Waswe, Iu Wari Abaotem Hair Bilong Iu?

MAET iu tu wanfala wea savve tek longtaem front long mirror for lukluk long hair bilong iu. Man and woman evriwan savve interest long hair bilong olketa, and samfala taem olketa wari abaotem.

Savve Abaotem Hair Bilong Iu

Waswe, iu savve haomas hair nao stap long hed bilong iu? Hem samting olsem 100,000. Wanfala hair hem no stap olowe, hem grow for tu go kasem six year nomoa. Then hem foldaon, and bihaen lelebet taem wanfala niu hair grow from sem hol long skin. (Lukim box long page 27.) From diswan, nomata man wea no kasem eni hair problem bae lusim 70 go kasem 100 hair evriday.

Hao nao kala bilong hair savve difren? The World Book Encyclopedia hem explainim olsem: “Wanfala samting insaed long hair wea olketa kolem melanin nao kosim difren kala bilong hair.” Melanin hem samting wea givim kala long hair, skin, and eye. Taem melanin hem staka, hair hem moa blak. Taem melanin hem lelebet, kala bilong hair hem moa laet olsem brown or red. Sapos hair no garem melanin, hem luk barava white and hem shaen.

For add go witim dandruff, nara hair problem wea staka warim hem wei for bolhed and wei wea hair kamap gray.

Iu Garem Gray Hair?

Staka pipol ting long wei for garem gray hair olsem saen bilong wei for gogo for olo and hair wea full white olsem saen bilong wei for olo. Hem tru, hair kamap moa white taem man kamap moa olo. Bat, witim wei for gogo for olo, olketa nara samting tu, olsem wei for ova tumas for katdaon long kaikai savve kosim gray hair. Wei for hair kamap gray hem happen long eniwan nomata man or woman, nomata wanem kala hair man garem, bat hem showaot klia tumas long pipol wea hair bilong olketa moa dark.

Samfala wari gray hair bilong olketa mekem olketa luk moa olo winim really age bilong olketa. Long narasaed, from olketa nating garem gray hair, samfala warim wei wea olketa luk moa young winim age bilong olketa.

Gray hair no minim hair hem dae. Tru samting nao, evri part bilong hair wea iumi savve lukim hem dae finis. Each hair hem start from wanfala samting wea garem nem bulb, wea stap andanit skin, and hem nomoa part bilong hair wea laef. Bulb hem olsem factory for wakem hair. Taem olketa cell insaed bulb kamap olketa hair, hem tekem melanin from olketa pigment cell. So, taem olketa pigment cell stop for wakem melanin, hair hem kamap white.

No eniwan savve yet why nao olketa pigment cell stop for wakem melanin. Dastawe olketa no faendem eni treatment for stopem hair for kamap gray. Olketa faendem tu hao olketa pigment cell wea stop waka savve start for waka moa. Interesting samting nao hem wei wea Bible garem staka toktok abaotem hair, and wanfala tokpiksa bilong Jesus hem abaotem white hair. Hem sei: “Iufala no savve mekem wanfala hair kamap white or blak.” (Matthew 5:36) Toktok hia showaot pipol bifor savve no eniwan savve stopem hair for kamap gray.

Samfala traem olketa niu treatment, olsem wei for nilam melanin insaed long man. Samfala moa chus for dyem hair, wea pipol from taem bifor tu duim. Pipol bilong Greece and Rome bifor iusim hair dye. Pipol bilong Egypt bifor iusim blood bilong buluka for dyem hair bilong olketa. Wanfala raeting talem hao Herod the Great, wea stap long taem bilong Jesus Christ, hem dyem gray hair bilong hem for haedem age bilong hem.

Nomata olsem, for go ahed dyem hair hem needim taem and bigfala waka, and for samfala pipol maet hem kosim skin problem or narakaen problem. Nomata sapos iu disaed for dyem gray hair bilong iu, maet gogo iu bae no laek dyem moa and then iu mas deal witim wei wea olketa hair wea just start for grow bae difren kala from sekson wea iu dyem. Bat hem naes for tingim hao gray hair savve luk naes and mekem iu kasem respect wea iu nating garem bifor. Bible hem sei: “Gray hair hem olsem crown wea luk naes tumas long man wea garem raeteous fasin.”—Proverbs 16:31.

Hair wea Kamap Smol and Wei for Bolhed

Olketa narakaen hair problem hem wei wea hair kamap smol and wei for bolhed. Olketa problem hia bin stap for longtaem finis. Long Egypt bifor, olketa iusim gris bilong lion, hippopotamus, crocodile, puskat, snek, and goose olsem medicine for bolhed. Distaem olketa sellim staka treatment for hair and for skin long hed wea olketa sei savve help, and each year pipol spendem staka selen long olketa.

Man kamap bolhed taem wei wea hair bilong hem grow hem no normal. Diswan savve happen taem body hem safa long samting, olsem wei for no kasem inaf kaikai, hae fever wea longtaem lelebet, or sik saed long skin. Wei for babule and bornem pikinini savve affectim grow bilong hair tu, mekem skin long hed lusim staka hair bifor taem bilong hem. Nomata olsem, taem samting wea kosim diswan hem finis, bae diskaen wei wea hair foldaon bae stop and hair bae grow bak normal moa.

Narakaen wei for lusim hair hem garem nem alopecia.a Disfala problem hem kosim olketa sekson bilong hair for foldaon. Olketa medical research sei maet alopecia hem kam from wei wea immune system bilong body no waka gud.

Wei for hair foldaon wea staka savve hem wei for bolhed wea kasem olketa man nomoa. Hem start long wei wea hair kamap smol front long hed and gogo bak. Grow bilong hair long ples bolhed kamap hem no normal and gogo bae hem stop for grow nao. The Encyclopædia Britannica hem explainim olsem: “Hair wea grow long part long hed wea kakamap bolhed, wea bifor hem long, strong, and garem kala, hem soft and smol and garem nem vellus.” Diswan minim taem hair go ahed for grow, hair hem kamap moa smol and hem stap for short taem nomoa, gogo hem no grow bak nao. Diswan kamaot from famili laen and change saed long olketa hormone.

Olketa man savve start for bolhed from taem olketa teenager, bat staka taem hem long taem olketa gogo for 40 or winim 40 year. Nomata staka man kasem diskaen wei for lusim hair, hem savve difren followim kantri man kam from and man wanwan. Sorre nao, kam kasem distaem, olketa no faendem eni cure for diswan. Samfala maet werem smol wig or kasem hair transplant. Wei for lukaftarem gud hair wea stap yet maet help for mekem foldaon bilong hair for slow daon.

Bat wei wea hair kamap smol hem no evritaem minim hair hem foldaon. Hem savve minim olketa hair wanwan kamap moa smol and dastawe hair hem no thick olsem bifor. Hao thick nao wanfala hair? Wanfala survey showaot samfala hem 50 micron and samfala hem 100 micron.b Hair kamap smol taem man kamap moa olo. Maet hem smol change nomoa. Bat plis remember hao iumi garem samting olsem 100,000 hair. So smol change nomoa long each hair bae affectim thick bilong full hair long bigfala wei.

Kea Gud for Hair Bilong Iu

Hair hem grow winim 10 millimeter evri month, and no eni nara part long body hem grow fast winim diswan. Taem iu addim evri grow bilong hair, hem winim 20 meter evriday!

Nomata no eni medical treatment for gray hair and bolhed stap yet, staka samting stap wea iumi savve duim for lukaftarem gud hair wea iumi garem. Hem important for kaikaim balance kaikai and for mekem blood flow gud long skin bilong hed. For barava katdaon long kaikai from man laek thin or for no balance long kaen kaikai hem kaikaim savve mekem man kwiktaem for garem gray hair and for hair kamap smol. Olketa savveman sei hem gud for iumi wasim hair bilong iumi evri day and for pressim, no skrasem, skin long hed. Diswan mekem blood flow gud long skin bilong hed. Taem iu wasim hair, rinsim gud.

No komim strong hair bilong iu. Sapos iu garem long hair, hem moabeta for firstaem no komim full hair. Firstaem holem hair bilong iu and komim end sekson bilong hair. Then, kom from midol sekson bilong hair. Then, let go and komim full hair.

Maet iu wari taem iu lukim olketa gray hair or staka hair wea foldaon. Bat, remember hao olketa nara pipol planti taem no wari abaotem hair bilong iu olsem iu. Hem disison bilong iu for dyem or for no dyem, or for luk aotem eni nara treatment. Nomata wanem kala bilong hair iu garem and nomata hao thick nao hair bilong iu, important samting hem for keepim klin and for katem gud.

[Footnotes]

[Box on page 27]

GROW BILONG HAIR

Wei wea hair bilong iumi hem grow hem followim olketa difren step: Hem savve grow, hem savve change, and hem savve rest. The World Book Encyclopedia explainim olsem: “Taem hem rest hem taem wea hair stop for grow hem garem nem club hair. Club hair hia bae stap olsem go kasem next stage bilong grow bilong hem. Taem hem grow hem minim taem datfala old hair hem foldaon and niu hair hem grow kamaot from follicle.” Nomata wanem taem, 85 go kasem 90 percent bilong hair go ahed for grow, 10 go kasem 15 percent rest and 1 percent kasem taem wea hem change.

[Diagram]

(Lukim pablikeson for olketa nara information)

Firstfala grow

Go ahed grow

follicle

olketa blood vessel

oil gland

hair shaft

Slow daon

Rest

Grow Moa

[Piksa long page 24]