Kwestin From Reader
Waswe, for pleim raf game long computer savve spoelem wei wea man fren witim Jehovah?
King David bilong Israel raet olsem: “Jehovah hem lukluk gud long raeteous man and wicked man tu, and soul bilong Hem barava heitim eniwan wea lovem raf fasin.” (Psalm 11:5) Hebrew word for “heit” savve minim “man wea enemy.” So, eniwan wea lovem raf fasin hem mekem hemseleva enemy bilong God. So kwestin wea iumi need for tingim nao, hem olsem: Waswe, for pleim raf game long computer hem mekem man for lovem raf fasin?
Olketa raf game long computer mekhae long wei for iusim olketa samting for killim man dae. Plande taem, olketa game hia trainim man hao for faet long war. Wanfala magasin, The Economist, hem sei: “Army bilong America barava depend long olketa game long computer for trainim olketa man for faet. Samfala game wea army iusim olketa salem tu long stoa.”
Hem tru, olketa wea pleim raf game long computer no killim really pipol. Bat wei wea olketa chusim hapitaem olsem hem showimaot wanem nao maet affectim heart bilong olketa? (Matthew 5:21, 22; Luke 6:45) Wanem nao tingting bilong iu abaotem man wea enjoyim wei for busarem, sutim, killim dae, and mekem garekil olketa pipol wea no real? Waswe sapos disfala man spendem staka hour evri week for satisfaem feeling bilong hem for laek duim raf samting, wea gogo hem no feel satisfae sapos hem no pleim kaen game olsem? Maet iu no garem barava nogud tingting againstim hem, bat bae iu tingse disfala man hem mekem grow love for raf fasin, semsem olsem man wea lukluk long dirty piksa hem mekem grow dirty feeling.—Matthew 5:27-29.
Hao strong nao feeling bilong Jehovah for heitim man wea lovem raf fasin? David sei Jehovah “barava heitim” hem. Long taem bilong Noah, Jehovah showimaot hao hem barava heitim man wea lovem raf fasin. Jehovah sei olsem long Noah: “Hem kasem taem nao for evri man mas finis, bikos earth hem fulap witim raf fasin bikos long olketa; and mi bae finisim olketa witim disfala earth.” (Genesis 6:13) Trufala God finisim evri man bikos long raf fasin bilong olketa. Hem sevem nomoa Noah and famili bilong hem—eitfala pipol wea no lovem raf fasin.—2 Peter 2:5.
Pipol wea want for frenim Jehovah, “mas hammerim sword bilong olketa for kamap hou and spia bilong olketa for kamap naef for katem tree.” Winim wei for lane for lovem raf fasin, olketa no “lanem war moa.” (Isaiah 2:4) Sapos iumi laek for stap olsem fren bilong God, iumi “mas tanawe from samting wea nogud and duim samting wea gud.” Iumi need for “lukaotem peace and aftarem.”—1 Peter 3:11.
Waswe sapos iumi pleim finis raf game long computer? Iumi mas disaed strong for mekem Jehovah hapi taem iumi lusim wei for duim samting wea hem heitim. Iumi shud prea for holy spirit bilong Jehovah helpem iumi stop for duim disfala samting wea savve spoelem wei wea iumi fren witim hem. Iumi savve stop sapos iumi letem olketa kaen fasin olsem peace, gudfala fasin, and fasin for kontrolem seleva, for mekem iumi live followim olketa wei bilong God.—Luke 11:13; Galatians 5:22, 23.