Wat Nao Kaming blo Christ Hem Minim?
Ansa from Bible
Staka verse lo Bible storyim hao datwan bae happen lo future taem Christ bae kam for judgem pipol lo earth.a For example, Matthew 25:31-33 sei:
“Taem Son blo man [Jesus Christ] hem kam lo glory blo hem, and evri angel witim hem, then hem bae sidaon lo nambawan throne blo hem. Evri nation bae hipap front lo hem, and hem bae separatem pipol lo tufala grup, olsem wanfala shepherd hem separatem olketa sheepsheep from olketa goat. And bae hem putim olketa sheepsheep lo raet saed blo hem, and olketa goat lo left saed blo hem.”
Disfala taem blo judgment bae hem part lo wanfala “bigfala trabol” wea winim eni trabol lo history bifor. Big trabol hia bae hem finis lo war lo Armageddon. (Matthew 24:21; Revelation 16:16) Olketa enemy blo Christ wea disfala illustration describem olsem olketa goat, “bae kasem panis for mas finis for olowe.” (2 Thessalonians 1:9; Revelation 19:11, 15) Bat, olketa faithful servant blo hem, olketa sheepsheep, bae garem chance for kasem “laef olowe.”—Matthew 25:46.
Wat taem nao Christ bae kam?
Jesus sei: “For savve lo datfala day and hour, no eniwan savve.” (Matthew 24:36, 42; 25:13) Bat hem storyim olketa samting wea pipol bae lukim wea hem “saen” wea showim taem wea hem bae kam.—Matthew 24:3, 7-14; Luke 21:10, 11.
Hao, Christ bae kam lo spirit body or physical body?
Jesus hem resurrect lo spirit body, so bae hem kam olsem wanfala spirit creature, no physical body. (1 Corinthians 15:45; 1 Peter 3:18) From diswan, lo day bifor Jesus dae hem talem olketa aposol blo hem: “Lelebet taem nomoa, pipol lo world bae no lukim mi moa.”—John 14:19.
Tingting wea no stret abaotem kaming blo Christ
Tingting wea no stret: Taem Bible sei pipol bae lukim Jesus “kam lo olketa cloud,” hem minim pipol bae lukim lo eye blo olketa.—Matthew 24:30.
Tru samting: Staka taem Bible savve iusim olketa cloud for minim samting wea hem haed. (Leviticus 16:2; Numbers 11:25; Deuteronomy 33:26) For example, God talem Moses: “Mi bae kam and tok kam lo iu from wanfala dark cloud.” (Exodus 19:9) Moses no literally lukim God. Lo sem wei tu, taem Christ “kam lo olketa cloud” pipol bae luksavve hem kam bat bae no literally lukim lo olketa eye blo olketa.
Tingting wea no stret: Datfala expression “evriwan bae lukim hem” wea Revelation 1:7 storyim abaotem kaming blo Christ, hem minim pipol bae literally lukim hem.
Tru samting: Olketa Greek word lo Bible wea olketa transleitim for “eye” and “lukim” samtaems hem savve minim man luksavve or minim wanfala samting instead for lukim lo literal eye.b (Matthew 13:15; Luke 19:42; Romans 15:21; Ephesians 1:18) Bible sei dat Jesus wea resurrect “hem nomoa . . . stap lo laet wea no eniwan savve go klosap, wea no eni man . . . savve lukim hem.” (1 Timothy 6:16) Dastawe, “evriwan bae lukim hem” taem pipol luksavve dat Jesus nao man wea God markem for judge.—Matthew 24:30.
Tingting wea no stret: Olketa toktok lo 2 John 7 showim dat Jesus bae kam lo physical body.
Tru samting: Datfala sem verse sei: “Staka man for laea stap lo disfala world wea no acceptim dat Jesus Christ hem bin kam olsem man.”
Lo taem blo aposol John, samfala denyim dat Jesus bin kam lo earth lo physical body. Pipol kolem grup hia Gnostics. John raetem second John 7 for againstim olketa false claim blo olketa.
a Nomata staka pipol iusim olketa term olsem “second kaming” or “second advent” for minim taem wea Christ hem kam, olketa term hia no stap insaed Bible.
b Lukim The New Thayer’s Greek-English Lexicon of the New Testament (1981), page 451 and 470.