Putim Olketa lo Prison Bikos lo Faith blo Olketa—Singapore
Eitfala young man wea Jehovah’s Witness stap lo prison distaem lo Singapore, bikos olketa hia conscientious objectors lo military service. Faevfala lo olketa duim moa second prison term bikos olketa refuse for changem disison blo olketa bihaen olketa duim first prison term blo olketa. Olketa young man hia hard for iusim law lo Singapore for helpem olketa, bikos gavman enforcim law wea sei evri male mas duim military service, and gavman no recognizim rights blo conscientious objectors.
Taem wanfala young man hem kasem 18 years old, law sei hem mas joinim Singapore military. If hem refuse bikos konsens blo hem no allowim, hem bae stap lo military prison for ap tu 12 months. Taem prison term blo hem finis, olketa releasem hem and lo semtaem hem kasem order for werem military uniform and participate lo military training. If hem refuse moa, army bae kotem hem second taem and hem bae kasem sentence blo ap tu 18 months. So, olketa young Witness man wea conscientious objector lo military service bae kasem tufala prison terms, wan afta the other, for total blo ap tu 30 months lo prison.
Singapore Refuse for Followim Ruling blo UN
United Nations hem appeal lo olketa member States for “recognizim dat conscientious objection for military service, olketa shud ting lo datwan olsem wei for samwan exercisim rights for freedom of thought, conscience and religion, wea Universal Declaration of Human Rights hem recognizim.” Nomata Singapore hem wanfala member State since 1965, hem disagree witim United Nations lo disfala issue. Lo leta dated April 24, 2002, wanfala gavman official blo Singapore, hem talem UN Commission on Human Rights, dat “if biliv or akson blo eniwan hem againstim [right blo gavman for protectim kantri], then right blo gavman for preservem national security nao mas kam first.” Datfala bigman hem tok stret olsem, “Mifala no acceptim conscientious objection for military service wea olketa nara nation recognizim.”
Taem Laen
July 18, 2025
Total blo eitfala Jehovah’s Witness nao stap lo prison olsem conscientious objector.
April 24, 2002
Bigman blo gavman confirmim dat Singapore hem no recognizim right for conscientious objection.
February 1995
Oppression and arrest blo olketa citizen lo Singapore wea Jehovah’s Witness hem increase.
August 8, 1994
High Court of Singapore dismisim appeal blo Olketa Witness.
January 12, 1972
Gavman blo Singapore hem cancelim registration blo Olketa Jehovah’s Witness.