Wanfala Young Wan wea Praod Abaotem Religion Bilong Hem
TAEM hem 13 year, Andrew kasem wanfala skul assignment abaotem history bilong wanfala grup bilong pipol. “Firstaem,” hem sei, “mi ting for raet abaotem grandadi bilong mi, bat then mi ting moa: ‘Weit firstaem! Mi wanfala Jehovah’s Witness. Diswan hem nambawan chance for tokaot abaotem faith bilong mi!’
“Mi chusim ‘Stand Strong’ olsem theme long assignment bilong mi and mekem wanfala bigfala piksa wea showimaot barava raf persecution wea Olketa Jehovah’s Witness feisim long Nazi Germany. Mi showim samting olsem wanfala uniform wea garem purple triangle witim samfala piksa and leta from Kusserow famili.a Mi garem olketa copy bilong leta wea Olketa Jehovah’s Witness sendem go long gavman bilong Germany for givimaot. Long wei wea no teksaed witim politik, disfala leta strong for tokdaonem olketa nogud samting wea olketa duim againstim Olketa Jehovah’s Witness. Mi showim tu disfala video Jehovah’s Witnesses Stand Firm Against Nazi Assault witim olketa Bible, brochure, and tract for pipol lukim.
“Firstaem, olketa putim assignment bilong mifala insaed wanfala bigfala hall bilong skul for showim long evri student and teacher. Long nextfala evening olketa invaetem kam olketa famili and fren. Planti askem mi olketa kwestin, bikos olketa no savve hao Nazi persecutim Olketa Jehovah’s Witness.”
Andrew talemaot hao hem needim strong for tokaot abaotem faith bilong hem. “Mi savve samfala pipol bae mekfani long mi,” hem sei, “bat mi bae feel nogud tumas sapos mi no tokaot abaotem faith bilong mi. Insaed assignment bilong mi, mi story abaotem pipol wea lusim laef bilong olketa for defendim faith bilong olketa long Jehovah, so smol samting wea mi savve duim nao hem for stand strong long nogud toktok.”
Gogo bihaen Andrew hem hapi hao hem iusim gud disfala chance for givim witness. “Mi story witim planti pipol abaotem why nao mifala no go long war, and mi givimaot olketa Bible, buk, and tract long olketa wea interest,” hem sei. Then hem sei moa: “Mi no savve tingim eni narataem wea mi moa praod from mi wanfala Jehovah’s Witness.”
[Footnote]
a Taem pipol lukim olketa wea werem uniform wea garem purple triangle insaed olketa camp, olketa bae luksavve olketa nao Jehovah’s Witness. Datfala Kusserow famili stand strong long biliv bilong olketa olsem Olketa Jehovah’s Witness long taem bilong Nazi. Lukim The Watchtower bilong September 1, 1985, page 10-15.