Samfala Ask Olsem

Waswe, Bae Earth Stap for Olowe?

No eni disaster bae spoelem Earth bilong iumi. Hao nao iumi savve long datwan? Bikos God promisim hao earth “bae hem stap for olowe.” (Psalm 104:5) Bible talem hao nomata “olketa genereson kamap and olketa genereson go, earth bae stap for olowe.”​—Ecclesiastes 1:4, New International Version.

Tufala word long Hebrew languis wea olketa iusim long Psalm 104:5, showimaot hao earth bae gohed for stap. Tufala word hia nao ʽoh·lamʹ wea minim “no savve finis” and ʽadh wea minim “stap for olowe.” And ʽoh·lamʹ olketa savve transleitim, “plande year” or “no savve change.” Harkavy Students’ Hebrew and Chaldee Dictionary talem hao datfala word ʽadh hem minim “taem, no savve finis, stap for olowe.” Tufala Hebrew word hia mekem iumi for barava savve hao disfala earth bae stap for olowe. Tingim thrifala nara samting wea Bible storyim wea mekem iumi bilivim hao earth bae stap for olowe.

Firstfala samting, God wakem disfala earth no for stap nating, bat for wanfala paradaes wea garem staka tree, grass and flaoa for olketa man stap long hem. Isaiah 45:18 storyim hao Jehovah wea “wakem skae, hem trufala God, and Wan wea sheipim and wakem earth, Datwan wea wakem for stap olowe, wea no wakem earth for stap nating, bat for pipol stap long hem.”

Mek-tu samting, God promisim hao olketa man wea obeyim hem bae stap olowe long disfala earth and no eni samting bae spoelem olketa. Micah 4:4 talem disfala promis: “Olketa bae sidaon andanit long grape tree and andanit long fig tree bilong olketa seleva, and no eniwan bae mekem olketa fraet; from Jehovah wea hem leader bilong olketa angel nao talem.” So for fitim wanem God planim, earth mas stap olsem ples for olketa man for olowe, sapos nomoa olketa promis bilong God no tru nao.​—Psalm 119:90; Isaiah 55:11; 1 John 2:​17.

Mek-thri samting, God givim earth for olketa man lukaftarem. Bible talem olsem: “Heven hem bilong Jehovah, bat hem givim earth for olketa man.” (Psalm 115:16) Waswe, hem stret long tingting bilong iu, sapos gudfala dadi givim naesfala present long pikinini bilong hem, then bihaen hem spoelem moa datfala present? Barava nomoa nao! Olsem tu, Jehovah bae no duim eni samting for spoelem earth and pipol wea stap long hem, bikos “God hem love.”​—1 John 4:8.

Jesus Christ talem disfala tru toktok abaotem Dadi bilong hem: “Toktok bilong iu nao tru.” (John 17:17) And God wea no savve laea hem talem disfala promis: “Olketa gudfala pipol nomoa bae stap long earth and olketa bae stap long hem for olowe.”​—Psalm 37:29; Titus 1:⁠2.

[Piksa Credit Line long page 18]

Globe: Based on NASA photo