“Askem God for Olketa Samting wea Iufala Needim”
“Long evri samting iufala prea and story long God from heart bilong iufala, and askem God for olketa samting wea iufala needim witim wei for talem thankiu.”—PHILIPPIANS 4:6.
1. Iumi garem privilege for story witim hu, and why nao iumi sapraes long diswan?
SAPOS iu ask for story witim prime minister long kantri wea iu stap, long tingting bilong iu, wanem kaen ansa nao bae iu kasem? Maet bae olketa wea waka insaed office bilong hem raet kam long iu, bat bae hem hard lelebet for olketa letem iu for go story witim hem. Bat, nambawan Ruler wea winim evri narawan, Jehovah God, wea hem Sovereign bilong universe, hem no olsem. Iumi savve story witim hem long eni ples wea iumi stap and long enitaem wea iumi laekem. God hem evritaem willing for herem olketa prea wea fitim. (Proverbs 15:29) Datwan hem barava spesol! Wei for tinghae long diswan shud muvim iumi for evritaem prea long Jehovah, wea Bible kolem hem, “Datwan wea herem prea.”—Psalm 65:2.
2. Wanem nao man mas garem for God acceptim olketa prea bilong hem?
2 Bat, maet samwan hem ask olsem, ‘Wanem kaen prea nao God acceptim?’ Bible hem talem wanfala samting wea man mas garem for God acceptim prea bilong hem taem hem sei: “Sapos man no garem faith hem kanduit mekem hem hapi, from man wea kam long God mas bilivim hao hem stap and hem kamap datwan for givim reward long olketa wea barava lukaotem hem.” (Hebrews 11:6) Olsem study article bifor diswan hem explainim, faith hem wanfala important samting wea man mas garem for story witim God. God hem willing for acceptim prea bilong olketa wea story witim hem, bat olketa mas garem faith and duim stretfala samting, and tu, olketa mas honest and garem gudfala heart.
3. (a) Olsem olketa faithful servant bifor duim, wanem nao samfala samting wea iumi savve prea abaotem? (b) Olsem Philippians 4:6,7 hem showim, olketa wanem kaen prea nao iumi savve talem long God?
3 Aposol Paul encouragem olketa Christian long taem bilong hem olsem: “Iufala no wari long eni samting, bat long evri samting iufala prea and story long God from heart bilong iufala, and askem God for olketa samting wea iufala needim witim wei for talem thankiu.” (Philippians 4:6, 7) Bible hem garem staka example bilong olketa wea prea long God abaotem wari and tingting bilong olketa. Samfala long olketa hia nao Hannah, Elijah, Hezekiah, and Daniel. (1 Samuel 2:1-10; 1 Kings 18:36, 37; 2 Kings 19:15-19; Daniel 9:3-21) Iumi shud followim example bilong olketa. Lukim tu wei wea toktok bilong Paul showim hao iumi savve talem olketa difren kaen prea. Hem story abaotem wei for sei thankiu, wea minim prea wea iumi talemaot iumi tinghae long samting wea God duim for iumi. Insaed diswan maet wei for givim praise long hem tu. Story long God from heart hem minim for story long hambol wei and barava talemaot olketa feeling insaed heart taem iumi needim help. And tu, iumi savve askem olketa samting wea iumi needim. (Luke 11:2, 3) Dadi bilong iumi long heven hem hapi for iumi storyim long hem olketa samting olsem.
4. Nomata Jehovah savve wanem iumi needim, why nao iumi mas still askem hem for olketa samting wea iumi needim?
4 Samfala maet ask olsem: ‘Waswe, Jehovah no savve finis long evri samting wea iumi needim?’ Ia, hem savve. (Matthew 6:8, 32) Sapos olsem, why nao hem still laekem iumi for askem hem for olketa samting wea iumi needim? Tingim disfala example: Maet man wea ownim stoa laek for givim present long samfala kastoma bilong hem. Bat for olketa kastoma kasem datfala present olketa mas kam long datfala man and askem hem for givim datwan. Olketa wea no willing for kam showimaot olketa no really tinghae long wanem hem laek givim. Olsem tu, for no talem Jehovah olketa samting wea iumi needim showimaot iumi no really tinghae long olketa samting wea Jehovah provaedem. Jesus hem sei: “Ask and iufala bae kasem.” (John 16:24) Taem iumi duim olsem, iumi showimaot iumi depend long God.
Hao Nao Iumi Shud Story Witim God?
5. Why nao iumi mas prea thru long nem bilong Jesus?
5 Jehovah no markem staka strict rul for man mas followim taem hem prea long hem. Nomata olsem, iumi need for lanem stretfala wei for story witim God wea Bible explainim. Olsem example, Jesus teachim olketa follower bilong hem olsem: “Sapos iufala askem Father for eni samting, hem bae givim long iufala thru long nem bilong mi.” (John 16:23) Dastawe iumi mas prea thru long nem bilong Jesus, from iumi luksavve hao Jesus nao hem only wei for olketa man kasem blessing bilong God.
6. Taem iumi prea, waswe, iumi shud standap or sidaon long eni spesol wei?
6 Waswe, taem iumi prea iumi mas standap or sidaon long eni spesol wei? Bible no talem eni spesol wei for standap or sidaon taem iumi prea for mekem God herem prea bilong iumi. (1 Kings 8:22; Nehemiah 8:6; Mark 11:25; Luke 22:41) Samting wea important nao man mas biliv strong and garem gudfala heart taem hem prea long God.—Joel 2:12, 13.
7. (a) Wanem nao mining bilong datfala word “amen”? (b) Hao nao man savve talem “amen” long olketa prea?
7 Waswe long wei for iusim datfala word “amen”? Bible showimaot hao plande taem diswan hem wei for endim olketa prea bilong iumi wea fitim, especially taem iumi prea long pablik. (Psalm 72:19; 89:52) Hebrew word ʼa·menʹ hem minim “barava nao.” McClintock and Strong’s Cyclopedia sei mining bilong wei for sei “Amen” long end bilong olketa prea hem for “agree witim toktok wea man just talem, and for showimaot iumi laekem God for ansarem datfala prea.” So, taem man wea prea hem finisim witim “Amen,” datwan showimaot hem barava ting strong long olketa samting wea hem just story abaotem. Taem brata wea prea for kongregeson hem talem word hia long end bilong prea bilong hem, olketa wea lisin savve sei “Amen” tu insaed long heart bilong olketa, or talem datwan big for showimaot olketa agree witim samting wea hem talem.—1 Corinthians 14:16.
8. Hao nao samfala prea bilong iumi maet olsem olketa prea bilong Jacob or Abraham, and diswan bae showimaot wanem samting abaotem iumi?
8 Samfala taem maet God letem iumi for showimaot iumi barava laekem samting wea iumi askem long hem insaed long prea. Maet iumi need for kamap olsem Jacob bifor, wea stragol full naet witim wanfala angel mekem angel hia blessim hem. (Genesis 32:24-26) Or maet iumi need for olsem Abraham, wea askem Jehovah staka taem for no distroem Sodom bikos Lot and maet samfala raeteous pipol stap long there. (Genesis 18:22-33) Long sem wei, iumi savve ask strong long Jehovah abaotem olketa samting wea barava important long iumi, and askem hem for tingim samting iumi askem bikos long Justice fasin, loving-kaeness, and mercy bilong hem.
Wanem Nao Iumi Savve Askem?
9. Wanem nao shud main samting wea iumi askem taem iumi prea?
9 Remember hao Paul hem sei: “Long evri samting . . . askem God for olketa samting wea iufala needim.” (Philippians 4:6) So, iumi wanwan savve prea abaotem evri difren samting wea kamap long laef bilong iumi. Nomata olsem, main samting iumi shud prea abaotem nao hem olketa samting wea important long Jehovah. Daniel showimaot nambawan example long diswan. Taem olketa Israelite kasem panis from sin wea olketa duim, Daniel barava askem Jehovah for showimaot mercy taem hem sei: “No delay, for saed bilong iuseleva, O God bilong mi, from nem bilong iu.” (Daniel 9:15-19) Taem iumi prea, waswe, main samting iumi askem nao hem for evriwan bae ting long nem bilong Jehovah olsem hem holy, and for hem duim will bilong hem?
10. Hao nao iumi savve hem stret for prea abaotem olketa samting for iumiseleva?
10 Nomata olsem, hem stret tu for iumi prea for olketa samting for iumiseleva. Olsem example, iumi savve followim example bilong man wea raetem psalm wea prea for God helpem hem minim olketa deep spiritual samting. Hem prea olsem: “Mekem mi minim, for mi savve followim law bilong iu and for mi savve obeyim witim full heart.” (Psalm 119:33, 34; Colossians 1:9, 10) Jesus “barava prea strong from heart and askem samting long Datwan wea savve sevem hem from dae.” (Hebrews 5:7) Taem hem duim datwan, hem showimaot wei wea hem fitim for man ask for strong taem hem feisim danger or olketa hard taem. Taem Jesus talem datfala example prea long olketa disaepol bilong hem, hem showim hao hem gud for iumi ask for olketa samting for iumiseleva, olsem for Jehovah forgivim olketa rong wea iumi duim and for iumi kasem kaikai evriday.
11. Hao nao prea savve helpem iumi for no foldaon long olketa temptation?
11 Jesus talem nara samting wea iumi savve askem long datfala example prea, taem hem sei: “No mekem mifala kasem temptation, bat sevem mifala from datfala wicked wan.” (Matthew 6:9-13) Bihaen, hem talem disfala advaes: “Gohed for lukaot and prea evritaem, mekem iufala no foldaon long temptation.” (Matthew 26:41) Hem important tumas for prea taem iumi feisim olketa temptation. Maet iumi kasem test long ples wea iumi waka or long skul for no followim olketa Bible principle. Maet olketa wea no Witness invaetem iumi for go witim olketa for duim samfala samting wea no fitim olketa Christian. Maet samwan askem iumi for duim samting wea againstim olketa raeteous principle. Long olketa taem olsem, hem gud for followim kaonsel bilong Jesus for prea long God—bifor iumi feisim and taem iumi feisim wanfala temptation—and askem hem for helpem iumi for no foldaon long datwan.
12. Wanem nao olketa samting wea mekem iumi wari wea maet iumi savve prea abaotem, and waswe, fitim iumi for sure Jehovah bae herem prea bilong iumi?
12 Olketa difren kaen hard samting and wari nao kamap insaed laef bilong olketa servant bilong God distaem. Plande pipol wari bikos olketa garem sik and hevi saed long feeling. Olketa raf samting wea happen raonem iumi savve mekem laef hem barava no isi. Hard taem saed long selen savve mekem hem hard tumas for kasem olketa need bilong iumi. Iumi kasem comfort for savve hao Jehovah hem lisin long olketa servant bilong hem wea storyim kaen samting olsem long hem! Psalm 102:17 hem sei olsem abaotem Jehovah: “Bae hem mas lisin long prea bilong olketa wea lusim evri samting, and no ting daonem prea bilong olketa.”
13. (a) Wanem nao olketa samting for iumiseleva wea iumi savve prea abaotem? (b) Talem experience bilong wanfala sista wea prea olsem.
13 Tru nao, hem fitim for iumi prea abaotem eni samting wea affectim worship bilong iumi for Jehovah or wei wea iumi fren witim hem. (1 John 5:14) Sapos iu mas disaed saed long marit, waka for selen, or saed long wei for duim moa samting insaed long ministry, no hol bak for story abaotem olketa samting hia long God, and askem hem for helpem iu. Olsem example, wanfala young woman long Philippines hem laek for join insaed long full-taem ministry. Bat hem no garem waka for sapotim hemseleva. Hem sei olsem: “Wanfala Saturday, mi prea long Jehovah abaotem wei wea mi laek for pioneer. Bihaen, long datfala sem day, taem mi go long preaching waka, mi givim wanfala buk long wanfala teenage gele. Seknomoa datfala gele sei: ‘Long Monday morning iu shud go long skul bilong mi long barava taem wea skul hem open.’ Mi askem hem, ‘Why nao mi mas go?’ Hem talem hao olketa barava needim samwan for duim wanfala waka long skul. Mi go and olketa acceptim mi. Evri samting hia happen kwiktaem tumas.” Staka Witness raonem world garem olketa experience olsem tu. So no hol bak for askem Jehovah from heart for helpem iu!
Waswe Sapos Iumi Duim Wanfala Sin?
14, 15. (a) Why nao man shud no hol bak for prea sapos hem duim wanfala sin? (b) Sapos man duim sin, wanem nao nara samting wea savve helpem hem for kamap gud moa?
14 Hao nao prea savve help sapos samwan hem duim wanfala sin? From man wea sin hem feel shame, diswan savve mekem hem hol bak for prea. Bat, datwan hem no wise samting for duim. Tingim diswan: Wanfala doctor hem givim rong treatment long wanfala sikman and hem no savve hao for stretem datwan. Hem shame nogud olketa nara doctor daotem savve bilong hem. Bat waswe sapos hem hol bak for askem advaes bilong olketa nara doctor bikos hem feel shame? Diswan savve lead go long bigfala problem! Bae hem semsem tu sapos wanfala man hem duim sin and hem feel shame for prea long God, maet datwan savve barava spoelem hem. Man shud no stop for story witim Jehovah bikos hem feel shame long sin wea hem duim. Tru nao, God invaetem olketa wea duim bigfala sin for prea long hem. Profet Isaiah hem encouragem olketa wea duim sin long taem bilong hem for singaot long Jehovah, “wea bae forgive long bigfala wei.” (Isaiah 55:6, 7) Maet firstaem, iumi need for kasem mercy bilong Jehovah thru long wei for iumi mas hambol, stop for duim datfala sin, and repent.—Psalm 119:58; Daniel 9:13.
15 Narafala samting tu mekem hem important for prea taem man duim wanfala sin. Disaepol James hem sei olsem abaotem eniwan wea needim spiritual help: “Hem shud kolem kam olketa older man bilong kongregeson, and olketa savve prea for hem, . . . and Jehovah bae mekem hem kamap gud moa.” (James 5:14, 15) Tru nao, man seleva mas prea and talemaot sin bilong hem long Jehovah, bat hem savve askem tu olketa older man for prea for hem. Datwan bae helpem hem for fren bak moa witim God.
Ansa for Olketa Prea
16, 17. (a) Hao nao Jehovah ansarem olketa prea? (b) Wanem nao olketa experience wea showimaot hao prea and preaching waka barava join tugeta?
16 Hao nao Jehovah ansarem olketa prea? Maet Jehovah ansarem samfala prea kwiktaem and long wei wea showaot klia. (2 Kings 20:1-6) Maet hem tek taem for kasem ansa for samfala prea, and maet hem no isi for luksavve long ansa wea Jehovah givim. Tokpiksa bilong Jesus abaotem datfala widow wea kam bak staka taem long judge showimaot hao maet iumi need for gohed askem God for samting. (Luke 18:1-8) Nomata olsem, iumi savve sure hao taem prea bilong iumi hem fitim will bilong God, no enitaem Jehovah bae sei: “No mekem mi hard waka.”—Luke 11:5-9.
17 Staka taem nao pipol bilong Jehovah luksavve hao prea bilong olketa hem kasem ansa. Diswan hem happen long preaching waka bilong iumi. Olsem example, tufala Christian sista long Philippines givimaot olketa Bible pablikeson long wanfala bush area. Taem olketa givim tract long wanfala woman, eye bilong hem start for wata. Hem sei olsem: “Last naet mi prea long God for sendem kam samwan for teachim Bible long mi, and ating diswan nao ansa long prea bilong mi.” No longtaem bihaen datwan, woman hia start for attendim olketa meeting long Kingdom Hall. Long narafala part long Southeast Asia, wanfala Christian brata hem fraet for preach insaed wanfala building wea garem bigfala security. Nomata olsem, hem prea long Jehovah and then hem go nao. Hem noknok long wanfala door and wanfala young woman kamaot. Taem brata hia talem why hem kam, woman hia start for krae. Hem sei hem lukaotem Olketa Jehovah’s Witness and prea for God helpem hem for faendem olketa. Datfala brata hem hapi tumas for talem hem wea nao kongregeson bilong Olketa Jehovah’s Witness long area wea hem stap.
18. (a) Taem Jehovah ansarem olketa prea bilong iumi, wanem nao iumi shud duim? (b) Iumi sure long wanem samting sapos iumi prea evritaem?
18 Tru tumas, prea hem nambawan samting. Jehovah hem willing for lisin and ansarem olketa prea bilong iumi. (Isaiah 30:18, 19) Bat, iumi need for luksavve long wei wea Jehovah ansarem olketa prea bilong iumi. Maet samfala taem ansa wea Jehovah givim hem difren from wanem iumi tingim. Nomata olsem, taem iumi luksavve hem helpem iumi, iumi mas no forget for sei thankiu and givim praise long hem. (1 Thessalonians 5:18) And tu, iumi mas evritaem rememberim disfala advaes bilong Paul: “Long evri samting iufala prea and story long God from heart bilong iufala, and askem God for olketa samting wea iufala needim.” Tru nao, mekius long evri chance for story witim God. Sapos iu duim datwan, bae iu lukim hao samting wea Paul talem abaotem olketa wea kasem ansa for prea bilong olketa hem tru, hem sei: “Peace bilong God wea winim evri tingting bilong man bae protectim heart and tingting bilong iufala.”—Philippians 4:6, 7.
Waswe, Iu Savve Ansa?
• Olketa wanem kaen prea nao iumi savve talem long God?
• Long wanem wei nao iumi shud prea?
• Wanem nao iumi savve prea abaotem?
• Hao nao prea savve helpem iumi taem iumi duim sin?
[Piksa long page 27]
Prea wea iumi talemaot evri feeling insaed heart savve helpem iumi for no foldaon long temptation
[Piksa long page 28]
Thru long prea iumi talem thankiu, tingting and wari, and tu, olketa samting wea iumi needim long God