Hao, Eniwan Really Savve Hu Nao Raetem Bible?

Ansa from Bible

Staka pipol sei iumi no sure hu nao raetem Bible. Bat staka taem Bible talem klia hu nao Bible raeta. Samfala part start witim olketa phrase olsem “diswan nao hem toktok blo Nehemiah,” “diswan hem vision blo Isaiah,” and “diswan nao message wea kam from Jehovah for Joel.”—Nehemiah 1:1; Isaiah 1:1; Joel 1:1.

Most Bible raeta talem dat wat olketa raetem hem kam from Jehovah, datfala only tru God, and God nao gaedem olketa. Olketa profet wea raetem Hebrew Scriptures talem diswan moa than 300 taems: “Diswan nao wanem Jehovah talem.” (Amos 1:3; Micah 2:3; Nahum 1:12) Olketa nara raeta kasem message blo God thru lo olketa angel.—Zechariah 1:7, 9.

Samting olsem 40-fala man nao raetem Bible and hem tekem 1,600 years for raetem datwan. Samfala man olketa raetem winim wanfala buk lo Bible. Bible hem wanfala smol library wea garem 66 buk. Hem garem 39 buk lo Hebrew Scriptures, wea staka kolem lo Old Testament, and 27 buk lo Christian Greek Scriptures, wea olketa kolem lo Niu Testament.