Gohed Protectim Iuseleva From Eni Temptation

1-2. (a) Wanem warning nao Jesus talem for olketa disaepol blo hem? (b) Why nao olketa disaepol letem feeling for fraet affectim olketa? (Lukim tu olketa piksa.)

“NOMATA man savve laekem tumas for duim samting, maet body bilong hem no strong for duim wanem hem laekem.”a (Matt. 26:41b) Wat Jesus talem, showimaot hem barava understandim hao iumi no perfect and isi for duim sin. Bat diswan hem warning tu: Iumi mas careful for no ova confident. Lo evening lo datfala sem naet, olketa disaepol confident for sei bae olketa no lusim Masta blo olketa. (Matt. 26:35) Datwan showimaot olketa barava laek for duim stret samting. Nomata olsem, olketa no luksavve hao kwiktaem nomoa pressure savve mekem olketa wikdaon. Dastawe, Jesus warnim olketa and sei: “Iufala mas gohed for lukaot and prea, mekem iufala no foldaon long eni samting wea traem iufala.”—Matt. 26:41a.

² Sorre samting nao, olketa disaepol no gohed for lukaot. Taem olketa arrestim Jesus, hao, olketa disaepol gohed for stap witim hem or olketa fraet and ranawe? From olketa no careful, end ap olketa duim wat olketa sei bae olketa no duim, wea hem nao olketa ranawe from Jesus.—Matt. 26:56.

3. (a) For gohed loyal lo Jehovah, why nao iumi mas no ova confident? (b) Wat nao iumi bae storyim lo disfala article?

³ Iumi mas no ova confident. Iumi disaed strong for no letem eni samting for mekem iumi tanawe from Jehovah. Bat, iumi mas tingim hao iumi no perfect and isi for iumi foldaon lo temptation. (Rome 5:12; 7:​21-23) Maet seke nomoa, iumi insaed wanfala situation wea feeling for laek duim samting wea no stret hem kamap strong. For gohed loyal lo Jehovah and Son blo hem, iumi need for followim wat Jesus talem for protectim iumiseleva from temptation for duim eni sin. Disfala article savve helpem iumi duim datwan. First, bae iumi storyim wat nao samfala samting wea iumi mas careful lo hem wea isi for temptim iumi. Then, bae iumi storyim hao for protectim iumiseleva from datwan. Last samting, bae iumi storyim hao for gohed for careful.

WAT NAO SAMFALA SAMTING WEA IUMI MAS PROTECTIM IUMISELEVA FROM?

4-5. Why nao iumi mas protectim iumiseleva from olketa sin wea maet smol nomoa?

⁴ Nomata samfala sin maet hem smol nomoa, hem savve affectim frenship blo iumi witim Jehovah. And tu, hem savve mekem iumi for duim sin wea moa serious.

⁵ Iumi evriwan feisim temptation for duim sin. Bat each wan garem olketa difren wik point, maet hem for duim wanfala serious sin, duim samting wea no klin, or followim tingting blo pipol lo world. For example, samwan maet stragol for againstim temptation for duim sex. Narawan maet stragol for deal witim feeling for duim samting wea no klin, olsem for duim masturbation or lukluk lo pornography. Maet olketa narawan stragol witim feeling for fraetem man, garem independent tingting, wei for kros kwiktaem, or eni nara samting. Olsem James sei, “samting wea man seleva laekem nao savve traem hem.”—Jas. 1:14.

6. Wat nao iumi mas honest abaotem?

⁶ Hao, iuseleva luksavve wat kaen temptation nao isi for affectim iu? Iumi mas no laea lo iumiseleva and sei iumi no garem eni wik point or tingse iumi strong and hard for foldaon lo sin. (1 John 1:8) Paul storyim hao nomata olketa wea “mature” lo spiritual wei savve foldaon lo temptation if olketa no gohed for careful. (Gal. 6:1) Iumi mas honest lo iumiseleva and luksavve lo wat iumi no strong for deal witim.—2 Cor. 13:5.

7. Wat nao iumi need for luksavve lo hem? Storyim example.

⁷ Taem iumi luksavve lo samting wea isi for temptim iumi, wat nao iumi shud duim? Iumi mas waka hard for againstim datwan! Example, lo taem blo Bible, olketa city garem wall raonem so ples wea isi for enemy attakim, hem nao olketa gate. Dastawe, staka gard mas stap for protectim gate. Lo sem wei tu, iumi need for luksavve wat nao hem isi for temptim iumi and then iumi mas waka hard for protectim iumiseleva from datwan.—1 Cor. 9:27.

HAO FOR PROTECTIM IUMISELEVA

8-9. Wat nao datfala young man wea Proverbs chapter 7 storyim hem shud duim for protectim hemseleva? (Proverbs 7:​8, 9, 13, 14, 21)

⁸ Hao nao iumi savve protectim iumiseleva? Tingim wat iumi savve lanem from young man wea Proverbs chapter 7 storyim. Datfala young man duim sex witim wanfala woman wea wei blo hem nogud. Verse 22 sei “semtaem [or seke nomoa]” datfala young man go followim woman hia. Bat olsem olketa nara verse lo Proverbs chapter 7 showim, datfala young man duim samfala samting wea isisi lead go for hem duim datfala sin.

⁹ Wat nao hem duim? First samting, lo evening, hem “go followim street klosap lo ples wea woman hia stap.” Then, hem wakabaot go for haos blo datfala woman. (Readim Proverbs 7:​8, 9.) Next samting, taem hem lukim woman hia, hem no go difren. Instead, hem acceptim taem woman hia kissim hem and hem lisin taem woman hia storyim olketa sakrifaes wea hem offerim. Maet woman hia storyim diswan for mekem datfala young man tingse hem wanfala gud woman. (Readim Proverbs 7:​13, 14, 21.) Sapos datfala young man avoidim olketa danger wea lead go lo datfala sin, hem bae protectim hemseleva from datfala temptation and no duim sin.

10. Hao nao maet samwan savve duim sem mistek olsem datfala young man?

¹⁰ Disfala story blo Solomon showim samting wea savve happen lo eniwan wea worshipim Jehovah. Afta samwan duim serious sin, maet hem sei hem samting wea “seknomoa” happen, or hem samting wea hem no expectim. Bat, if hem ting abaotem, maet hem bae luksavve dat really hem duim samfala samting wea no stret wea lead go for hem sin. Samfala samting hia, maet hem bad association, nogud entertainment, or go in person or online lo olketa ples wea no fitim olketa Christian. Maet hem stop for prea, readim Bible, attendim meeting, or share lo ministry. Olsem datfala young man wea Proverbs storyim, luk olsem hem mekem staka bad disison wea lead go lo datfala sin and hem no samting wea seke nomoa happen.

11. For helpem iumi no foldaon lo sin, wat nao iumi shud avoidim?

¹¹ Wat nao leson for iumi? Iumi mas no duim eni sin, and tu stap klia from olketa tings wea lead go lo sin. Solomon showimaot klia disfala point bikos afta hem talem story abaotem datfala young man and woman wea wei blo hem nogud, hem sei olsem abaotem datfala woman: “No followim olketa road blo hem.” (Prov. 7:25) Hem tok olsem tu abaotem kaen woman olsem: “Stap farawe from hem. No go klosap entrance lo haos blo hem.” (Prov. 5:​3, 8) Yes, iumi protectim iumiseleva from sin taem iumi stap klia lo olketa situation wea savve lead go lo sin.b Diswan maet minim iumi mas avoidim olketa activity or olketa situation, wea maet hem no rong for Christian duim, bat maet hem lead go for temptation.—Matt. 5:​29, 30.

12. Wat nao Job disaed strong for duim, and hao nao datwan protectim hem from temptation? (Job 31:1)

¹² For avoidim eni situation wea bae lead go lo sin, iumi mas disaed strong for barava careful. Hem nao wat Job duim. Hem “mekem agreement witim tufala eye” blo hem for no lukluk lo nara woman witim rong tingting. (Readim Job 31:1.) Taem Job duim wat hem disaedem, datwan protectim hem for no duim adultery. Iumi tu savve disaed strong olsem Job for no duim eni samting wea maet lead go lo temptation.

13. Why nao iumi mas protectim tingting blo iumi? (Lukim tu olketa piksa.)

¹³ Iumi mas protectim tu tingting blo iumi. (Ex. 20:17) Samfala tingse hem olraet nomoa for ting abaotem olketa rong samting bat for duim nao hem rong. Bat wei for ting olsem hem no stret. Taem man gohed ting abaotem rong samting, hem mekem feeling for laek duim datwan kamap moa strong. Hem olsem, hem mekem temptation for hemseleva, then stragol moa for faet againstim. Samfala taem, rong tingting savve kamap lo mind blo iumi. Bat, important samting nao hem for kwiktaem rejectim tingting hia and then ting abaotem gud samting. Taem iumi duim datwan, bae iumi no letem rong tingting for grow and kamap strong wea bae hard for iumi faet againstim, and hem savve leadim iumi for duim serious sin.—Phil. 4:8; Col. 3:2; Jas. 1:​13-15.

14. Wat nao nara samting wea savve helpem iumi for protectim iumiseleva from temptation?

¹⁴ Wat nao nara samting wea iumi savve duim for protectim iumiseleva from temptation? Iumi mas barava convince dat if iumi obeyim olketa law blo Jehovah bae iumi evritaem kasem gud samting. Maet samfala taem iumi stragol for kontrol tingting and feeling blo iumi for followim wat God laekem, bat if iumi duim datwan, bae iumi kasem peace lo mind wea mekem iumi barava hapi.

15. Hao nao wei for mekem grow feeling for laekem stret samting savve protectim iumi from temptation?

¹⁵ Iumi need for mekem grow feeling for laek duim stret samting. If iumi lane for “heitim samting wea nogud, and lovem samting wea gud,” bae iumi strongim disison blo iumi for duim stret samting and avoidim olketa situation wea savve lead go lo sin. (Amos 5:15) Taem iumi insaed situation wea isi for temptim iumi wea iumi no expectim or no fit for avoidim, feeling for laek duim stret samting savve protectim iumi.

16. Hao nao olketa spiritual activity savve protectim iumi? (Lukim tu olketa piksa.)

¹⁶ Hao nao iumi savve mekem grow feeling for laek duim stret samting? Iumi shud busy for duim olketa spiritual activity. Taem iumi go lo olketa meeting or duim ministry, bae hem helpem iumi for no foldaon lo temptation for duim rong samting. Instead, hem mekem iumi for barava laek duim samting for mekem Jehovah hapi. (Matt. 28:​19, 20; Heb. 10:​24, 25) Taem iumi readim and studyim Word blo God and ting raonem, iumi strongim go moa feeling for lovem gud samting and heitim samting wea nogud. (Josh. 1:8; Ps. 1:​2, 3; 119:​97, 101) Remember, Jesus sei olsem lo olketa disaepol blo hem: “Gohed for . . . prea, mekem iufala no foldaon long eni samting wea traem iufala.” (Matt. 26:41) Taem iumi spendem staka taem for prea lo Dadi blo iumi lo heven, iumi bae kasem moa help from hem and datwan bae strongim disison blo iumi for mekem hem hapi.—Jas. 4:8.

GOHED FOR CAREFUL

17. Wat nao wanfala wik point blo Peter wea staka taem affectim hem?

¹⁷ Luk olsem, samfala wik point blo iumi hem isi for iumi barava lusim. Bat samfala, maet hem hard for iumi lusim. Tingim situation blo aposol Peter. Hem letem feeling for fraetem man mekem hem denyim Jesus thrifala taem. (Matt. 26:​69-75) Luk olsem Peter winim datfala wik point bikos hem no fraet for givim witness front lo Sanhedrin. (Acts 5:​27-29) Bat then, samfala year bihaen, “hem fraetem olketa wea circumcise,” so for lelebet taem hem stop for kaikai witim olketa Gentile Christian. (Gal. 2:​11, 12) So wei wea Peter fraetem man hem start bak moa. Luk olsem, hem no really lusim datfala feeling.

18. Wat nao savve happen lo iumi nomata iumi lusim finis samfala nogud wei blo iumi?

¹⁸ Maet samfala taem iumi olsem Peter tu. Hao? Maet wanfala wei blo iumi wea iumi tingse iumi lusim finis hem kam bak moa and temptim iumi. For example, wanfala brata sei: “Mi faet againstim wei for lukluk lo pornography for ten years and mi tingse mi winim nao problem blo mi. Bat really wei wea mi addict lo pornography hem stap yet, and taem chance hem kamap hem temptim mi moa.” Nomata olsem, hem no givap. Hem luksavve evriday bae hem need for waka hard for againstim datfala feeling, and maet hem mas duim datwan for full laef blo hem lo disfala system. Witim help blo waef blo hem and olketa elder lo kongregeson, hem duim moa samting for protectim hemseleva from pornography.

19. Wat nao iumi savve duim for againstim wik point blo iumi wea no isi for lusim?

¹⁹ Wat nao iumi savve duim for againstim wik point wea no isi for iumi lusim? Iumi mas followim kaonsel blo Jesus abaotem temptation: “Gohed for lukaot.” Nomata lo taem wea iu feel olsem iu strong, gohed avoidim eni situation wea savve lead go lo temptation. (1 Cor. 10:12) Gohed for duim samting wea helpem iu finis for winim datfala problem. Proverbs 28:14 sei: “Man wea evritaem lukaot bae hapi.”—2 Pet. 3:14.

GUD SAMTING IUMI KASEM TAEM IUMI PROTECTIM IUMISELEVA

20-21. (a) Wat nao olketa gud samting wea iumi kasem taem iumi gohed for protectim iumiseleva from temptation? (b) If iumi waka hard for againstim temptation, wat nao Jehovah bae duim for iumi? (2 Corinth 4:7)

²⁰ For sure, bae iumi kasem gud samting taem iumi gohed for protectim iumiseleva from temptation. Wei for duim sin “savve mekem man hapi for lelebet taem nomoa,” bat, wei for obeyim standard blo Jehovah savve mekem iumi barava hapi. (Heb. 11:25; Ps. 19:8) Diswan hem bikos Jehovah creatim iumi for live followim olketa wei blo hem. (Gen. 1:27) Dastawe iumi savve garem klin konsens and gohed duim samting wea bae helpem iumi kasem laef olowe.—1 Tim. 6:12; 2 Tim. 1:3; Jude 20, 21.

²¹ Hem tru, ‘maet body blo iumi no strong for duim wanem iumi laekem.’ Bat datwan no minim iumi no wei nao. Jehovah stanbae for givim iumi strong wea iumi needim. (Readim 2 Corinth 4:7.) Tingim, God bae givim strong wea winim wanem iumi garem. Hem responsibility blo iumiseleva for iusim normal strong blo iumi evriday for trae hard for protectim iumiseleva from temptation. If iumi duim datwan, iumi savve sure Jehovah bae ansarem prea blo iumi for givim iumi extra strong lo taem wea iumi needim. (1 Cor. 10:13) Yes, witim help blo Jehovah, iumi savve gohed careful for protectim iumiseleva from eni temptation.