Hao, Bible Teachim Reincarnation?
Ansa from Bible
Nomoa. Disfala word “reincarnation” or idea abaotem datwan, no even stap lo Bible. Biliv abaotem reincarnation hem base lo teaching wea sei soul no savve dae.a Bat, Bible teachim dat soul hem full person and hem savve dae. (Genesis 2:7, footnote; Ezekiel 18:4) Taem datfala person hem dae, hem no exist nao.—Genesis 3:19; Ecclesiastes 9:5, 6.
Wat nao difference lo reincarnation and resurrection?
Teaching lo Bible abaotem resurrection hem no base lo idea wea sei soul no savve dae. Lo resurrection, God bae iusim paoa blo hem for mekem pipol wea dae for laef bak moa. (Matthew 22:23, 29; Acts 24:15) Disfala resurrection givim iumi positive hope dat disfala earth bae hem paradaes moa and no enitaem bae pipol dae moa.—2 Peter 3:13; Revelation 21:3, 4.
Tingting wea no stret abaotem reincarnation and Bible
Tingting wea no stret: Bible sei profet Elijah hem born again and change lo John Baptaesa.
Tru samting: God sei: “Mi bae sendem Elijah, datfala profet,” and Jesus showim klia dat John Baptaesa nao fulfillim disfala profesi. (Malachi 4:5, 6; Matthew 11:13, 14) Bat, diswan no minim Elijah hem bin reincarnated and kamap John Baptaesa. John seleva talem dat hem no Elijah. (John 1:21) Bat, John duim olketa waka olsem Elijah duim, wea hem nao for talem message blo God for pipol mas repent. (1 Kings 18:36, 37; Matthew 3:1) Bible sei tu John hem “strong and maeti olsem profet Elijah.”—Luke 1:13-17, Good News Translation.
Tingting wea no stret: Bible refer lo reincarnation for minim man hem “born again.”
Tru samting: Bible story abaotem born again lo spiritual wei, wea minim man duim diswan taem hem still laef yet. (John 1:12, 13) For born again hem no consequence blo olketa past mistek bat hem wanfala blessing from God, wea mekem olketa wea kasem datwan for garem nambawan hope for future.—John 3:3; 1 Peter 1:3, 4.
a Biliv abaotem soul wea no savve dae and reincarnation hem start kam lo Babylon. Gogo, olketa Indian philosopher startim biliv hia lo Karma. According lo disfala buk Britannica Encyclopedia of World Religions, Karma hem “law blo cause and effect, wea minim wat wanfala man duim distaem savve affectim next laef blo hem afta hem dae.”—Page 913.