Tingting Bilong Bible

Hao for Deal Witim Wei for Lus Hope

WEI for lus hope hem kamap big long evri man, bat long difren wei. For samfala, feeling for lus hope kamap barava strong tumas gogo olketa laekem dae winim laef.

Bible showaot hao olketa faithful servant bilong God no free from olketa problem and hevi wea lead go long wei for lus hope. For example, Tingim Elijah and Job—tufala enjoyim gudfala wei for fren witim God. Bihaen hem ranawe for laef bilong hem from wicked Queen Jezebel, Elijah ‘start for askem [Jehovah] sapos soul bilong hem savve dae.’ (1 Kings 19:1-4) Datfala raeteous man Job kasem olketa bigfala trabol, insaed diswan hem wanfala barava nogud sik and dae bilong tenfala pikinini. (Job 1:13-19; 2:7,8) Wei wea hem lus hope mekem hem for sei: “Mi laekem dae winim evri wei wea mi safa.” (Job 7:15, The New English Bible) Hem klia, wari hem kamap barava strong for olketa faithful man bilong God.

For samfala distaem, wei for lus hope maet kamap from olketa bigfala pain bilong olo, dae bilong partner, or bigfala problem long saed bilong selen. Olketa narawan faendem hao hevi wea no savve finis, nogud samting wea bin kasem olketa wea still affectim olketa, or olketa famili problem mekem olketa feel olsem olketa trae hard for swim midolwan long deep sea, and evri wave mekem hem hard for kasem saedsea. Wanfala man talem: “Iu kasem feeling for iusles—olsem no eniwan bae missim iu sapos iu dae. Samtaem lonely feeling wea iumi kasem hem barava tumas nao.”

Long samfala taem living hem change for kamap beta, and daonem disfala strongfala hevi. Bat hao sapos living bilong iumi hem no change? Hao nao Bible savve helpem iumi for deal witim wei for lus hope?

Bible Savve Helpem Iumi

Jehovah garem savve and paoa for saportim Elijah and Job thru long hard taem bilong tufala. (1 Kings 19:10-12; Job 42:1-6) Iumi kasem comfort for savve long diswan distaem! Bible talem: “For iumi God hem wanfala ples for haed and wanfala strong, wanfala help wea isi for faendem long taem bilong trabol.” (Psalm 46:1; 55:22) Nomata maet hem luk olsem olketa feeling for lus hope pullim iumi daon, Jehovah promisim hao hem bae go ahed for hol strong long iumi witim raet hand bilong hem wea raeteous. (Isaiah 41:10) Hao nao iumi savve kasem disfala help?

Bible explainim hao thru long prea “peace bilong God wea winim evri tingting bilong man bae protectim heart and tingting bilong [iumi] thru long Christ Jesus.” (Philippians 4:6, 7) From iumi garem bigfala wari, iumi maet ting no eni wei nao for finisim problem bilong iumi. Sapos iumi “go ahed for prea,” Jehovah savve protectim heart and mind bilong iumi, provaedem strong wea iumi needim for go ahed for stand strong.—Romans 12:12; Isaiah 40:28-31; 2 Corinthians 1:3, 4; Philippians 4:13.

Iumi bae kasem gud samting thru long wei for tok stret insaed prea bilong iumi. Nomata maet hem hard for talemaot tingting bilong iumi, iumi shud feel free for story witim Jehovah abaotem wanem iumi tingse hem start bilong datfala problem. Iumi need for askem hem for strong for saportim iumi thru long evri day. Iumi garem trust: “Samting wea olketa wea fraet long hem [Jehovah] wantem, bae hem duim, and singaot bilong olketa for help, bae hem herem, and bae hem sevem olketa.”—Psalm 145:19.

For join witim prea, iumi mas trae for no stap seleva. (Proverbs 18:1) Samfala kasem strong from olketa iusim taem and strong bilong olketa for helpem olketa narawan. (Proverbs 19:17; Luke 6:38) Tingim wanfala woman wea nem bilong hem Maria,a wea hem no only faet witim cancer bat tu hem lusim eitfala member long famili bilong hem insaed wan year. Maria mas forcem hemseleva for go aot from bed for followim schedule bilong hem moa. Hem go aot klosap evriday for teachim olketa narawan abaotem Bible, and hem evritaem attendim olketa Christian meeting. Taem hem go bak long haos, olketa wari feeling bilong Maria barava kam bak strong moa. Bat, taem hem tingting strong long hao hem savve helpem olketa narawan, Maria hem fit for go ahed strong.

Bat hao sapos iumi faendem hem hard for prea or no savve finisim wei for stap seleva? Long taem olsem iumi mas lukaotem help. Bible encouragem iumi for tan go long “olketa elder bilong kongregeson.” (James 5:13-16) Wanfala man wea deal witim bigfala wari wea go ahed hem talem: “Samfala taem wei for story witim samwan iu trustim savve help for mekem peace long mind and spirit kamap, mekem stret tingting hem win.” (Proverbs 17:17) Bat, taem wei for lus hope kamap wea go ahed for longfala taem and hem strong tumas, diswan maet minim wanfala problem long saed bilong health, and maet iu needim help wea fitim from olketa doctor.b—Matthew 9:12.

Nomata no eni isi wei hem stap, iumi shud no ting smol long paoa bilong God for helpem iumi deal witim olketa problem bilong iumi. (2 Corinthians 4:8) Go ahed for prea, trae for no stap seleva, and go ahed for kasem gudfala saport wea savve helpem iumi kamap stedy moa. Bible promisim hao God bae finisim evribit start bilong evri samting wea savve mekem iumi lus hope. Olketa Christian disaed strong for depend long God taem olketa go ahed for weit for datfala day taem olketa “samting bilong bifor bae no kamap moa long mind.”—Isaiah 65:17; Revelation 21:4.

[Olketa footnote]