Young Pipol Askem . . .

Hao Nao Prea Savve Helpem Mi?

“Prea nao helpem mi stretem laef bilong mi.”—Brad.a

PLANTI young pipol go ahed for prea—maet moa taem winim wanem pipol tingim. Wanfala Gallup Youth Survey bilong olketa wea 13 go kasem 17 year long United States showimaot hao 56 percent long olketa savve prea bifor kaikai. Wanfala survey bilong olketa young wan showimaot hao 62 percent prea evriday.

Nomata olsem, for planti young wan prea hem samting wea olketa duim olowe bat hem no garem eni mining. Samfala young wan nomoa garem wanem Bible kolem “stretfala savve bilong God.” (Colossians 1:9, 10) From diswan, God hem no important insaed laef bilong olketa. Wanfala survey askem olketa teenager sapos olketa luk go long God for helpem olketa for disaedem wanfala important samting. Wanfala girl wea kasem 13 year ansa olsem: “Mi evritaem savve luk go long God for helpem mi for chusim stretfala road long laef.” Nomata olsem, hem sei: “Mi no savve tingim eniwan long olketa disison hia distaem.” So iumi no sapraes hao planti young wan short long wei for trustim hao prea garem paoa or hao hem savve helpem olketa!

Nomata olsem, planti thousand young wan feelim seleva paoa bilong prea, olsem Brad, wea talem toktok long firstaem. Iu tu savve olsem! Wanfala article bifor hem bin showim why iumi savve trustim hao God bae herem prea bilong iumi.b Bat kwestin distaem hem, Hao nao prea savve helpem iu? Firstaem, iumi lukluk long hao God savve ansarem olketa prea bilong iumi.

Hao God Ansarem Olketa Prea

Long taem bilong Bible samfala man bilong faith kasem olketa stret—samtaem olketa mirakol—ansa for prea bilong olketa. Olsem example, taem King Hezekiah faendaot hem garem wanfala sik wea bae killim hem dae, hem askem God for sevem hem. God ansa: “Mi herem prea bilong iu. Mi lukim olketa wata long eye bilong iu. Distaem mi healim iu.” (2 Kings 20:1-6) Olketa nara man and woman wea fraet long God kasem olketa sem samting tu taem God duim samting for olketa.—1 Samuel 1:1-20; Daniel 10:2-12; Acts 4:24-31; 10:1-7.

Nomata long taem bilong Bible, wei wea God savve duim samting for man hem no samting wea happen olowe insaed evriday living. Staka taem, God ansarem prea bilong olketa servant bilong hem no thru long wei for duim mirakol, bat long wei for helpem olketa for “kamap full witim stretfala savve long will bilong hem witim evri wisdom and spiritual savve.” (Colossians 1:9, 10) Yes, God help long wei for strongim pipol bilong hem long spiritual saed and saed bilong fasin—givim olketa wisdom and savve for disaed long wisefala wei. Taem olketa Christian kasem hardfala problem, God no evritaem aotem datfala test. Winim datwan, hem givim olketa “paoa wea winim wanem iumi garem” mekem olketa savve stand strong!—2 Corinthians 4:7; 2 Timothy 4:17.

Olsem tu distaem, ansa for prea bilong iu maet no wanfala big samting. Bat olsem hem duim long taem wea go pas finis, God savve givim iu holy spirit bilong hem and strongim iu for deal witim eni problem wea iu feisim. (Galatians 5:22, 23) For showimaot klia, iumi lukluk long fofala wei wea prea savve helpem iu.

Helpem Iu for Disaedem Samting

Karen frenim wanfala young man wea luk olsem hem garem olketa haefala spiritual goal. Hem sei “hem savve talem mi evritaem hao hem laek for kamap wanfala elder long kongregeson.” Diswan here gud tumas. Bat “hem story staka taem tu abaotem bisnis wea hem startim and evri samting wea hem bae peim for mi. Mi start for daotem trufala fasin bilong hem.” Karen prea abaotem. “Mi askem Jehovah for openem eye bilong mi and showim mi samting wea mi need for savve abaotem hem.”

Samtaem wei for prea nomoa savve help, from hem savve mekem iumi stop and tingim hao nao tingting bilong Jehovah abaotem wanfala samting. Bat Karen needim tu samfala gud advaes. Waswe bae hem kasem wanfala mirakol ansa? Tingim wanfala story long Bible abaotem King David. Taem hem faendaot hao fren bilong hem wea hem trustim, Ahithophel, hem helpem son bilong hem Absalom wea againstim hem, David prea olsem: “Plis tanem toktok bilong Ahithophel for kamap krangge samting, O Jehovah!” (2 Samuel 15:31) Bat David hem duim samting tu for fitim samting wea hem prea abaotem. Hem sendem fren bilong hem Hushai go for disfala waka: “Iu mas blokem kaonsel bilong Ahithophel for mi.” (2 Samuel 15:34) Long sem wei tu, Karen duim samting for fitim prea bilong hem taem hem go story witim wanfala mature Christian elder wea savve long boyfren bilong hem. Hem showimaot long hem hao samting wea hem tingim hem tru: Boyfren bilong hem no muv ahed long spiritual wei.

Karen sei: “Datfala taem hem mekem mi lukim klia paoa bilong prea.” Sorre tumas from boyfren bilong hem aftarem olketa richfala samting and stop for servem God. “Sapos mi maritim hem,” Karen sei, “maet distaem mi kakam seleva nomoa long olketa Christian meeting.” Prea helpem Karen for mekem wanfala gud disison.

Help for Kontrolem Feeling Bilong Iu

“Krangge man hem aotem evri spirit bilong hem,” Bible sei long Proverbs 29:11, “bat wisefala man hem stap kwaet go kasem end.” Problem distaem hem wei wea planti pipol stap anda long barava bigfala hevi saed long feeling and planti taem olketa no savve kontrolem kros bilong olketa—samtaem diswan mekem bigfala trabol kamap. Young Brian ting bak: “Mi bin garem samfala problem witim wanfala wakfren bilong mi. Wanday hem pointim naef long mi.” Sapos iu nao hem, wanem nao bae iu duim? Brian hem prea. Hem sei: “Jehovah hem helpem mi for stap kwaet, and mi story isisi long wakfren bilong mi gogo hem no killim mi. Hem torowe datfala naef and wakabaot go from mi.” Wei for kontrolem olketa feeling bilong hem helpem Brian for stap klia from wei for kros and diswan maet sevem laef bilong hem.

Maet no eniwan laek killim iu witim naef. Bat bae staka taem olketa samting kamap long laef bilong iu wea bae mekem iu need for kontrolem feeling bilong iu. Prea savve helpem iu for stap kwaet.

Helpem Iu Taem Iu Wari

Barbara ting bak “taem mi go thru long wanfala hard taem” no longtaem go nomoa. Hem sei: “Long saed long waka bilong mi, famili, olketa fren—no eni samting hem go stret. Mi no savve wanem nao bae mi duim.” Barbara hem prea for help. Bat wanfala problem stap. “Mi no savve wanem nao bae mi askem long Jehovah,” hem sei. “Gogo mi ask for peace long mind. Mi askem evri naet for hem helpem mi for no wari abaotem evriting.”

Hao nao prea helpem hem? Hem sei: “Samfala day bihaen, mi luksavve hao nomata olketa problem bilong mi no lus, mi no wari tumas abaotem olketa olsem bifor.” Bible promis olsem: “Talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.”—Philippians 4:6, 7.

Helpem Iu Kam Klosap Long God

Tingim experience bilong wanfala young wan wea nem bilong hem Paul. “Mi just kam stap witim samfala relative,” hem sei. “Wan naet mi barava feel sorre. Mi just graduate from hae skul, and mi missim evri fren bilong mi. Wata kam long eye bilong mi taem mi ting bak long olketa gud taem wea mifala enjoyim tugeta.” Wanem nao Paul savve duim? For firstaem, hem barava prea strong. Hem sei: “Mi openem heart bilong mi and askem Jehovah for strong and peace long mind.”

Wanem nao kamaot from diswan? Paul ting bak: “Long next morning, mi wekap and mi feel free from wari winim eni narataem long laef bilong mi. Mi change from wei for feel wari tumas go long wei for garem ‘peace bilong God wea winim evri tingting.’ ” From heart bilong hem stap isi, Paul savve lukluk long olketa samting long wei wea feeling hem no strong tumas. And no longtaem hem luksavve hao olketa ‘gud taem bifor’ hem no really barava gud tumas olsem hem tingim. (Ecclesiastes 7:10) Tru nao, olketa “fren” wea hem missim tumas olketa no really affectim hem long gud wei.

Bat samting wea moa important, Paul kasem chance for experiencem wei wea Jehovah kea for hem. Hem feelim hao toktok long James 4:8 hem tru: “ Kam klosap long God, and hem bae kam klosap long iufala.” For Paul diswan hem barava wanfala important taem insaed laef bilong hem. Diswan muvim hem for putim Jehovah first long evri samting long laef bilong hem and for dedicatem laef bilong hem long Jehovah.

Story Long God!

Olketa gudfala experience hia givim pruv hao prea savve helpem iu. Bat, datwan hem tru only sapos iu really laek for savve long God, and mekem grow wei for fren witim hem. Sorre tumas, planti young wan hol bak for duim datwan. Carissa hem big kam insaed wanfala Christian famili. Bat hem sei: “Ating insaed tu-thri year wea just go pas mi just minim gud barava nambawan spesol wei wea iumi fren witim Jehovah.” Brad, wea iumi storyim long firstaem, hem big kam olsem wanfala Christian bat gogo hem lusim tru worship for samfala year. Hem sei, “Taem mi luksavve long samting wea mi lusim mi just tan go long Jehovah. Distaem mi savve hao laef savve barava emti sapos iumi no garem datfala wei for fren.”

Bat, no weitim wanfala problem for kasem iu bifor iu kam klosap long God. Start for story witim hem distaem—evritaem! (Luke 11:9-13) “Pourimaot heart bilong iufala front long hem.” (Psalm 62:8) Bae no longtaem iu faendem prea savve really helpem iu!

[Olketa footnote]

[Box/Piksa long page 17]

Prea Savve Helpem Iu

● Disaed gud

● Stap isi long taem bilong trabol

● Kamap free from wari

● Kam klosap long God