Wat Nao Original Sin?

Ansa from Bible

Adam and Eve nao tufala first human wea sin. Taem tufala disobeyim God and kaikaim “frut blo datfala tree blo savve lo gud samting and nogud samting,” tufala commitim nao wat staka pipol kolem lo original sin.a (Genesis 2:16, 17; 3:6; Romans 5:19) Adam and Eve no allowed for kaikaim frut blo datfala tree bikos hem representim authority, or raet blo God for disaedem wat hem stret and no stret for olketa man. Taem Adam and Eve kaikaim frut blo datfala tree, tufala chus for disaedem seleva wat nao hem stret and rong. Taem tufala duim diswan, tufala rejectim authority blo God.

• Hao nao “original sin” affectim Adam and Eve?

• Hao nao datfala “original sin” affectim iumi?

• Hao, iumi savve free from olketa nogud samting wea kamaot from datfala “original sin”?

• Tingting wea no stret abaotem “original sin”

Hao nao “original sin” affectim Adam and Eve?

From Adam and Eve sin, tufala olo and gogo tufala dae. Tufala spoelem frenship blo tufala witim God and lusim chance for laef olowe witim perfect health.—Genesis 3:19.

Hao nao datfala “original sin” affectim iumi?

Adam and Eve pasim sin lo evri pikinini wea born kam lo laen blo tufala. Diswan hem semsem tu olsem dadi or mami wea pasim sik lo olketa pikinini blo tufala. (Romans 5:12) So evri human born “sin,”b wea minim dat iumi born imperfect and hem isi for duim samting wea rong.—Psalm 51:5; Ephesians 2:3.

From iumi inheritim sin, or imperfection, iumi savve sik, kamap olo, and dae. (Romans 6:23) Iumi safa tu from consequence blo olketa rong samting iumi duim and wea olketa narawan duim.—Ecclesiastes 8:9; James 3:2.

Hao iumi savve free from olketa nogud samting wea kamaot from datfala “original sin”?

Yes. Bible sei dat Jesus dae olsem “wanfala sakrifaes for aotem sin blo iumi.” (1 John 4:10, footnote) Sakrifaes blo Jesus savve mekem iumi free from effect blo sin wea iumi inheritim and givim iumi chance for kasem wat Adam and Eve lusim wea hem chance for laef olowe witim perfect health.—John 3:16.c

Tingting wea no stret abaotem “original sin”

Tingting wea no stret: Original sin permanently separatem iumi from God.

Tru samting: God no blamem iumi for wat Adam and Eve duim. Hem understandim dat iumi no perfect, and hem no expectim iumi for duim samting wea iumi no fit for duim. (Psalm 103:14) Nomata iumi safa from sin wea iumi inheritim, iumi garem opportunity and privilege for garem klos frenship witim God.—Proverbs 3:32.

Tingting wea no stret: Taem man baptaes hem free from original sin, dastawe olketa baby mas baptaes.

Tru samting: Nomata baptism hem important step for kasem salvation, for garem faith lo sakrifaes blo Jesus nomoa savve mekem man klin from sin blo hem. (1 Peter 3:21; 1 John 1:7) Bikos tru faith hem base lo knowledge, hem no possible for baby garem faith. Bible no sapotim teaching for baptaesim baby. Pruv lo diswan hem lo taem blo olketa first Christian. Olketa baptaesim, no olketa baby, bat “olketa man and woman” wea biliv wea garem faith lo Word blo God.—Acts 2:41; 8:12.

Tingting wea no stret: God hem cursim olketa woman bikos Eve nao hem first wan for kaikaim frut wea God stopem.

Tru samting: Instead for cursim olketa woman, God cursim “datfala snek blo bifor, wea nem blo hem Devil and Satan,” wea trikim Eve for sin. (Revelation 12:9; Genesis 3:14) And tu, God putim primary responsibility for datfala original sin lo Adam, no lo waef blo hem.—Romans 5:12.

Why nao God sei dat Adam bae kontrolem waef blo hem? (Genesis 3:16) Taem God talem disfala statement, hem no minim God acceptim diskaen behavior. Bat hem talem nogud samting wea bae kamaot from sin. God expectim man for lovem and honorim waef blo hem, and showim deep respect for olketa woman in general.—Ephesians 5:25; 1 Peter 3:7.

Tingting wea no stret: Original sin hem sexual intercourse.

Tru samting: Original sin hem no sexual intercourse bikos lo olketa reason hia:

• God komandim Adam for no kaikaim frut blo tree blo savve lo gud samting and nogud samting. God talem diswan taem Adam stap seleva, hem no garem waef yet.—Genesis 2:17, 18.

• God talem Adam and Eve for “garem pikinini, kamap staka.” (Genesis 1:28) Hem bae karangge samting if God panisim first couple from tufala duim wat hem bin komandim tufala for duim.

• Adam and Eve no sin lo semtaem, Eve sin first and hasband blo hem bihaen.—Genesis 3:6.

• Bible appruvim sexual relation between wanfala hasband and waef blo hem.—Proverbs 5:18, 19; 1 Corinthians 7:3.