Wat Nao Wild Animal wea Garem Sevenfala Hed wea Revelation Chapter 13 Storyim Hem Minim?
Ansa from Bible
Wild animal wea garem sevenfala hed wea Revelation 13:1 storyim, hem representim worldwide politikol system.
Hem garem authority, paoa, and wanfala throne, wea showim hem wanfala politikol entity.—Revelation 13:2.
Hem rul ovam “evri tribe and pipol and languis and nation,” so hem big winim wanfala singol national gavman.—Revelation 13:7.
Hem combinem features blo fofala wild animal wea profesi lo Daniel 7:2-8 story abaotem, wea hem luk olsem wanfala leopard, feet blo hem olsem bear, mouth blo hem olsem mouth blo lion, and hem garem tenfala horn. Olketa wild animal lo profesi blo Daniel hem olketa specific king, or olketa politikol kingdom, wea rul for changem olketa nara nation. (Daniel 7:17, 23) Dastawe, datfala wild animal lo Revelation chapter 13 hem representim evri politikol organization.
Hem “kamaot from sea,” wea minim, hem kam from olketa man wea no stedy wea olketa nao source blo olketa human gavman.—Revelation 13:1; Isaiah 17:12, 13.
Bible hem sei dat namba or nem blo datfala wild animal hem 666, hem “namba blo man.” (Revelation 13:17, 18) Datfala expression showim dat wild animal lo Revelation chapter 13 hem wanfala human entity, no spirit or olketa demon.
Even though olketa nation maet agree lo samfala samting, olketa garem wan tingting for maintainim authority blo olketa instead for stap anda rul blo Kingdom blo God. (Psalm 2:2) Lo Armageddon, olketa bae join tugeta for faet againstim army blo God wea Jesus nao leadim, bat lo disfala faet olketa nation bae distroe.—Revelation 16:14, 16; 19:19, 20.
“Tenfala horn and sevenfala hed”
Bible iusim samfala namba olsem symbol for samfala samting. For example, ten and seven hem representim samting wea complete. Key for understandim specific mining blo “tenfala horn and sevenfala hed” blo datfala wild animal lo Revelation chapter 13, hem for savve lo ‘image blo datfala wild animal’ wea Revelation storyim, wea kala blo hem braet red and hem garem sevenfala hed and tenfala horn. (Revelation 13:1, 14, 15; 17:3) Bible sei sevenfala hed blo disfala wild animal, wea kala blo hem red hem minim “sevenfala king,” or olketa gavman.—Revelation 17:9, 10.
Lo sem wei, sevenfala hed blo datfala wild animal lo Revelation 13:1 hem representim sevenfala gavman: olketa main politikol paoa hia nao rul thru aot lo history and olketa nao lead for againstim pipol blo God, olketa nao Egypt, Assyria, Babylon, Medo-Persia, Greece, Rome, and Anglo-America. If iumi conclude dat tenfala horn hem representim evri sovereign state, whether hem smol or hem big, then kraon wea stap lo each horn hem showim dat each nation rul lo semtaem witim olketa main politikol paoa lo datfala taem.