Kasem Stretfala Information

Hem hard for luksavve long stretfala information abaotem olketa difren kaen samting. Olketa gavman and company savve talem toktok wea no tru evribit. Niuspepa, radio, and television planti taem promis for no teksaed taem olketa givim report bat olketa nating fulfillim. Planti taem olketa doctor no explainim evribit nogud saed bilong medicine wea olketa givim iumi. Waswe, eni wei stap for kasem information wea man fit for trustim?

Planti pipol praisem Internet olsem nambawan ples for kasem gudfala information from raonem world. Bat iu savve kasem information hia only sapos iu savve long stretfala ples for faendem diswan insaed Internet. Wanfala article insaed The New York Times hem sei: “For tingim gud saed bilong hem, Internet savve mekem moa pipol lanem samting kwiktaem winim eni samting wea pipol iusim for talem nius. Nogud saed bilong hem, hem savve kwiktaem spoelem wei for iusim tingting winim eni samting wea pipol iusim for kasem nius.”

Datfala article go ahed for sei: “Bikos pipol tinghae tumas long Internet olsem hem wanfala ‘technology,’ olketa wea no garem bigfala education barava bilivim information wea kam from hem. Olketa no luksavve long nogud saed bilong Internet, hao hem olsem open toilet drain: wanfala electronic drain for putim enikaen information wea olketa no chekim for lukim sapos hem gud or nogud.” Sorre samting, olsem datfala man for raet hem talem, no eni software program stap for aotem olketa rabis hia insaed computer.

Eniwan savve putim eni samting insaed Internet, insaed wanfala magasin or wanfala buk. Dastawe, iumi need for garem fasin for luksavve and lanem samting mekem iumi no bilivim enikaen samting iumi readim. Evriwan long iumi wea wantem information wea stret evribit mas mek sure hao hem fitim for iumi trustim samting wea iumi readim. Diswan tek taem. Bat bihaen iumi duim diswan and kasem stretfala information, iumi savve tingting stret, disaed long stretfala wei, and feel sure taem iumi mekem olketa important disison.