Keepim Balance Tingting Long Music
MUSIC hem wanfala bisnis wea kasem staka billion dollar. Olketa famous musician and pipol wea saportim olketa kasem staka selen. Bat, samting wea happen nao hem wei wea olketa musician garem living wea no hapi, olketa dae early, and suisaed. And pruv stap hao samfala music hem spoelem man saed long fasin, feeling, and spiritual wei and savve lead go long raf fasin and wei for againstim pipol.
Nomata olsem, hem gud for garem balance tingting long music. Music garem staka rong and nogud saed long hem bat samfala music savve mekem laef bilong man kamap moabeta and mekem man kasem samfala hapi and feel satisfae. Hem savve strongim iumi saed long feeling and spiritual wei. Tingim samfala example.
Evri 150 psalm insaed Bible hem wanfala spesol samting long raeting—olketa poem, holy song, and prea. Pipol hapi for readim olketa long staka handred languis distaem. Bat, olketa Hebrew pipol bifor no just readim olketa psalm; olketa singim tu. Planti taem olketa sing witim music instrument—wanfala strongfala wei for joinim wisdom bilong God bilong olketa, Jehovah, wea insaed toktok bilong song, witim feeling wea olketa singer wea savve tumas for sing givim long olketa wea herem. Winim wei for sing stret nomoa or saond raf, Hebrew music hem barava here gud winim music bilong olketa kantri raonem hem.
Bihaen, olketa Christian bilong first century singim olketa psalm and nara holy song for praisem God and for comfortim sorre feeling. So music hem mekem laef moa interesting and moabeta. And thru long wei for singim olketa Bible song, olketa putim savve bilong God moa deep insaed heart bilong pipol, wea olketa needim for gaedem laef bilong olketa.—Matthew 26:30; Acts 16:25.
Olketa bilong Greece bifor biliv music hem mekem fasin bilong man kamap moabeta and mekem man or woman hem fit long evri wei. Long mek-20 century wea mekhae long science, economics, and wei for reason, planti taem wei for man grow long saed bilong feeling thru long samting olsem music hem samting wea pipol fail for tingim.
Keepim Balance Tingting
For lisin long gudfala music savve helpem and mekem man hapi. Bat, man savve kasem moa hapi from wei for pleim wanfala music instrument or for sing witim samfala fren. Wei for lanem music savve openem bigfala wei for hapi.
Hem tru, olsem olketa nara gud samting long laef, need stap for man garem balance fasin, gud tingting, and for chus gud long disfala saed bilong hapitaem. Diswan hem tru no only for kaen music man chusim bat tu long taem man iusim for lisin or for pleim music.
Sapos wankaen music start for affectim iu long nogud wei saed long feeling, fasin, and wei for fren witim pipol, then chusim narakaen. Protectim ear bilong iu for protectim feeling bilong iu for protectim heart and mind bilong iu!
Diswan hem barava tru saed long olketa word bilong song. Olketa savve changem iu for kamap olsem pipol wea no garem sem tingting saed long living and fasin, wea mekhae long living wea no followim God and wea dirty. Samfala taem title bilong song nomoa savve mekem rong feeling kamap.
Word bilong God, Bible, kaonselem olketa wea bae mekem hem hapi for “offerim body bilong [olketa] olsem sakrifaes wea laef, holy, wea God acceptim, wanfala holy service witim paoa bilong [olketa] for ting raonem.” (Romans 12:1) Hem klia, olketa feeling bilong iumi hem part bilong datfala “sakrifaes wea laef.” So sapos iumi lukim hao music start for daonem gudfala tingting bilong iumi and leadim iumi rong, then hem taem nao for changem wei bilong iumi for herem music. Remember: Paoa bilong music savve affectim heart and mind bilong iu—long gud or nogud wei!
[Box/Piksa long page 10]
Strongim Wei for Lane
“Research showimaot hao wei for evritaem herem naesfala music savve strongim wei for lane bilong wanfala baby. Bat long planti haos, olketa nating herem eniwan.”—Audio, March 1999.