Honey—Wanfala Swit Medicine
SAMFALA wea duim medical research barava hapi for faendem hao honey garem samting wea savve stopem infection and wei wea body savve boela. The Globe and Mail niuspepa bilong Canada hem report: “Long wei wea difren from staka spesol medicine wea kamap iusles distaem againstim samfala germ wea resistant, honey savve faet againstim samfala germ hia wea kosim infection from kill long body.”
Hao nao honey savve duim kaen healing olsem? Insaed ansa hem samting wea bee hem duim for tekem swit wata bilong olketa flaoa. Spit bilong bee garem glucose-oxidase insaed long hem, wanfala samting wea savve pisisim sugar insaed wata bilong datfala flaoa. Samting wea kamaot from datwan hem hydrogen peroxide, wea pipol iusim for longtaem finis for klinim and aotem infection from olketa kill long body. Planti taem hydrogen peroxide duim gud samting long kill for shortfala taem nomoa, bat honey hem difren. Globe report hem sei: “Taem iu putim honey long wanfala kill, hem join witim wata from body, and diswan katem daon strong bilong honey.” Diswan mekem samfala change kamap. Isisi sugar insaed datfala honey hem pisis. Diswan minim datfala hydrogen peroxide hem isisi kamap, long wei wea fit for killim dae olketa germ bat no spoelem healthy skin wea stap raonem datfala kill.
Globe hem talem hao honey garem planti samting wea savve help for healim olketa kill. “For putim lelebet honey antap long wanfala kill hem protectim skin and stopem hem for garem hardfala soa. Honey hem helpem body for wakem olketa niu smol vein for blood and olketa cell wea mekem niu skin.” And tu, honey hem help for “stopem boela, helpem blood for muv raon insaed body and hem stopem kill for ‘garem nana.’ ”
Bat, datfala report givim warning hao “honey hem no medicine wea fitim evriwan.” Insaed samting olsem 5 percent bilong honey hem botulism bacteria. Olketa organization olsem Health Canada’s Botulism Reference Service and tu samfala wea deal witim sik bilong olketa pikinini, sei hem no fitim for givim honey long olketa pikinini wea no kasem wan year bikos “olketa baby no garem yet samfala samting long body wea savve protectim olketa from datfala bacteria.”