Why Music Affectim Iumi
MUSIC and languis hem bilong man nomoa. Hem hard for piksarem wanfala world wea no garem music or languis. “Man evriwea iusim languis and music,” disfala buk The Musical Mind hem talem. Tufala join witim need bilong iumi for sharem feeling and idea. So iumi savve sei, olsem languis, taem music hem “tok,” feeling bilong iumi hem “lisin.”
Why and hao nao music hem tok long feeling bilong iumi? For ansarem diswan, iumi need for tingim: (1) saond bilong music and wei wea olketa saond hia affectim brain bilong iumi; (2) kaen feeling bilong iumi and kaen living iumi kam from, wea affectim feeling wea music givim long iumi; and (3) toktok, wea savve affectim tu feeling iumi kasem from music.
Saond Bilong Music
Olketa savve kolem olketa difren saed bilong music “olketa saond bilong music.” Insaed olketa saond hia hem tone, or krae bilong olketa difren instrument. Olsem example, pipol sei datfala French horn hem “garem saond bilong warning,” or hevi, and saond bilong hem difren from “praodfala” trumpet. Nomata tufala semkaen instrument wea man blowim, each wan difren long kaen saond hem givim. Diswan nao samting wea givim evri instrument “krae” bilong hem. Pipol wea raetem music iusim olketa difren “krae” hia for wakem olketa saond wea muvim feeling bilong olketa wea herem.
Maet first wan wea iumi savve long hem nao hem beat—maet from taem iumi herem heartbeat bilong mami bilong iumi insaed bele. Olketa sei wei wea man kwiktaem laekem beat bilong music hem from heartbeat or breathing bilong hem wea hem evritaem herem bat no tingim. Dastawe, staka pipol laekem music wea garem 70 go kasem 100 beat insaed wan minute—average namba bilong heartbeat bilong wanfala healthy full-grown man. Hem nao idea wea disfala buk Perceptual and Motor Skills hem talem.
Olketa staka difren kaen music wea savve kamaot from olketa saond hia showaot long staka difren instrument and olketa difren saond and tune olketa givim. Sorre krae bilong wanfala bassoon long midol part bilong concerto for bassoon, wea Mozart raetem, savve affectim deep feeling bilong man. Saond bilong Japanese shakuhachi flute savve touchim heart. Krae bilong tenor saxophone savve mekem blues music stap long mind bilong staka pipol. Oompah saond bilong tuba long wanfala German band savve givim hapi feeling. Hapi saond bilong violin wea pleim Strauss waltz mekem planti wea herem for laek for dance. Hem affectim pipol olsem from “music hem wanfala languis wea evri man savve herem,” Clive E. Robbins, from Nordoff-Robbins Music Therapy Center, long New York, hem talem.
Harmony, Discord, and Melody
Hem isi for lisin long harmony, bat discord givimaot raf saond. Bat waswe, iu savve hao olketa part hia join gud tugeta insaed samfala music? Wanfala music wea here olsem hem harmony olowe maet garem moa discord long hem winim wanem iu tingim. Wei wea harmony and discord go ahed for change insaed wanfala music muvim feeling bilong man for kamap strong. Disfala naes wei for mekem feeling kamap hem comfortim man bat sapos discord saond nomoa kamap evritaem, bae man heitim and kwiktaem les for herem—olsem taem iumi herem samwan skrasem blakboard. Long narasaed, sapos music hem harmony olowe, hem savve boring.
Melody hem wei for joinim tugeta samfala music note for wakem naesfala tune. Olsem samfala bigman talem, disfala word hem kam from Greek word meʹlos, wea minim “song.” Olketa dictionary minim melody olsem swit music, eni saond wea here swit.
Bat, hem no just wei for joinim samfala note wea mekem wanfala swit melody. Olsem example, longfala stop wea kamap staka taem midolwan olketa difren note maet givimaot strongfala melody bat no swit wan. Long narasaed, olketa note wea join long smooth wei witim lelebet stop savve givimaot naesfala melody. Difren wei for arrangem olketa note and ples for stop savve mekem wanfala melody sorre wan or hapi wan. Olsem hem tru for harmony, wanfala melody hem wakem own sorre and hapi feeling taem olketa note go ap and daon, hae and low saond bilong tune hem affectim feeling bilong iumi.
Taem evriting hia join tugeta, strongfala samting kamap wea savve muvim or comfortim feeling bilong iumi. Diswan hem from olketa difren wei wea brain bilong iumi hem kasem and minim music.
Music and Brain
Samfala sei toktok and wei for reason hem samting bilong left saed bilong brain, and music hem samting bilong raet saed bilong brain, wea deal witim olketa feeling. Nomata diswan hem tru or nomoa, hem klia hao music hem kwiktaem muvim feeling bilong olketa wea herem. Disfala buk Perceptual and Motor Skills minim diswan olsem: “Music garem paoa for kwiktaem barava changem feeling. Samting wea wanfala buk bae needim planti sentence for minim . . . , music savve duim witim tu-thri music note nomoa.”
Abaotem wei wea eye and ear waka tugeta and affectim man, disfala buk Music and the Mind hem talem disfala interesting samting: “Wei for herem samting hem muvim feeling winim wei for lukim samting. . . . Man wea lukim wanfala animal wea garekil or olketa man safa wea no krae bae no mas feel sorre. Bat taem olketa singaot big, bae hem barava muvim feeling bilong man wea lukim.”
Music, Toktok Bilong Song, and Iu
Wanfala sekson bilong savveman sei wanfala music bae affectim evriwan wea herem long sem wei. Bat, narafala sekson sei wei wea wanfala music affectim man hem depend long feeling bilong man long datfala taem or samting wea kasem hem bifor. Wanfala example bilong diswan maet hem samwan wea lusim wanfala wea hem lovem long dae and hem herem wanfala song, maet long ples bilong worship. Datfala song maet mekem man tingim bak dat wan wea dae and mekem hem feel sorre and krae tu. Olketa narawan wea no kasem diswan olketa singim datfala sem song witim hapi heart.
And tu, tingim tufala instrument, French horn and trumpet wea iumi storyim finis. Iu maet no agree hao saond bilong French horn hem saond bilong warning. Long iu maet hem here fani or hapi, long narasaed trumpet maet saond long iu olsem hem garem sorre feeling. Iumi wanwan garem insaed long iumi wanfala well wea fulap witim olketa feeling wea music savve bringim ap—dastawe, music affectim iumi long difren wei.
Music help for joinim toktok or idea witim feeling. Dastawe nao olketa television or radio advertisement garem music. Planti taem toktok bilong hem no mas mek sense. Bat, sapos olketa pleim witim music wea fitim, bae datfala advertisement affectim feeling bilong pipol wea herem. Hem barava tru hao goal bilong staka advertising hem for switim feeling bilong pipol winim wei for olketa iusim stretfala tingting!
Nomata advertising maet spoelem pipol long saed long selen, paoa bilong toktok bilong music and saond bilong hem garem nara moa serious wei wea hem spoelem pipol. Disfala buk Journal of Youth and Adolescence sei maet thru long toktok bilong song wea olketa pleim moa and moa, olketa wea raetem song teachim olketa young wan for no acceptim idea bilong narawan and for “strong long wanem iu bilivim.” Olsem nara buk talem, olketa message bilong “olketa nogud rap song . . . , wea moa klia winim olketa bilong hevi metal,” savve go deep insaed long feeling bilong man wea herem and mekem hem againstim nara pipol.
Waswe, man savve stap klia from olketa nogud wei olsem sapos hem just lisin long music bat no long toktok? Hem tru, planti sei hem hard for savve long toktok bilong hevi metal and rap music. Tru samting nao, toktok hem no klia from laod saond bilong music. Nomata wanem, message stap long strongfala beat and sem tune wea kamap insaed moa and moa!
Long wanem wei? Samfala nem bilong song seleva savve talem planti samting. And tu, kaen music seleva hem planti taem olsem message. Wanem message? Wanfala buk for young pipol hem sei: “Luk olsem hem message bilong paoa, olketa drug, and win saed long sex.” Narawan sei: “Main theme . . . hem bighed fasin, raf fasin, laekem samting olsem drug and alcohol, nogud sex, barava olabaot fasin, and Satan Worship.”
Nomata samfala young wan maet agree diswan hem tru, olketa sei hem no spoelem olketa. Olketa strong for sei music hem helpem olketa bikos hem helpem olketa ‘savve long olketa seleva.’ Waswe, diswan tru? Datfala buk Journal of Youth and Adolescence hem raet: “Kros, wei for againstim samting, and paoa wea samfala boy laekem insaed olketa hevi metal music hem barava switim olketa boy wea no kasem gud result long skul wea evritaem kasem toktok for kamap moabeta.” Then hem sei moa: “Samting wea no fitim or wea mekem man konfius nao hem hao young pipol markem olketa seleva witim samting wea pablik, wea evri pipol sharem. Winim wei for aftarem spesol experience wea fitim olketa seleva, olketa young wan aftarem experience wea olketa recording company wakem for mekem selen.” Hem olsem difren man nao talem olketa young wan hia wanem for tingim and hao for feel.
Letem iumi lukim olketa rok concert. Hao nao olketa affectim pipol wea go lukim? Disfala buk Music and the Mind hem ansa: “No eni daot stap hao, thru long wei for pullim feeling bilong crowd and for mekem diswan happen long evriwan tugeta and no olsem man wanwan, music barava savve spoelem fasin bilong man for luksavve, and for followim feeling bilong datfala taem, wea hem wei bilong crowd.” Wild fasin bilong pipol long olketa rok concert hem pruvim disfala toktok.
So, for stap klia from wei for spoelem mind and heart, iumi mas chus gud long olketa music iumi herem. Hao nao iumi savve duim diswan? Nextfala article bae ansarem disfala kwestin.
[Piksa long page 7]
Music planti taem mekem man laek dance