Kasem Comfort From Iu Sure Jehovah Appruvim Iu

1. Wat nao samfala faithful servant blo Jehovah stragol for deal witim?

IUMI kasem comfort taem iumi savve dat Jehovah appruvim pipol blo hem olsem wanfala grup! Bible sei: “Jehovah hapi tumas lo pipol blo hem.” (Ps. 149:4) Bat samfala taem, maet iumiseleva barava discourage and wonder, ‘Hao, Jehovah appruvim mi tu?’ Lo Bible, staka wea faithful for servem Jehovah tu stragol for deal witim semkaen feeling.—1 Sam. 1:​6-10; Job 29:​2, 4; Ps. 51:11.

2. Hu nao Jehovah appruvim?

² Bible showimaot klia hao Jehovah savve appruvim or hapi lo iumi nomata iumi no perfect. Wat nao iumi savve duim for kasem datwan? Iumi mas showimaot faith lo Jesus Christ and baptaes. (John 3:16) Taem iumi duim datwan, iumi showimaot lo evriwan hao iumi repent from sin blo iumi and promis lo God for duim will blo hem. (Acts 2:38; 3:19) Jehovah hapi taem iumi duim olketa samting hia wea mekem iumi for fren klos witim hem. If iumi gohed for duim best blo iumi for keepim dedication vow blo iumi, Jehovah appruvim iumi and ting lo iumi olsem klos fren blo hem.—Ps. 25:14.

3. Wat nao bae iumi discussim?

³ Bat, samfala taem why nao samfala maet ting God no appruvim olketa? Hao nao Jehovah showimaot hem appruvim iumi? And hao nao wanfala Christian savve feel sure God appruvim hem?

WHY SAMFALA MAET TING GOD NO APPRUVIM OLKETA

4-5. Nomata iumi feel iusles, wat nao iumi sure lo hem?

⁴ Samfala lo iumi, since taem iumi smol yet iumi stragol witim feeling for feel iusles. (Ps. 88:15) Wanfala brata wea nem blo hem Adrián sei: “Lo full laef blo mi, mi feel iusles. Mi tingim taem mi smol, mi savve prea for famili blo mi for laef lo Paradaes, bat mi feel olsem mi no gud inaf for stap lo Paradaes.” Tony, wea growap insaed famili wea no Witness, sei: “No enitaem parents blo mi talem dat olketa lovem or hapi lo mi. Mi feel olsem no eni samting wea mi duim hem mekem olketa hapi.”

⁵ If samfala taem iumi stragol for deal witim feeling for feel iusles, hem gud for tingim hao Jehovah nao leadim iumi kam lo hem. (John 6:44) Hem lukim gud samting lo iumi wea iumiseleva no savve lukim, and hem savve lo heart blo iumi. (1 Sam. 16:7; 2 Chron. 6:30) So iumi savve trustim hem taem hem sei iumi spesol.—1 John 3:​19, 20.

6. Wat nao feeling blo aposol Paul abaotem olketa sin wea hem duim bifor?

⁶ Bifor iumi lanem truth, samfala lo iumi duim olketa nogud samting wea mekem iumi feel guilty yet. (1 Pet. 4:3) Even samfala faithful Christian stragol for deal witim feeling for duim samting wea no stret. Waswe, heart blo iu savve judgem iu? If olsem, iumi savve kasem comfort taem iumi savve hao samfala faithful servant blo Jehovah bifor tu stragol for deal witim semkaen feeling. For example, aposol Paul feel nogud taem hem ting abaotem olketa wik point blo hemseleva. (Rome 7:24) Paul repent finis from olketa sin blo hem and baptaes. Nomata olsem, Paul sei olketa nara aposol gud “winim” hem and hem nao “worst” sinner winim evriwan.—1 Cor. 15:9; 1 Tim. 1:15.

7. Hao nao iumi shud ting lo olketa sin wea iumi duim bifor?

⁷ Dadi blo iumi lo heven promis for forgivim iumi if iumi repent. (Ps. 86:5) So if iumi really sorre abaotem sin wea iumi duim, iumi savve barava bilivim dat Jehovah forgivim iumi.—Col. 2:13.

8-9. Hao nao iumi savve ovakamim feeling for tingse iumi no duim inaf samting for Jehovah?

⁸ Iumi evriwan laek for duim best blo iumi lo service blo Jehovah. Bat, maet iumi feel olsem iumi no duim inaf for mekem God appruvim iumi. Wanfala sista wea nem blo hem Amanda sei: “Mi tingse for duim best blo mi for Jehovah, hem minim mi mas duim staka samting for hem. Staka taem mi trae for duim samting winim wat mi fit for duim. Taem mi fail for duim, mi no hapi and mi tingse Jehovah tu no hapi lo mi.”

⁹ Hao nao iumi savve ovakamim feeling for tingse iumi no duim inaf samting for Jehovah? Remember Jehovah hem flexible and no savve demandim man. Hem no expectim iumi for duim samting winim wat iumi fit for duim. If iumi duim best blo iumi for hem, hem appreciatim datwan. Tingim tu olketa Bible example abaotem olketa wea servem Jehovah witim full heart. Wanfala nao hem Paul. For staka year hem barava waka hard, hem travel for staka thousand kilometer and startim staka niu kongregeson. Bat, taem situation blo Paul mekem hem no fit for duim staka samting lo preaching waka, hao, God no hapi lo hem nao? Nomoa. Paul gohed duim best blo hem, and Jehovah blessim hem. (Acts 28:​30, 31) Lo sem wei, wat iumi fit for duim for Jehovah hem no semsem evritaem. Bat wat hem important lo Jehovah hem why iumi duim. Distaem bae iumi storyim samfala wei wea Jehovah showimaot hem appruvim iumi.

HAO NAO JEHOVAH SHOWIMAOT HEM APPRUVIM IUMI?

10. Hao nao iumi savve herem Jehovah sei hem appruvim iumi? (John 16:27)

¹⁰ Hem iusim Bible. Jehovah laekem tumas for showimaot hem appruvim pipol wea hem lovem. Bible storyim tufala taem wea Jehovah talem Jesus dat hem lovem hem and hapi lo hem. (Matt. 3:17; 17:5) Hao, iu tu laek for herem Jehovah talem dat hem hapi lo iu? Jehovah no story kam from heven for iumi, bat hem iusim Bible. Iumi savve herem Jehovah appruvim iumi taem iumi readim toktok blo Jesus lo olketa Gospel. (Readim John 16:27.) Jesus showimaot wei blo Dadi blo hem lo perfect wei. So taem iumi readim toktok wea Jesus talem for showimaot hem appruvim olketa faithful follower blo hem wea no perfect, iumi savve imaginim hao Jehovah talem datwan for iumi tu.—John 15:​9, 15.

11. Why nao olketa hard taem wea iumi kasem hem no minim Jehovah no appruvim iumi? (James 1:12)

¹¹ Wat hem duim. Jehovah barava laek for helpem iumi, olsem for provaedem olketa material need blo iumi. Samfala taem, Jehovah savve letem iumi for feisim olketa hard taem, olsem datfala raeteous man Job. (Job 1:​8-11) Olketa hard taem wea iumi kasem hem no minim God no appruvim iumi. Bat, olketa hard taem hia givim iumi chance for showimaot hao strong nao love blo iumi for God and if iumi barava trustim hem. (Readim James 1:12.) Taem olsem, bae iumi experiencem hao hem lovem and kea for iumi and helpem iumi for no givap.

12. Wat nao iumi savve lanem from experience blo Dmitrii?

¹² Tingim example blo wanfala brata lo Asia, wea nem blo hem Dmitrii. Hem lusim waka blo hem and for staka month hem no faendem eni waka. So for showimaot hem trustim Jehovah, hem disaed for duim moa samting lo ministry. Staka month go pas, bat hem no faendem eni waka. Then hem sik tumas and hem no savve getap from bed. Hem start for feel iusles and ting hem no wanfala gud hasband or dadi, and tingse Jehovah no hapi lo hem. Then wanfala evening dota blo hem printim lo wanfala pepa toktok wea stap lo Isaiah 30:​15, wea sei: “Sapos mind blo iufala hem kwaet and showim dat iufala trustim mi, bae iufala strong.” Hem givim lo dadi blo hem and sei, “Dadi taem iu feel sorre, rememberim disfala scripture.” Datwan helpem Dmitrii for luksavve Jehovah still provaedem kaikai, kaleko, and ples for famili blo hem stap. Hem sei, “Wat mi need for duim hem for no wari and gohed trustim God blo mi.” If iu feisim sem kaen hard taem, iu savve trustim hao Jehovah kea for iu and bae hem helpem iu for gohed faithful.

13. Hu nao Jehovah iusim for showimaot hem appruvim iumi, and hao nao hem duim datwan?

¹³ Olketa brata and sista. Jehovah iusim olketa brata and sista for showimaot hem appruvim iumi. For example, maet hem iusim olketa for talem olketa encouraging toktok lo taem wea iumi barava needim. Wanfala sista lo Asia experiencem diswan lo taem wea hem stress tumas. Hem lusim waka blo hem and gogo hem sik tumas. Then hasband blo hem duim wanfala serious sin and finis from elder. Hem sei, “Mi no minim why nao olketa samting hia happen. Mi tingse maet mi duim eni rong samting and Jehovah no hapi lo mi.” Disfala sista blo iumi askem Jehovah for helpem hem luksavve dat Jehovah still hapi lo hem. Hao nao Jehovah duim datwan? Datfala sista sei, “Olketa elder lo kongregeson story witim mi and helpem mi for luksavve hao Jehovah lovem mi.” Bihaen datwan, hem askem moa Jehovah for helpem hem. Hem sei, “Lo sem day, mi kasem wanfala leta from olketa brata and sista lo kongregeson. Taem mi readim toktok blo olketa wea comfortim mi, mi feelim Jehovah ansarem prea blo mi.” Tru nao, staka taem Jehovah showimaot hem appruvim iumi, taem hem iusim olketa brata and sista for talem olketa comforting toktok for iumi.—Ps. 10:17.

14. Wat nao nara samting wea showimaot Jehovah appruvim iumi?

¹⁴ Jehovah showimaot hem appruvim iumi tu taem hem iusim olketa brata and sista for givim kaonsel lo taem wea iumi needim. For example, lo first century, Jehovah iusim aposol Paul for raetem 14-fala leta for olketa brata and sista. Olketa leta hia garem strong kaonsel wea showimaot hem lovem olketa. Why nao Jehovah muvim Paul for raetem kaonsel olsem? Jehovah hem gud Dadi and savve disciplinem pikinini blo hem wea “hem hapi lo hem.” (Prov. 3:​11, 12) So if samwan givim iumi kaonsel from Bible, hem no minim Jehovah no hapi lo iumi, bat hem minim hem appruvim iumi. (Heb. 12:6) Wat nao samfala nara samting wea showimaot Jehovah appruvim iumi?

WAT NAO OLKETA EVIDENCE WEA SHOWIMAOT JEHOVAH APPRUVIM IUMI?

15. Hu nao Jehovah givim holy spirit lo olketa, and why nao diswan mekem iumi sure hem appruvim iumi?

¹⁵ Jehovah givim holy spirit lo olketa wea hem appruvim. (Matt. 12:18) Tingim disfala kwestin, ‘Hao, mi showimaot samfala frut blo holy spirit blo God lo laef blo mi?’ Waswe, iu lukim dat iu impruv lo wei for patient witim olketa narawan winim bifor iu lane abaotem Jehovah? Taem iu garem olketa naesfala fasin wea holy spirit blo God mekem iu for showimaot, diswan bae mekem iu for barava sure Jehovah appruvim iu!—Lukim box “Olketa Frut blo Spirit Hem . . .”

16. Hu nao Jehovah iusim for preachim gud nius, and datwan mekem iu sure lo wanem? (1 Thessalonica 2:4)

¹⁶ Jehovah givim waka for talemaot gud nius lo olketa wea hem appruvim. (Readim 1 Thessalonica 2:4.) Tingim hao wanfala sista wea nem blo hem Jocelyn kasem gud samting taem hem talem gud nius lo olketa narawan. Wanday, Jocelyn feel depress taem hem wekap. Hem sei: “Mi taed and feel iusles. Bat mi pioneer lo datfala taem and hem day blo mi for go preaching. So mi prea and go lo preaching.” Lo datfala morning Jocelyn meetim Mary, wea hem kaenfala woman wea acceptim Bible study. Bihaen samfala month, Mary storyim dat hem bin prea lo God for help lo datfala day wea Jocelyn noknok lo door blo hem. Taem Jocelyn tingim bak datfala experience, hem sei, “Mi feel olsem Jehovah talem mi, ‘Mi appruvim iu.’” Hem tru, no evriwan bae acceptim message wea iumi preachim. Bat iumi savve sure Jehovah hapi taem iumi duim best for talemaot gud nius lo olketa narawan.

17. Wat nao iumi lanem from wanem Vicky talem abaotem ransom? (Psalm 5:12)

¹⁷ Jehovah iusim ransom for forgivim sin blo olketa wea hem appruvim. (1 Tim. 2:​5, 6) Bat hao if heart blo iumi still no acceptim dat Jehovah appruvim iumi nomata iumi garem faith lo ransom and baptaes finis? Remember, staka taem iumi no fit for trustim feeling blo iumi bat iumi savve trustim Jehovah. Jehovah ting lo olketa wea garem faith lo ransom olsem olketa raeteous and hem promis for blessim olketa. (Readim Psalm 5:12; Rome 3:26) Wei for meditate abaotem ransom hem helpem Vicky. Wanday, bihaen hem ting abaotem ransom, hem sei: “Jehovah patient tumas witim mi. . . . Bat hem olsem mi sei lo hem: ‘Bigfala love wea iu showimaot hem no fitim mi. Sakrifaes blo Son blo iu no fit for kavarem sin blo mi.’” Taem Vicky meditate abaotem ransom, hem start for feelim love blo Jehovah for hem. Taem iumi ting raonem ransom, iumi tu savve feelim love blo Jehovah and luksavve hem appruvim iumi.

18. If iumi gohed for lovem Dadi blo iumi lo heven, wat nao iumi savve sure lo hem?

¹⁸ Nomata iumi traem best for followim olketa idea wea iumi storyim finis, maet samfala taem iumi discourage and wonder if Jehovah appruvim iumi. If datwan happen, remember dat Jehovah appruvim “olketa wea gohed for lovem hem.” (Jas. 1:12) So gohed fren klos witim Jehovah and lukim olketa samting wea showimaot hem appruvim iu. Evritaem tingim hao Jehovah hem no farawe from each wan lo iumi.—Acts 17:27.