Putim Olketa lo Prison Bikos lo Faith blo Olketa—South Korea
Lo October 26, 2020, for first taem lo history, olketa conscientious objector lo military service lo South Korea savve chus for duim alternative civilian service. Nomata olsem, olketa human rights organization sei system wea South Korea followim for provaedem alternative service hem olsem panisment and hem discriminatim pipol, bikos lo length blo hem and hem strict tumas. Alternative service hia hem 36-months, wea diswan hem dabol lo length blo active military service, and hem againstim olketa international standard. According lo olketa standards hia, alternative service shud no winim wan and a haf taems length blo active military service, unless gud reason hem stap for datwan. Tu-thri South Korean Witness man disaed for no acceptim disfala alternative service program. Samfala filem complaints lo olketa kot. Lo May 30, 2024, Constitutional Court blo South Korea dismisim evri complaints blo alternative service lo wanfala 5-4 disison. Nomata olsem, kot hia haelaetim dat alternative service hia hem olsem panisment, olketa sei: “Kaen alternative service hia hem olsem nara form of panisment wea violatim freedom of conscience blo conscientious objectors.”
Woo-jin Byeon, wanfala marit man wea 29 years old, hem first conscientious objector lo South Korea wea olketa putim hem lo prison bikos hem refuse for duim alternative service. Witim respect, hem mekem wanfala personal disison for declinim alternative service. Nomata hem sei hem willing for acceptim eni alternative service wea no olsem panisment if datwan hem available, lo July 24, 2024, kot sentencem hem for wan year and six months lo prison.
Kasem distaem, 14-fala Witness man nao refuse for duim alternative service. Wanfala nao hem Mr. Byeon, and nara 11-fala kot case blo olketa hem still continue. Depend lo outcome blo case blo olketa, olketa tu feisim criminal panisment and for prison. Bat, majority blo conscientious objectors disaed for duim alternative service nomata hem olsem panisment.
Taem Laen
July 24, 2024
Woo-jin Byeon kasem sentence for stap lo prison for 18 months bikos hem refuse for duim alternative service.
November 10, 2022
Afta Woo-jin Byeon receivim notice for go serve lo army, hem sendem wanfala leta go lo Military Manpower Administration for sei dat hem refuse for duim alternative service bikos lo konsens blo hem.
October 26, 2020
Gavman blo South Korea startim alternative service for conscientious objectors.
November 1, 2018
Supreme Court blo South Korea disaed lo wanfala 9-4 disison dat conscientious objection hem no wanfala crime.
June 28, 2018
Constitutional Court blo South Korea declarim dat wanfala sekson lo Military Service Act hem unconstitutional, bikos hem no provaedem alternative service for conscientious objectors.
October 18, 2016
Gwangju Appellate Court givim disison dat thrifala conscientious objectors wea appealim case blo olketa, olketa no guilty, wea diswan hem first taem for datwan happen.
August 30, 2011
Constitutional Court upholdim moa law for panisim olketa conscientious objector.
August 26, 2004
Constitutional Court upholdim disison dat law for panisim olketa conscientious objector hem followim constitution.
1975
Gavman putim law wea requirem evri male citizen lo kantri for mas serve lo army.
1973
Gavman startim wei for torturem olketa Witness lo prison wea continue kasem mid-1990’s.
1953
Gavman putim lo prison first Witness wea hem conscientious objector.