Minim Moa Samting Abaotem Hair Bilong Iu

“LONG evri age and kastom,” wanfala raeting hem sei, “hair talemaot samting abaotem man.” So dastawe staka pipol barava interest for keepim hair bilong olketa healthy and luk naes.

Wekap! askem fofala savveman for kat hair samfala kwestin wea planti pipol laek kasem ansa long hem abaotem hair and hao for keepim gud. From diswan mifala faendaot moa samting hem insaed long hair winim wanem man tingim.

Wei wea Hair Grow and Foldaon

Q: Wanem nao hair kam from?

A: Hair garem keratin, wanfala fibrous protein. Each hair grow aot from hol long skin long hed wea olketa kolem follicle. Long botom bilong each follicle hem papilla, wea garem staka blood vessel. Papilla nao wakem olketa hair cell wea go ap long follicle and pas strong tugeta for kamap hair.

Q: Staka sei wei for kat hair bae mekem hair grow moa fast. Waswe, diswan tru?

A: Nomoa. Samfala tingse hair kasem kaikai from body long sem wei wea branch bilong tree kasem kaikai from rut. Bat wans hair grow aot from skin long hed, hem dae nao. So wei for katem hair bae no affectim wei wea hem grow.

Q: Why nao hair kamap white?

A: Insaed hair garem pigment wea hem givim hair color bilong hem. Taem pigment cell dae, hair kamap white; hem part long wei for kamap old. For garem white hair taem man hem young yet hem maet from famili laen or sik. Bat disfala tingting hao hair kamap white insaed wan naet hem no tru. Hair kasem pigment anda long skin. So hem tek taem for white hair for grow (samting olsem 1.25 centimeter insaed wan month) and for pipol lukim.

Q: Wanem nao kosim hair for foldaon?

A: Hem normal samting for hair evritaem foldaon. Pipol lusim 50 go kasem 80 hair evri day. Bat bolhed bilong olketa man hem from famili laen and luk olsem wei wea body no balance long hormones nao kosim diswan, mekem man bolhed for olowe. Wei for lusim hair wea no normal hem garem nem alopecia.a

Q: Samfala sei hair hem showimaot wei wea man hem healthy. Waswe, iu lukim diswan?

A: Yes. Anda long skin bilong hed, blood hem feedim hair. So healthy hair maet showim man wea no short long blood. Bat, man wea no kaikai gud or wea ova tumas long alcohol savve garem thin hair, from blood bilong hem hard for feedim hair gud. Wei wea hair foldaon or wiki hem savve saen bilong sik or babule.

Wei for Keepim Skin Long Hed and Hair Healthy

Q: Explainim hao for wasim hair and skin long hed.

A: Research showaot big haf long pipol witim problem bilong drae skin long hed hem from olketa wasim tumas. Hem tru, oil long hair savve mekem hair dirty wea savve blokem hol bilong oil from follicle. So hem important for wasim hair evritaem. Bat olketa oil hia savve protectim skin bilong iu tu againstim olketa nogud bacteria and mekem hem no drae tumas. Taem iu wasim hair tumas, iu aotem nao disfala samting wea protectim skin long hed bilong iu and bae mekem hem drae tumas. Staka savveman bilong hair sei hem gud for wasim hair taem hair or skin hem dirty. Olketa wea garem oily hair nao shud wasim moa taem winim nara pipol.

Taem iu wasim hair, pressim hed. Diswan bae aotem drae skin from hair and mekem blood ran gud, wea feedim hair bilong iu. Remember for rinsim hair gud! Sapos iu no rinsim gud hand bilong iu bihaen iu wasim witim soap, skin bilong iu bae drae and olsem bakua. Long sem wei, sapos iu wasim hair and no aotem gud soap, skin long hed bilong iu bae kamap drae and hem bae aot.

Q: Hao nao iu savve finisim disfala wei wea skin long hed hem aot?

A: Drinkim staka wata, and kaikaim healthy kaikai. Diswan mekem skin for no drae and hem helpem blood. Iusim shampoo wea no strong tumas, and pressim hed evritaem. Samfala pipol iusim conditioner wea iu no wasim aot and olketa cream for mekem skin long hed no drae.

Hair Stael

Q: Wanem nao man shud tingim taem hem go long ples for staelem hair?

A: Sapos iu laek changem stael long hair bilong iu, tekem go piksa bilong stael wea iu laekem and maet wanfala bilong stael wea iu no laekem. Talem klia wanem iu laekem and haomas taem iu willing for iusim evriday for lukaftarem hair, bikos samfala stael needim moa taem. No forget hao man for kat hair hem need for katem hair bilong iu tu-thri taem bifor hem really savve long hair bilong iu and savve story gud witim iu. So no givap kwiktaem long hem!

Wanem Hair Bilong Iu Showimaot

Wei wea man keepim and staelem hair bilong hem showimaot wanem kaen man nao hem. Pipol katem, mekem long, mekem curly, putim color, and staelem enikaen for followim fashion, lotu, and tu tingting bilong man saed long living and politik. Lukim gud moa hair bilong iu. Wanem nao hem showimaot abaotem iu? Healthy hair wea garem naes stael mekem man luk naes and staka nara pipol laekem.

[Footnote]

[Olketa piksa long page 20]

Wei for kaikaim healthy kaikai and drinkim staka wata savve help for mekem skin long hed no drae tumas

[Piksa long page 20]

Wei for wasim hair tumas savve aotem oil wea skin long hed needim

[Piksa long page 20]

Wei wea hair kamap white hem part long wei for kamap olo