Wat Nao Kingdom blo God Bae Accomplishim?

Ansa from Bible

Kingdom blo God bae replacem evri human government and hem bae rulim full earth. (Daniel 2:44; Revelation 16:14) Once datwan happen, Kingdom blo God bae . . .

• Aotem olketa wicked pipol, wea spoelem iumi evriwan bikos lo selfish wei blo olketa. “Bat wicked pipol bae finis from earth.”—Proverbs 2:22.

• Finisim evri war. “[God] finisim olketa war lo evri ples lo earth.”—Psalm 46:9.

• Mekem earth garem peace and pipol hapi. “Evriwan bae stap lo peace lo own grape planteison and fig tree blo olketa, and no eniwan bae mekem olketa fraet.”—Micah 4:4, Good News Translation.

• Mekem earth kamap paradaes. “Olketa desert wea drae bae hapi; olketa land wea no eniting savve grow lo hem bae hapi and fulap lo flaoa.”—Isaiah 35:1, Contemporary English Version.

• Provaedem miningful and enjoyable waka for evriwan. ‘And pipol blo God wea hem chusim bae barava enjoyim waka wea olketa duim lo hand blo olketa. Olketa bae no waka hard nating.’—Isaiah 65:21-23.

• Finisim sik. “And no eniwan wea stap lo datfala land bae sei: ‘Mi sik.’”—Isaiah 33:24.

• Mekem iumi strong and young bak moa. “Body blo hem bae strong winim taem wea hem young. Hem bae kasem bak strong wea hem garem taem hem young.”—Job 33:25.

• Mekem olketa wea dae for laef bak moa. “Evriwan wea stap insaed lo olketa memorial tomb bae herem voice blo [Jesus’] and laef bak.”—John 5:28, 29.