Report Bilong Olketa wea Talemaot Kingdom
Tingim “Olketa wea Safa wea Pipol Forgetim”
LONG start bilong 2001, Haykaz, wanfala Witness bilong Jehovah wea 15 year, hem visitim “Olketa wea Safa wea Pipol Forgetim,” wanfala show long Bern, Switzerland, wea storyim persecution wea olketa Nazi bin duim long Olketa Jehovah’s Witness. Bihaen datfala visit, Haykaz sei: “Mi bin herem barava nogud wei wea Olketa Jehovah’s Witness safa anda long rul bilong Nazi, bat diswan nao firstaem wea mi lukim olketa pepa and piksa bilong datfala taem. Olketa piksa, report bilong olketa wea lukim, and koment bilong olketa man for raetem history hem barava affectim mind and heart bilong mi.”
No longtaem bihaen, taem Haykaz kasem assignment for raetem wanfala report for olketa long class bilong hem long hae skul, hem chusim topic “Olketa Jehovah’s Witness—Olketa wea Safa wea Pipol Forgetim Long Rul bilong Nazi.” Teacher bilong hem letem hem for story abaotem datfala topic bat hem talem Haykaz for mas iusim olketa history buk for tekem information bilong hem. Haykaz hapi for duim datwan. “Mi raetem olketa main point bilong samfala buk abaotem Olketa Jehovah’s Witness long taem bilong Nazi rul wea mi readim. Mi storyim tu feeling and tingting bilong miseleva abaotem show bilong ‘Olketa wea Safa wea Pipol Forgetim.’ Mi putim olketa example and foto tu long datfala report wea garem 43 page.”
Long November 2002, Haykaz givim report bilong hem long olketa skulfren, teacher, famili, and fren. Bihaen, olketa duim kwestin and ansa, and diswan givim hem chance for explainim olketa samting wea hem bilivim wea kam from Bible. Taem wanfala girl long audience askem hem why nao hem chusim datfala topic, Haykaz explainim hao staka buk wea storyim history no talem eniting abaotem Olketa Jehovah’s Witness and hem laekem pipol for savve wei wea olketa Witness no fraet for stand strong long Christian faith bilong olketa. Wanem nao kamaot from tok wea hem givim?
Haykaz sei: “Staka skulfren bilong mi sapraes fogud. Olketa no savve wei wea Olketa Jehovah’s Witness olsem wanfala sekson kasem strongfala persecution. And tu, staka no savve hao olketa Witness wea stap long olketa Nazi concentration camp garem wanfala spesol saen, hem nao wanfala purple triangle.”
Bihaen tok bilong hem, Haykaz garem staka chance moa for story long olketa skulfren bilong hem and for storyim biliv bilong Olketa Witness wea garem faondeson long Bible saed long blood transfusion, alcohol, and fasin. Haykaz sei: “No eni skulfren bilong mi mekfani or tok spoelem mi.” Nara samting tu, distaem olketa keepim report bilong hem long skul library. Datwan bae help for mek sure pipol no forgetim datfala wei wea Olketa Jehovah’s Witness stand strong.