim eni temptation?

⁸ For ting raonem dedication prea blo iu lo Jehovah bae strongim iu for againstim eni temptation. For example, hao, bae iu flirt or duim samting wea showimaot iu laekem waef or hasband blo narawan? Barava nomoa! Iu disaed finis for sei no lo kaen situation olsem. From datwan, bae iu misstim nao wei for sorre tumas wea savve kamap bikos iu letem olketa nogud feeling olsem for stap insaed heart blo iu. Iu bae “tane difren” from “road blo olketa wea wicked.”—Prov. 4:​14, 15.

9. Hao nao wei for ting raonem dedication prea blo iu savve helpem iu for putim first olketa spiritual samting?

⁹ Hao if samwan askem iu for duim wanfala waka wea bae mekem hem no isi for iu attendim olketa meeting evritaem? Iu savve finis wat for duim. Even bifor samwan askem iu for duim kaen waka olsem, iu disaed finis for sei no. From datwan, bae iu no need for stragol moa bihaen for putim Jehovah first bikos iu acceptim datfala waka. Taem iu tingim wei wea Jesus disaed for mekem Dadi blo hem hapi, datwan bae helpem iu for disaed strong and kwiktaem rejectim eni samting wea bae mekem God no hapi.—Matt. 4:10; John 8:29.

10. Bihaen iu baptaes, hao nao bae Jehovah helpem iu for “gohed followim” Jesus?

¹⁰ Tru nao, olketa hard taem and temptation hem givim iu chance for showim iu disaed strong for “gohed followim” Jesus. Taem iu duim olsem, bae iu barava sure hao Jehovah bae helpem iu. Bible sei: “God hem keepim olketa promis bilong hem and hem bae no letem samting for switim iufala wea iufala no fit for winim. Bae hem helpem iufala for winim datwan mekem iufala no givap.”—1 Cor. 10:13.

HAO FOR GOHED FOLLOWIM JESUS

11. Wat nao wanfala best samting wea iu savve duim for gohed followim Jesus? (Lukim tu piksa.)

¹¹ Jesus servem Jehovah witim full heart, and hem evritaem prea lo Jehovah. (Luke 6:12) Wanfala lo olketa best samting iu savve duim for gohed followim Jesus bihaen iu baptaes, hem for gohed duim olketa samting wea bae mekem iu fren klos witim Jehovah. Bible sei: “Nomata iumi kamap strong finis, iumi mas gohed for followim sem wei wea iumi followim kam kasem distaem.” (Phil. 3:16) Staka taem, iu herem olketa experience blo olketa brata and sista wea reach aot for duim moa samting lo service blo Jehovah. Maet olketa attendim Skul for Olketa Kingdom Evangelizer or muv lo ples wea garem big need. Evritaem pipol blo Jehovah laek for impruv lo olketa difren wei for duim ministry. (Acts 16:9) Bat, hao sapos distaem iu no fit for duim datwan? No comparem iuseleva witim wat olketa narawan duim. For win lo datfala resis wea evri Christian insaed, iumi mas no givap. (Matt. 10:22) No forgetim hao Jehovah barava hapi taem iu duim best blo iu, fitim situation blo iu. Datwan hem wanfala important samting iu savve duim for gohed followim Jesus afta iu baptaes.—Ps. 26:1.

12-13. Wat nao iu savve duim if feeling blo iu for laek duim waka blo Jehovah hem gogo daon? (1 Corinth 9:​16, 17) (Lukim tu box “Gohed Ran Insaed lo Resis.”)

¹² Hao if, for lelebet taem iu feel olsem olketa prea blo iu hem no kam from heart or iu no really enjoyim ministry? Hao sapos iu no enjoyim Bible reading olsem bifor? Sapos iu feel olsem bihaen iu baptaes, no tingse Jehovah stop nao for givim iu holy spirit. From iu no perfect, samfala taem feeling blo iu savve change. If feeling blo iu for laek duim waka blo Jehovah hem gogo daon, hem gud for tingim example blo aposol Paul. Nomata Paul traem best for followim example blo Jesus, samfala taem hem feel olsem hem no laek for duim datfala waka. (Readim 1 Corinth 9:​16, 17.) Hem sei: “Nomata mi no willing for duim, bat hem nao waka bilong mi wea Lord trustim mi for duim.” So Paul disaed strong for duim ministry blo hem nomata samfala taem hem no feel laek for duim datwan.

¹³ Lo sem wei tu, no letem feeling blo iu for affectim olketa disison blo iu. Disaed strong for duim stret samting nomata wat nao maet feeling blo iu. Sapos iu gohed duim stret samting, gogo bae feeling blo iu hem change. Taem iu gohed for garem gud spiritual schedule, datwan bae helpem iu for gohed followim Jesus afta iu baptaes. Taem iu gohed and no givap, datwan bae encouragem olketa brata and sista.—1 Thess. 5:11.

“GOHED FOR LUKLUK GUD LONG IUFALA SELEVA”

14. Wat nao iu need for lukluk gud lo hem, and why nao olsem? (2 Corinth 13:5)

¹⁴ Nara samting wea bae helpem iu afta iu baptaes, hem for evritaem lukluk gud lo iuseleva. (Readim 2 Corinth 13:5.) Hem gud for markem taem for lukluk gud lo laef and wei blo iu, and chekim if iu prea evriday, readim and studyim Bible, attendim olketa meeting, and joinim ministry. Trae for faendem wei for enjoyim and benefit from olketa samting hia. For example, tingim olketa kwestin hia: ‘Hao, mi savve explainim olketa main Bible teaching lo olketa narawan? Wat nao samfala samting mi savve duim for enjoyim ministry? Hao, olketa prea blo mi hem specific, and showim mi barava depend lo Jehovah? Hao, mi attendim olketa meeting evritaem? Hao nao mi savve impruv lo wei for concentrate and tekpart lo olketa meeting?’

15-16. Wat nao iu lanem from experience blo wanfala brata wea rejectim temptation?

¹⁵ Hem gud for honest and lukluk gud lo olketa wik point blo iuseleva. Wanfala brata wea nem blo hem Robert, storyim experience blo hem wea helpem iumi for minim gud disfala point, hem sei: “Taem mi samting olsem 20 years old, mi waka part-taem. Wanday afta waka, wanfala gele wea mifala waka tugeta invaetem mi lo haos blo hem. Hem sei bae mitufala nomoa lo haos and bae mitufala savve enjoyim gud taem tugeta. Firstaem, mi mek excuse, bat gogo mi sei no and explainim reason why.” Robert hem rejectim temptation, and datwan hem gud samting. Bat, bihaen hem ting abaotem datfala situation hem luksavve hao hem deal witim datwan, hem no mas gud. Hem sei: “Mi nating disaed strong and kwiktaem rejectim datfala gele olsem hao Joseph rejectim waef blo Potiphar. (Gen. 39:​7-9) Mi sapraes lelebet, dat hem no isi for mi rejectim datfala gele. Datwan mekem mi luksavve hao mi need for strongim frenship blo mi witim Jehovah.”

¹⁶ Olsem Robert, iu tu bae kasem gud samting taem iu lukluk gud lo iuseleva. Nomata iu rejectim wanfala temptation, askem iuseleva, ‘Hao, mi kwiktaem for sei no?’ If iu luksavve iu need for impruv, no discourage. Hem gud nao iu luksavve lo wik point blo iu. Prea abaotem datwan and duim samting for strongim disison blo iu for obeyim olketa standard blo Jehovah.—Ps. 139:​23, 24.

17. Hao nao nem blo Jehovah join witim experience blo Robert?

¹⁷ Bat Robert storyim nara samting wea kamaot from datfala experience. Hem gohed for sei: “Bihaen mi rejectim invitation blo datfala gele wea mifala waka, hem sei: ‘Iu pasim test nao!’ Mi askem hem wat nao hem minim. Hem sei hem garem wanfala fren wea hem Witness bifor, and datfala fren talem hao evri young Witness garem dabol laef and if chance kamap bae olketa duim nomoa eni rong samting. So datfala gele wea mifala waka talem fren blo hem dat bae hem testim mi for lukim if datwan hem tru. Taem mi herem datwan, mi hapi tumas bikos mi mekhae lo nem blo Jehovah.”

18. Wat nao iu disaed strong for duim afta iu baptaes? (Lukim tu box “Wanfala Series wea Bae Iu Enjoyim.”)

¹⁸ Taem iu dedicatem iuseleva lo Jehovah and baptaes, datwan showim iu laek for mekhae lo nem blo hem nomata wat nao hem happen. And iu savve sure dat Jehovah hem savve lo olketa hard taem wea iu feisim and olketa temptation wea iu rejectim. Hem bae blessim hard waka wea iu duim for gohed faithful lo hem. Trustim hao Jehovah bae givim holy spirit blo hem for strongim iu for duim datwan. (Luke 11:​11-13) Witim help blo Jehovah, iu bae fit for gohed followim Jesus afta iu baptaes.