Why Iu Shud Stap Klia From Spiritism
SAPOS iu biliv samfala kaen spiritism hem wei for story witim gud spirit, maet iu bae sapraes for savve wanem Bible talem abaotem spiritism. Olsem example, hem sei: “No go lukim man wea tok long olketa spirit, and no askem man wea talem future, mekem iu no kamap dirty from olketa.”—Leviticus 19:31; 20:6, 27.
Tru nao, Bible talem hao “Jehovah barava heitim” wan wea duim spiritism. (Deuteronomy 18:11, 12) Why? Ansa stap long wanem Bible talem abaotem main part bilong spiritism—wei for toktok witim man wea dae.
Waswe, Olketa wea Dae Laef?
No olsem wanem staka tingim, Word bilong God, Bible, teachim hao pipol kanduit tok witim olketa wea olketa lovem wea dae. Why nao olsem? Sapos man fit for tok witim man wea dae, man wea dae mas laef. Mas wanfala part long hem laef bihaen dae. Samfala sei soul nao go ahed for laef taem body dae. Waswe, diswan hem tru?
Story bilong Bible abaotem taem God wakem man hem sei: “Jehovah God hem wakem man from dust bilong graon and blowim wind bilong laef go insaed long nose bilong hem, and man hem kamap wanfala living soul.” (Genesis 2:7) Waswe, diswan no showimaot man seleva nao hem soul and hao hem no garem soul wea kanduit dae wea go ahed laef bihaen body dae? Tru nao, Bible sei: “Soul wea hem sin—hem nao bae dae.” (Ezekiel 18:4) “Olketa wea laef savve olketa bae dae; bat olketa wea dae finis, olketa nating savve long eni samting . . . Nomoa eni waka or plan or savve or wisdom stap long Sheol,” grev bilong evri man.—Ecclesiastes 9:5, 10.
So Bible no sei soul hem samting wea laef bihaen body dae wea man savve story witim. Tufala savveman wea pipol respectim gogo biliv soul savve dae. Savveman from Canada Clark H. Pinnock hem sei: “Disfala idea [hao soul bilong man kanduit dae] hem affectim teaching for longtaem bat hem no kam from Bible. Bible no teachim soul kanduit dae.” Olsem tu, savveman from Britain John R. W. Stott hem sei: “Wei wea soul kanduit dae—and kanduit finis evribit—hem Greek and no Bible teaching.”
Nomata olsem, pipol kasem message and herem voice wea olsem bilong olketa wea dae. Hu nao toktok hia?
Story Witim Hu?
Bible sei wanfala spirit person iusim snek for story witim first woman, Eve, and muvim hem for againstim God. (Genesis 3:1-5) Bible kolem disfala spirit person, or angel, “datfala firstfala snek, datwan wea olketa kolem Devil and Satan, wea hem giamanim olketa man long earth.” (Revelation 12:9) Satan win for switim olketa nara angel for no obey. (Jude 6) Olketa wicked angel hia garem nem demon and olketa enemy bilong God.
Bible showimaot olketa demon garem paoa for affectim olketa man. (Luke 8:26-34) Dastawe iumi no sapraes hao Law bilong God sei: “No eniwan mas stap midolwan long iufala . . . wea go lukim man wea tok long olketa spirit or wea talem future or eniwan wea tok witim olketa wea dae finis. From Jehovah barava heitim evriwan wea duim olketa samting hia.” (Deuteronomy 18:10-12) Wanem nao danger bilong wei for no followim disfala law?
Trufala experience bilong King Saul bae ansarem disfala kwestin. From hem fraetem olketa enemy bilong hem, King Saul go lukim woman wea savve tok witim olketa spirit. Saul askem hem for tok witim profet Samuel wea dae finis. Bihaen woman hia talem lukluk bilong wanfala olo man, Saul tingse man insaed vision hem Samuel nao. And wanem message nao Saul kasem? Bae olketa enemy winim Israel, and Saul and olketa son bilong hem bae joinim “Samuel,” wea minim olketa bae dae. (1 Samuel 28:4-19) Hao nao God ting long disison bilong Saul for askem help bilong disfala woman? Bible hem sei: “Saul hem dae from wei wea hem no faithful . . . and tu from hem go lukim datfala woman for tok witim olketa spirit.” (1 Chronicles 10:13) From mistek bilong hem hem dae nao!
Long sem wei distaem, olketa wea duim spiritism putim olketa seleva long bigfala danger. Bible givim warning hao “olketa wea duim spiritism” bae kasem “mek-tu dae [or, dae for olowe].” (Revelation 21:8; 22:15) So, hem klia hao hem wise wei and hem sevem laef for stap klia from evrikaen spiritism.
Hao for Stap Klia From Olketa Wicked Spirit
Waswe sapos iu insaed wei for duim spiritism finis? Bae hem helpem iu for stretawe duim samfala samting for protectim iuseleva and famili bilong iu from olketa wicked spirit. Wanem nao samfala samting hia? For minim: Hao nao man protectim haos and famili bilong hem from olketa rat? Bihaen hem aotem olketa from haos bilong hem, hem torowe eniting wea rat laekem from haos bilong hem. Hem satem olketa hol long wall for stopem rat for kam, and sapos rat no finis, hem maet askem help bilong olketa savveman for deal witim.
For followim sem wei savve helpem iu for againstim olketa wicked spirit and for brek free from olketa. Tingim example bilong olketa first-century Christian long Ephesus wea duim spiritism bifor olketa kamap Christian. Bihaen olketa disaed for brek free from spiritism, olketa duim thrifala samting for protectim olketa seleva from attak bilong olketa wicked spirit. Wanem nao olketa duim?
Firstfala Step
Bible sei: “Planti long olketa wea duim magic hipimap olketa buk bilong olketa and bonem olketa front long evriwan.” (Acts 19:19) Taem olketa distroem olketa buk bilong divination, olketa niu Christian hia showim example for evriwan wea laek for againstim olketa wicked spirit distaem. Torowe evri samting bilong spiritism. Diswan bae minim olketa samting olsem buk, magasin, comic buk, video, poster, information from electronic samting and music kaset wea savve join witim spiritism, and tu olketa kastom samting or nara samting wea man werem for “protection.”—Deuteronomy 7:25, 26; 1 Corinthians 10:21.
Wanfala man long South America wea barava insaed spiritism for staka year hem followim advaes bilong Bible. “Wanday,” hem sei, “mi hipimap evriting bilong spiritism bilong mi front long haos, holem akis, and pisisim evriting.” Then hem bonem evriting kasem taem no eniting stap moa. Bihaen datwan hem muv ahed gud long spiritual wei and no longtaem bihaen kamap strongfala minister long wanfala kongregeson bilong Olketa Jehovah’s Witness.
Bat, datfala first samting hem no inaf. Why? Nomata bihaen samfala year wea olketa Christian long Ephesus distroem olketa buk bilong magic bilong olketa, aposol Paul raet olsem: “Iumi garem wanfala faet . . . againstim olketa wicked spirit.” (Ephesians 6:12) Olketa demon nating givap. Olketa go ahed for trae spoelem olketa. Wanem nao olketa Christian hia need for duim?
Mek-Tu Step
Paul encouragem olketa long Ephesus long first century olsem: “Werem full kaleko for faet wea kam from God mekem iufala stand strong againstim evri trik bilong Devil.” (Ephesians 6:11, footnote) Datfala advaes still fitim distaem. Barava olsem man wea trae for keepim rat aot from haos bilong hem, wanfala Christian mas strongim protection bilong hem, mekem olketa wicked spirit no savve spoelem hem. Wanem nao insaed mek-tu step?
Paul strongim hao “winim evri samting, garem bigfala shield bilong faith, wea iufala savve stopem olketa spia bilong fire bilong wicked wan.” (Ephesians 6:16) Shield hia barava important. Wei wea iu againstim wicked spirit bae strong sapos faith bilong iu hem strong.—Matthew 17:20.
So, hao nao iu savve strongim protection bilong iu? Thru long wei for iu go ahed for studyim Bible. Hao nao wei for studyim Bible hem join witim faith? Long sem wei wea strong bilong wall depend long strong bilong faondeson bilong hem, so strong bilong faith tu hem depend long strong bilong faondeson bilong hem. Wanem nao faondeson hia?
Stretfala savve from Word bilong God. Aposol Paul explainim olsem: “Faith kamap bihaen man herem samting. And samting wea man herem hem thru long toktok abaotem Christ.” (Romans 10:17) Iu kasem invitation for ask for wanfala free Bible study witim wanfala Jehovah’s Witness, long taem and ples wea fitim iu. Study hia bae strongim faith bilong iu. (Romans 1:11, 12; Colossians 2:6, 7) Wanem nao bae kamaot? No longtaem bihaen bae faith bilong iu kamap wanfala wall wea olsem shield againstim paoa bilong olketa wicked spirit.—Psalm 91:4; 1 John 5:5.
Wanem nao mek-thri step wea olketa Christian long Ephesus duim?
Mek-Thri Step
Long Ephesus bifor, olketa niu wan wea biliv duim finis samfala step for againstim olketa wicked spirit, bat olketa Christian hia stap yet insaed taon wea demon worship hem big tumas. Olketa needim moa protection. So taem aposol Paul raet long olketa wea biliv, hem talem olketa wanem for duim: “Witim evrikaen wei for prea and beg . . . go ahed for prea evritaem long spirit. And for fitim datwan, stap wekap evritaem witim wei for askem samting for saed bilong olketa holy wan.”—Ephesians 6:18.
Tru nao, wei for prea strong evritaem for protection bilong Jehovah long bifor, and tuday tu, hem wanfala important step wea man needim for kasem protection againstim wicked spirit. And hem comfortim man for savve Jehovah bae ansarem prea wea iu beg from heart, long wei for givim protection bilong hem, wea minim tu saport bilong olketa angel bilong hem. (Psalm 34:7; 91:2, 3, 11, 14; 145:19) Dastawe, hem important tumas for man go ahed strong for prea long God and sei, “Sevem mifala from wicked wan.”—Matthew 6:13; 1 John 5:18, 19.
Antônio, man from Brazil wea savve tok witim olketa spirit bifor, barava minim why prea hem important tumas. Bihaen hem acceptim Bible study and lanem nem bilong God, Jehovah, hem start for prea strong long Jehovah God for helpem hem brek free from spiritism. Taem hem ting bak, hem sei: “Wei for prea long Jehovah hem protectim mi and staka narawan wea slave for wicked spirit bifor.”—Proverbs 18:10.
Iu Savve Win
Bihaen iu savve long Jehovah, hem barava important for iu putim full trust long hem, stap anda long rul bilong hem, and obeyim olketa komand bilong hem. Sapos iu duim olsem, taem iu singaot for help bilong hem and iusim nem bilong hem, hem bae protectim iu. Antônio kasem disfala protection. Distaem hem wanfala Christian elder insaed wanfala long olketa kongregeson bilong Olketa Jehovah’s Witness long São Paulo and hem thankiu for wei wea hem faendem truth wea mekem hem free.—John 8:32.
Olsem Antônio and planti thousand wea duim spiritism bifor bat distaem servem Jehovah God, iu savve win for brek free from spiritism. So, torowe evri samting bilong spiritism, strongim faith bilong iu thru long Bible study, and prea for protection bilong Jehovah. Followim olketa step hia—laef bilong iu depend long hem!
[Blurb long page 5]
Bible sei olketa wea laef kanduit story witim olketa wea dae
[Piksa long page 6]
1. Torowe evri samting bilong spiritism
[Piksa long page 7]
2. Go ahed for studyim Bible
[Piksa long page 8]
3. Prea strong evritaem