Hao, Shroud blo Turin Nao Olketa Iusim for Pasolem lo Body blo Jesus?

Ansa from Bible

Bible no tok abaotem kaleko wea olketa kolem lo Shroud blo Turin. Staka pipol ting hem nao linen kaleko wea olketa pasolem lo body blo Jesus Christ. From datfala biliv, olketa church blo Christendom ting datfala kaleko hem barava holy samting. Distaem datfala shroud hem stap nao insaed wanfala high-tech protective casing lo wanfala cathedral lo Turin, Italy.

Hao, olketa Bible account sapotim datfala idea dat Shroud blo Turin hem tru? Nomoa.

Tingim thrifala samting abaotem datfala shroud wea difren from wat Bible talem.

1. Datfala shroud hem wanfala singol kaleko wea long blo hem 442 by 113 centimeters (14 ft 6 in. by 3 ft 8 in.) plus 8-centimeter (3 in.) wea olketa soengim saed lo hem.

   Wat nao Bible talem: Olketa pasolem dead body blo Jesus no lo wanfala kaleko nomoa, bat lo staka kaleko. Olketa kavarem hed blo hem lo wanfala separate kaleko. Afta Jesus resurrect, wanfala lo olketa aposol blo hem kam lo datfala emti tomb and “lukim olketa linen kaleko nomoa lo there.” Bible sei moa: “Kaleko wea olketa kavarem lo hed blo Jesus, hem no stap witim olketa nara kaleko hia bat samwan hem foldim and putim separate.”​—John 20:​6, 7.

2. Datfala shroud garem olketa stain wea pipol ting hem stain lo blood from dead body wea olketa no wasim.

   Wat nao Bible talem: Taem Jesus dae, olketa disaepol blo hem redyim body blo hem “followim kastom blo olketa Jew.” (John 19:39-​42) Kastom blo olketa hem for wasim dead body and rabem oil and olketa spice lo body bifor burial. (Matthew 26:12; Acts 9:​37) Dastawe, olketa disaepol blo Jesus wasim body blo hem bifor olketa pasolem lo kaleko.

3. Encyclopædia Britannica sei datfala shroud garem piksa blo wanfala man “wea leidaon stret followim haf lo kaleko hia and nara haf olketa iusim for kavarem lo hed and body blo hem.”

   Wat nao Bible talem: Olketa disaepol blo Jesus story abaotem dae blo hem, emti tomb blo hem, and olketa woman wea lukim “olketa angel wea sei Jesus hem laef bak nao.” (Luke 24:15-​24) If datfala shroud stap lo tomb blo Jesus, olketa disaepol blo hem bae story abaotem and storyim tu piksa wea stap lo hem. Bat, Bible no talem eniting abaotem diswan.

Hao, hem stret for mekhae lo datfala shroud?

Nomoa. Even if datwan hem tru, for mekhae lo diswan hem still rong. Lukim olketa Bible principle wea explainim why hem rong.

1. Hem no important for mekhae lo hem. Jesus sei olsem: “God hem wanfala Spirit, and olketa wea worshipim hem mas worship followim holy spirit and followim truth.” (John 4:​24) Tru worship hem no join witim olketa religious idol or samting pipol wea honorim olsem icon.

2. Bible hem againstim. Ten Komandment stopem wei for worshipim idol. (Deuteronomy 5:​6-​10) Bihaen, Bible givim moa disfala komand lo olketa Christian: “Iufala mas stap klia lo olketa idol.” (1 John 5:​21) Samfala sei datfala shroud hem no wanfala idol bat hem wanfala icon, or symbol, lo religious faith blo olketa. Bat, wanfala icon savve kamap idol lo person wea mekhae lo hem.a Dastawe, person wea laek for mekem God hapi bae no mekhae or givim honor lo eni samting, includim datfala shroud.