Tingting Bilong Bible
Hao Nao God Ting Long Raf Fasin?
RAF fasin hem stap long evri ples and hem kamap long planti difren wei. For join witim war, raf fasin kamap long skul, long wakples, long sports, midolwan olketa gang, and bikos long wei for tekem drug, saed long entertainment tu. Raf fasin hem normal samting nomoa long planti famili. Olsem example, wanfala research no longtaem go nomoa sei long Canada, partner bilong 1.2 million man and woman attakim olketa long raf wei wantaem insaed faevfala year. Narafala research sei samting olsem 50 percent bilong olketa man wea killim waef barava spoelem pikinini bilong olketa long raf wei tu.
Tru nao, olsem planti pipol maet iu seke and feel nogud tumas long kaen raf fasin hia. Nomata olsem, raf fasin hem wanfala big part bilong entertainment distaem. Pipol evriwea laekem tumas raf fasin insaed olketa movie and tu raf fasin wea really happen wea olketa showim long television. Pipol long planti kantri laekem tumas boxing and olketa nara raf sport. Bat hao nao God ting long raf fasin?
Longfala History Bilong Raf Fasin
Raf fasin garem longfala history. First raf fasin wea man duim hem stap insaed long Bible long Genesis 4:2-15. Cain, firstborn son bilong Adam and Eve hem jealous long brata bilong hem Abel and killim hem dae stret. Hao nao God ting long diswan? Bible sei Jehovah God givim strong panis long Cain from hem killim dae brata bilong hem.
Long Genesis 6:11, iumi readim hao winim 1,500 year bihaen datwan happen, earth hem “fulap witim raf fasin.” Hao nao God ting long diswan? Hem givim komand for raeteous Noah for buildim wanfala ark wea bae mekem hem and famili bilong hem stap sef taem Jehovah mekem wanfala flood kamap long earth, and “finisim” datfala raf world. (Genesis 6:12-14, 17) Bat wanem nao mekem pipol garem strong feeling for duim raf fasin?
Paoa Bilong Olketa Demon
Story bilong Genesis showimaot hao olketa son bilong God, olketa angel wea no obey, kamap olsem man, maritim olketa woman, and garem pikinini. (Genesis 6:1-4) Olketa pikinini hia, wea pipol kolem Nephilim, olketa big fogud and garem bignem. Anda long paoa bilong olketa dadi bilong olketa wea demon, olketa kamap raf pipol. Taem wata bilong flood hem kamap big and kavarem earth, olketa wicked raf pipol hia dae. Bat luk olsem olketa demon changem bak body bilong olketa and go bak long spirit world.
Bible showimaot klia dat olketa bighed angel hia barava spoelem olketa man start kam from datfala taem. (Ephesians 6:12) Bible kolem leader bilong olketa, Satan, firstfala “man for killim dae man.” (John 8:44) So, iumi fit for sei raf fasin wea kamap long earth distaem kam from olketa demon, or Satan.
Bible givim warning abaotem paoa wea raf fasin garem for pullim man. Proverbs 16:29 hem sei: “Man bilong raf fasin bae switim nara man, and bae mekem hem followim wanfala wei wea nogud.” Diswan switim planti distaem for appruvim, saportim, or duim olketa raf samting. And tu, planti million pipol laekem tumas entertainment wea mekhae long raf fasin. Toktok bilong Psalm 73:6 hem fitim genereson bilong distaem. Man wea raetem psalm hem sei: “Praod fasin hem olsem nekles for olketa; raf fasin hem kavarem olketa olsem wanfala kaleko.”
God Heitim Raf Fasin
Wanem fasin nao olketa Christian shud showimaot insaed world wea raf tumas? Story long Bible abaotem Simeon and Levi, tufala son bilong Jacob, givim iumi gudfala advaes. Sista bilong tufala, Dinah, hem kaban witim pipol bilong Shechem wea duim dirty fasin. Samting wea kamaot from diswan nao hem wei wea wanfala man bilong Shechem hem spoelem hem saed long sex. Simeon and Levi pei bak long barava nogud wei taem olketa busarem evri man bilong Shechem. Bihaen, God muvim Jacob for cursim nogud kros bilong tufala son bilong hem witim disfala toktok: “Simeon and Levi tufala brata. Tul bilong raf fasin nao wanem tufala iusim for busarem man. No kamap klos fren bilong tufala, O soul bilong mi. No join witim kongregeson bilong tufala.”—Genesis 49:5, 6.
Olketa Christian followim olketa toktok hia taem olketa no kaban witim pipol wea apim or duim raf fasin. Tru nao, God heitim olketa wea saportim raf fasin. Bible sei: “Jehovah seleva hem lukluk gud long raeteous man and wicked man tu, and soul bilong Hem barava heitim eniwan wea lovem raf fasin.” (Psalm 11:5) Olketa Christian kasem kaonsel for stap klia long evri kaen wei for no bossim kros, and nomata raf toktok tu.—Galatians 5:19-21; Ephesians 4:31.
Waswe, Enitaem Raf Fasin Bae Finis?
Buk bilong profet Habakkuk askem Jehovah God olsem: “Hao long nao mi mas askem iu for help from raf fasin?” (Habakkuk 1:2) Maet iu askem finis semkaen kwestin. God ansarem Habakkuk, taem hem promis for finisim “wicked wan.” (Habakkuk 3:13) Profesi buk bilong Isaiah givim hope tu. Long there God hem promis: “Bae raf fasin no stap moa long land bilong iu, wei for barava spoelem or brekdaon insaed long area bilong iu.”—Isaiah 60:18.
Olketa Jehovah’s Witness barava sure klosap nao God bae aotem from earth evri kaen raf fasin and olketa wea saportim. Long datfala taem, no eni raf fasin bae stap bat “earth bae fulap witim savve bilong glory bilong Jehovah olsem olketa wata seleva kavarem sea.”—Habakkuk 2:14.
[Piksa long page 14]
Raf fasin start taem Cain killim dae Abel