Waswe, Iu Biliv lo Creationism?

Nomoa. Hem tru, Olketa Jehovah’s Witness bilivim dat God nao creatim evri samting. Bat mifala no agree witim idea blo creationism. Why nao olsem? Bikos staka idea blo olketa creationist hem difren from wat Bible talem. Tingim tufala example hia:

1. Hao long nao datfala sixfala day creation. Samfala creationist or pipol wea bilivim dat God nao creator, olketa sei sixfala day blo creation hem minim really 24-hour days. Bat datfala word “day” insaed lo Bible hem minim longfala taem.​—Genesis 2:4; Psalm 90:4.

2. Age blo earth. Samfala creationist sei earth hem tu-thri thousand years old nomoa. Bat Bible sei, earth and universe hem stap finis bifor sixfala day blo creation. (Genesis 1:1) From datfala reason, Olketa Jehovah’s Witness no againstim scientific research wea storyim wei wea earth maet stap for staka billion year finis.

Nomata Olketa Jehovah’s Witness biliv lo creation, mifala bae no againstim idea blo science. Mifala bilivim dat olketa tru samting wea science talem hem agree witim wat Bible talem.