Tingting Bilong Bible

Bae Disaster Long Space Destroyem World Bilong Iumi?

LONG March 12, 1998, olketa niuspepa, TV, and Internet grup raonem world storyim danger wea klosap happen: “Wanfala asteroid wea hem 1.5 kilometer waed hem followim road wea bae just missim Earth nomoa.” Olketa scientist and workman kickraon for faendaot sapos diswan hem really danger. No longtaem bihaen, olketa wea studyim space say bae hem kanduit for bangim earth.

But, midol long disfala fraet, olketa luksavvy long wanfala niu samting. “Barava interesting samting abaotem giaman warning hia hem hao, nomata story hem savvy mekem man fraet tumas, planti pipol nating sapraes,” U. S. News & World Report hem say. “Idea for say iumi long earth mas lukaot gud for kaen ston olsem long space—and plan for deal withim—here krangge tumas ten year bifor, but distaem olketa scientist and bigman bilong politik tu ting long danger hia, nomata hem small nomoa, olsem really danger.”

Samfala wea studyim star believe hao samting olsem 2,000 bigfala ston wea fit for mekem disaster long full world olketa go ahed for akrosim or kam klosap long earth. Nomata sapos wanfala small wan long olketa nomoa hem bangim earth, olketa savvyman say, bursta wea bae kamap bae hem sem olsem strong bilong staka nuclear samting wea bursta wantaem. Samting wea bae kamaot from diswan bae spoelem full earth and olketa man and animal tu.

Wanfala tingting wea olketa idea olsem savvy forgetim nao hem bilong Creator bilong universe, Jehovah God. (Psalm 8:3; Proverbs 8:27) Bible hem talem klia will and purpose bilong hem for earth and man. Waswe, bae hem letem bigfala disaster from space for spoelem world bilong iumi?

Universe Wea God Kontrolem

From Jehovah nao hem Olmaeti Creator bilong universe, hem stret for iumi tingim hao hem garem full kontrol long gogo bilong olketa samting long universe. Wise King Solomon say Jehovah hem “workim heven strong withim savvy bilong hem.” (Proverbs 3:19) Profet Jeremiah talem hao God nao “dat Wan wea workim heven followim savvy bilong hem.”—Jeremiah 51:15.

Jehovah startim olketa rul and paoa wea mekem olketa star, planet, komet, and olketa asteroid for muv. (Isaiah 40:26) But, luk olsem hem letem olketa star and planet for followim seleva cycle bilong olketa for olsem born, laef, and dae. Insaed diswan hem samfala maeti banga long olketa samting long space. Wanfala example wea kamap no longfala taem go nomoa hem banga wea happen long July 1994, wea samfala pisis bilong komet Shoemaker-Levy 9 bangim planet Jupiter.

Pruf stap long graon wea showimaot hao olketa maeti ston from space bangim earth bifor taem bilong man. So bae samting olsem savvy happen moa taem man stap? Olsem example, wanem savvy happen sapos wanfala asteroid wea hem wan mile waed hem bangim earth? Man for studyim star Jack Hills hem say bae banga olsem garem paoa wea staka million taem winim bomb wea spoelem Hiroshima. Sapos hem banga long sea, tidal wave bae kasem staka ples. Hills hem say: “Long ples wea bigfala taon stap bifor, wata nomoa bae stap.” But worse tingting nao hem way wea no eni man bae stap. Waswe, kaen story olsem fitim tu will bilong Creator for earth? Bible showim hao Jehovah garem spesel work for disfala planet.

Earth Bilong Iumi —Stap for Wanfala Reason

Abaotem planet bilong iumi, man wea raetem psalm hem say: “Heven, hem bilong Jehovah, but hem givim earth long olketa son bilong man.” (Psalm 115:16) Isaiah storyim Jehovah olsem “Wan wea Workim earth . . . , Hem nao dat Wan wea mekem hem stap strong, wea no workim for stap nating, wea workim for pipol stap long hem.” (Isaiah 45:18) Earth hem samting wea Jehovah givim long olketa man. And from Creator ting for givim laef olowe for olketa man wea followim God, earth bae stap for olowe olsem hom bilong olketa. Psalm 104:5 strongim diswan: “[Jehovah] workim earth long ples bilong hem; no eni samting savvy mekem hem seksek long enitaem, or for olowe.”

Hem tru, God letem samfala big disaster for kasem earth bilong iumi, wea mekem staka pipol dae. Samfala long olketa trabel hia—olsem olketa war, hangre, and bigfala sik—man seleva nao kosim from selfish, krangge, and raf fasin bilong hem. (Ecclesiastes 8:9) Nara samting—olsem earthquake, volkeno, flood, and cyclone—kamap seleva, wea man no mas meanim gud. Long way wea different from firstfala purpose bilong God, olketa man no perfect nao; olketa sin. From diswan, man wanwan mas no ting God bae protectim hem from olketa disaster.

But, no enitaem Jehovah letem way wea man stap long earth for kasem really danger. Start long creation bilong man, history showimaot hao no eni disaster kamap seleva for putim laef bilong evri man long earth insaed danger.a

Olketa Man Bae Sure for Stap Laef

Start long taem God workim first man and woman, Hem garem purpose for man “fulimap earth and lukaftarem.” (Genesis 1:28; 9:1) Hem promis finis hao “olketa raeteous wan seleva bae kasem earth, and olketa bae stap olowe long hem.” (Psalm 37:9, 11, 22, 29) Abaotem olketa promis bilong hem, Jehovah strongim olsem: “Kaonsel bilong mi bae stap, and evri samting wea mi wantem mi bae duim.”—Isaiah 46:10; 55:11; Psalm 135:6.

Bible hem nating say bae no eni small banga kasem earth from samting long space. But, iumi savvy sure Jehovah bae no letem eni disaster from space for spoelem purpose bilong hem for earth and olketa man. Long promis bilong Bible, iumi sure olketa man bae fit for stap long planet bilong iumi for olowe—yes, hem hom bilong man for olowe!—Ecclesiastes 1:4; 2 Peter 3:13.

[Footnote]