Wat Nao Bible Talem Abaotem Free Will? Hao, God Nao Kontrolem Future blo Iu?
Ansa from Bible
God givim iumi free will, wea hem paoa for mekem disison instead for God or olketa narawan nao mekem disison for iumi. Lukim wat Bible teachim.
God creatim olketa man lo image blo hem. (Genesis 1:26) Iumi no olsem olketa animal wea duim samting wea God wakem olketa for duim, bat iumi olsem Creator blo iumi, lo wei wea iumi savve showim olketa quality olsem love and justice. And olsem Creator blo iumi, iumi garem free will.
Winim eni nara samting, iumi fit for savve lo future blo iumi. Bible encouragem iumi for “chusim laef . . . lo wei for lisin lo voice blo [God],” datwan minim iumi savve chus for obeyim olketa komand blo hem. (Deuteronomy 30:19, 20) If iumi no garem free will, wat Bible storyim hem no mek sense and even hem barava no fair. Instead for God forcem iumi for duim wat hem talem, hem sei: “Sapos iu obeyim olketa komandment blo mi! Then iu bae garem peace wea hem ran olsem river.”—Isaiah 48:18.
Success or failure lo laef no minim God nao kontrolem wat hem happen. If iumi laek for succeed lo wanfala samting, iumi mas waka hard. Bible sei: “Eni samting wea hand blo iu laek for duim, duim witim full strong blo iu.” (Ecclesiastes 9:10) Hem sei tu: “Olketa plan blo man wea waka hard bae succeed.”—Proverbs 21:5.
Free will hem spesol gift from God, bikos hem savve helpem iumi iusim datwan for lovem hem witim “full heart” blo iumi from iumi laek for duim datwan.—Matthew 22:37.
Hao, God nao kontrolem evriting?
Bible teachim dat God hem Olmaeti, datwan minim no eniwan garem paoa winim paoa blo hem. (Job 37:23; Isaiah 40:26) Bat, hem no iusim paoa blo hem for kontrolem evri samting. For example, Bible sei dat God ‘kontrolem hemseleva,’ so hem no kwiktaem panisim olketa blo Babylon, enemy blo pipol blo hem. (Isaiah 42:14) Semsem tu distaem, hem chus for no panisim pipol wea misiusim free will blo olketa for spoelem olketa narawan. Bat God bae no duim olsem for olowe.—Psalm 37:10, 11.