Wat Nao Origin blo Halloween?

Ansa from Bible

No enitaem Bible mentionim Halloween, wea hem wanfala holiday wea staka pipol celebratem lo October 31 each year. Bat, ancient origin and tradition blo Halloween hem conflict witim olketa Bible teaching.

Lo disfala article

• History and tradition blo Halloween

• Hao, hem important for savve lo heathen origin blo Halloween?

• Why nao olketa kolem lo Halloween?

History and tradition blo Halloween

• Samhain: The World Book Encyclopedia sei origin blo Halloween hem start lo “ancient pagan festival wea Celtic pipol celebratem winim 2,000 years ago. Celtic pipol bilivim dat olketa wea dae finis savve raraon between olketa wea laef lo datfala day. During Samhain, olketa wea laef savve visitim olketa wea dae.”—Lukim “Why Nao Olketa Kolem lo Halloween?”

• Halloween costume, candy, and trick or treat: According lo wanfala source, samfala Celtic pipol savve werem ghoulish costume mekem olketa spirit wea wakabaot raon “bae tingse olketa spirit tu olsem olketa” and no duim eniting for spoelem olketa. Olketa narawan offerem olketa sweets for mekem olketa spirit hia hapi lo olketa.a

  

  Lo Europe, between 500 C.E. and 1500 C.E. Catholic clergy adoptim heathen kastom blo pipol lo there and letem church member blo olketa for werem costume and go from haos tu haos and requestim olketa smol gift.

• Ghost, vampire, werewolf, witch, and zombi: For longtaem olketa samting hia connect witim olketa evil spirit. Wanfala buk Halloween Trivia refer lo olketa olsem “olketa supernatural monster,” and hem sei olketa creature hia hem “connect witim death, pipol wea dae or wei for fraetem dae.”

• Halloween pumpkin, or jack-o’-lantern: Lo Britain, between 500 C.E. and 1500 C.E. pipol savve “go from door tu door for askem kaikai and bae olketa prea for pipol wea dae,” and olketa savve holem “turnip wea olketa mekem hol lo hem for kamap lamp, candle wea stay insaed piksarem soul wea trap lo purgatory.” (Halloween—From Pagan Ritual to Party Night) Samfala source sei olketa iusim ollketa lantern hia hem for protectim olketa from evil spirit. Lo North America, during 1800’s, olketa iusim pumpkin for replacem turnip bikos pumkin hem staka and hem isi for katem and karvem hol lo hem.

Hao, hem important for savve lo heathen origin blo Halloween?

Yes. Nomata samfala pipol ting lo Halloween olsem hem samting for enjoyim nomoa, olketa practice wea associate witim hem againstim olketa Bible teaching. Halloween hem base lo olketa false biliv abaotem olketa wea dae and olketa invisible spirit, or demon.

Lukim wat olketa verse hia talem abaotem hao God ting lo olketa biiv wea join witim Halloween:

• “No eniwan lo iufala mas . . . askem help from olketa ghost or spirit, or kolem olketa wea dae finis.”—Deuteronomy 18:10-12, The Jerusalem Bible.

  Mining: God no acceptim eni samting man duim for contactim olketa wea dae finis or even for pretend olsem iu story witim olketa wea dae finis.

• “Olketa wea dae no savve lo eni samting.”—Ecclesiastes 9:5.

  Mining: From olketa wea dae no savve lo eni samting, olketa no savve communicate witim olketa wea laef.

• “[No] share witim olketa demon. Hem nating fitim for iufala drink lo kap blo Jehovah and lo kap blo olketa demon tu.”—1 Corinthians 10:20, 21, New International Version.

  Mining: Olketa wea laekem God for hapi lo olketa mas avoidim eni samting wea connect witim olketa demon.

• “Stand strong againstim olketa kleva trik blo Devil. Diswan hem bikos iumi insaed wanfala faet. . . againstim olketa wicked spirit.”—Ephesians 6:11, 12.

  Mining: Olketa Christian shud faet againstim olketa wicked spirit, no pretend for celebrate witim olketa.