Why Nao Bigfala Interest Long Spiritism?
Spiritism garem mining olsem, “biliv hao spirit part bilong man go ahed for laef bihaen physical body dae and savve tok witim pipol wea laef, planti taem thru wanfala wea savve tok witim olketa spirit.”
NAMBAWAN long list bilong New York Times long 1998 long olketa buk wea staka peim, hem wanfala buk wea explainim hao for tok witim olketa wea dae.
Tu-thri year bifor long Moscow, olketa bigman long politik and bisnisman visitim olowe olketa wea garem spesol paoa and wea savve tok witim spirit world, and peim big selen for go long olketa.
Long Brazil, staka pipol laek for lukim olketa television program wea showim spiritism.
For staka wea stap long Africa or Asia, wei for duim spiritism hem olsem wei for baem and sellim samting long market nomoa.
Why Staka Duim Spiritism
Staka duim spiritism for kasem comfort bihaen samwan olketa lovem dae. Thru long wanfala man wea tok witim spirit, olketa kasem spesol information wea olsem hem kam from man wea dae. From diswan, olketa wea sorre olsem planti taem biliv strong hao datwan wea olketa lovem wea dae hem laef yet, and for tok witim hem bae daonem sorre.
Samfala moa laekem spiritism bikos olketa herem hao olketa spirit bae helpem olketa faendem wei for aotem sik, lusim poor living, win for frenim samwan, stretem marit problem, or faendem waka. And staka duim spiritism for traem nomoa.
Bat, nara reason why staka million pipol duim spiritism hem bikos olketa herem hao wei for duim spiritism hem, olsem savveman saed long diswan talem, “nara religion” wea “stap saed long Christian Wei.” Wanfala example bilong diswan hem wanem nao go ahed long Brazil saed long religion.
Moa Roman Catholic stap long Brazil winim eni nara ples long earth, bat olsem man for raet, Sol Biderman, hem talem, “staka million wea faithful laetem kandol long altar bilong tufala difren worship and no feel olsem tufala difren from each other.” Tru nao, Veja magasin long Brazil reportim hao 80 percent long pipol long Brazil wea evritaem go long ples for duim spiritism olketa baptaes Catholic wea attendim Mass tu. Join witim diswan, samfala clergyman tu tekpart long hipap bilong spiritism and man savve minim why staka wea biliv tingse God appruvim wei for kasem comfort and gaedens from olketa spirit. Bat waswe, datwan hem tru?
[Box/Piksa long page 3]
Olketa Difren Kaen Spiritism
Spiritism hem wei for tok witim spirit thru long wanfala man, tok witim olketa wea dae finis, or for lukaotem saen. Wankaen spiritism wea staka duim hem divination—for faendaot abaotem future or samting man no savve long hem witim help bilong spirit. Samfala kaen divination hem wei for studyim star, luk insaed crystal-ball, minim dream, readim hand, and talem future thru long olketa tarot card.