Pipol lo Bifor Kasem Forgiveness Nomata No Eni Ransom Yet

Iumi savve kasem forgiveness for olketa sin blo iumi only bikos lo ransom sakrifaes wea Jesus peim witim blood blo hem. (Eph. 1:​7, ftn.) Bat Bible sei: “Long bifor kam [God] forgivim pipol wea duim sin and hem patient witim olketa.” Hem duim datwan bifor Jesus provaedem ransom. (Rome 3:25) Jehovah garem olketa perfect standard blo justice, so hao nao hem savve forgivim pipol wea duim sin nomata Jesus no peim yet datfala ransom?

Lo tingting blo Jehovah, taem hem promis for provaedem datfala “pikinini” wea bae sevem olketa wea showimaot faith lo hem, hem olsem Jehovah peim finis datfala ransom. (Gen. 3:15; 22:18) God barava sure dat son blo hem bae willing for provaedem ransom lo taem wea God markem hem for duim datwan. (Gal. 4:4; Heb. 10:​7-10) Taem Jesus stap lo earth, Jehovah givim hem paoa for forgivim sin blo pipol nomata Jesus no peim yet datfala ransom. Jesus fit for duim datwan, bikos hem savve sakrifaes wea bae hem givim bae kavarem sin blo pipol wea garem faith.—Matt. 9:​2-6.