Iusim Internet Long Wisefala Wei

INTERNET mekem pipol for savve long staka difren samting. Pipol savve iusim Internet long eni ples wea olketa stap or enitaem long day. Pipol evriwea long world iusim Internet for story witim narawan.

Wei for story hem nambawan present wea iumi kasem from God. Iumi savve storyim olketa idea and information long narawan. Jehovah nao first wan for story long Adam and Eve. Hem talem tufala wanem for duim mekem tufala enjoyim laef. (Gen. 1:28-30) Bat nomata iumi garem disfala present for story, sapos iumi no careful iumi savve iusim long rong wei. Hem nao wanem Satan duim long Eve. Satan laea long hem and Eve bilivim hem. Then Eve storyim datwan long Adam. From Adam bilivim wanem hem herem, hem duim samting wea mekem evriwan long world kasem nogud samting.—Gen. 3:1-6; Rom. 5:12.

Internet savve helpem iumi for kasem important information and for kwiktaem duim samting. Bat staka information long Internet hem no tru. Internet savve mekem iumi for weistim staka taem and hem isi tumas for iumi lukim olketa rabis samting. Bae iumi storyim hao for iusim Internet long wisefala wei.

Waswe, Information Hem Tru or Nomoa?

No tingse evri information long Internet hem gud. Taem iumi lukluk long Internet, iumi savve faendem information wea barava gud or wea nogud. Dastawe iumi mas wise and chusim nomoa information wea bae helpem iumi.

Distaem eniwan wea iusim Internet savve laea for sei olketa savve long staka samting and pipol no need for givim nem bilong olketa tu. Eniwan nomoa savve putim long Internet olketa idea bilong hem, eni information, and olketa piksa.

No kwiktaem for bilivim information wea iu kasem. Tingim olketa kwestin hia: (1) Hu nao putim information hia long Internet? Waswe, iumi savve trustim man wea raetem datwan? (2) Why nao hem putim datfala information long Internet? Wanem nao mekem hem for raetem datwan? Waswe, hem laek for talem stretfala information or mekhae long idea bilong hemseleva nomoa? (3) Wea nao hem kasem datfala information? Waswe, hem talem tu wea nao hem tekem information mekem olketa narawan savve chekim? (4) Waswe, datfala information hem fitim for pipol iusim distaem? Long first century, aposol Paul givim advaes long Timothy wea fitim iumi distaem. Paul sei: “Protectim gud wanem iu kasem from God. No lisin long olketa iusles toktok wea againstim God, and olketa idea wea pipol sei hem stret bat wea no stret and wea mekem pipol konfius and no agree long eni samting.”—1 Tim. 6:20.

Waswe, Internet Mekem Iumi Garem Taem or Weistim Taem?

Sapos iumi iusim Internet long wisefala wei, hem savve helpem iumi for no weistim taem, strong, and selen bilong iumi. Iumi savve baem samting long Internet and no need for go long stoa. Internet helpem iumi tu for faendem cheap price long samting wea iumi laek baem. Pipol savve chekim bank account bilong olketa long Internet and peim olketa kaon. Iumi savve planim holiday bilong iumi long Internet and peim ticket for go. Hem isi tu for faendem telephone namba and address bilong pipol and hao for kasem ples wea iumi laek for go. Olketa branch office bilong Olketa Jehovah’s Witness long world iusim Internet for duim olketa samting olsem and datwan helpem olketa for no weistim taem, selen, and olketa nara samting.

Bat wei for lukluk long Internet savve spoelem iumi tu. Olsem example, hem gud for tingim haomas taem nao iumi iusim for lukluk long Internet. Samfala iusim staka taem for pleim olketa game, baem olketa samting, story long narawan, sendem olketa e-mail, lukaotem information, or lukluk nomoa long eni samting. Gogo datwan savve mekem olketa for no garem taem for famili, olketa fren, and olketa long kongregeson. Internet savve kamap main samting long laef bilong olketa.

Wanfala branch office bilong Olketa Jehovah’s Witness kasem leta from wanfala brata wea sei Internet kamap main samting long laef bilong hem. Samfala day, hem savve lukluk long Internet for 10-fala hour. Hem sei “firstaem mi tingse wanem mi duim hem olraet nomoa.” Bat then hem sei: “Gogo mi no go evritaem long olketa meeting and mi no savve prea.” Taem hem go long olketa meeting, hem no savve prepare and taem meeting gohed hem tingim nomoa for go bak long haos for “lukluk long Internet.” Gogo hem luksavve datwan barava spoelem hem and hem duim samting for changem wei bilong hem. Iumi mas careful for no iusim staka taem for lukluk long Internet wea datwan savve kamap main samting long laef bilong iumi.

Wanem Samting Nao Iu Lukluk Long Hem Long Internet?

Long 1 Thessalonians 5:21, 22, hem sei: “Chekim evri samting for mek sure long wanem hem tru, and followim datwan. No duim eni nogud samting.” Taem iumi lukluk long Internet, iumi mas tingim wanem nao tingting bilong Jehovah. Samting wea iumi lukim mas fitim wanfala Christian. Staka rabis piksa stap long Internet wea pipol lukluk long hem, so iumi mas careful nogud datwan spoelem iumi.

Tingim diswan: ‘Taem mi lukluk long Internet, waswe, mi kwiktaem haedem wanem mi lukim from hasband or waef, mami or dadi, or olketa Christian brata and sista sapos olketa kam insaed rum bilong mi?’ Sapos olsem, hem gud for lukluk long Internet taem olketa narawan stap. Internet barava changem wei wea pipol story tugeta and wei for baem samting. Bat nara samting tu, Internet savve mekem pipol for ‘duim adultery long heart bilong olketa.’—Matt. 5:27, 28.

Waswe, Iumi Shud Sendem Information Long Narawan?

Taem iumi iusim Internet, iumi savve sendem information long narawan and kasem information from olketa. Iumi mas mek sure information wea iumi raetem or sendem hem tru, hem fitim wanfala Christian, and iumi garem raet for sendem datwan.a Waswe, datfala information bae helpem narawan? Why nao iumi laek for sendem datwan? Waswe, hem bikos iumi laekem narawan for tinghae long iumi?

E-mail hem gud samting sapos iumi iusim long stretfala wei. Bat hem savve mekem iumi kasem staka information wea no important tu. Waswe, iumi sendem staka information long olketa narawan for readim wea savve spoelem taem bilong olketa? Hem gud for tingim reason why iumi laek for sendem datfala information. Long bifor, pipol savve raetem leta long famili and olketa fren abaotem olketa experience and wanem olketa duim. Kaen samting olsem nao hem gud for iumi raetem long e-mail. Hem gud for no sendem information long narawan wea maet hem no tru.

So waswe, diswan minim iumi shud no iusim Internet nao? Maet for samfala pipol, hem gud for olketa no iusim. Hem nao wanem datfala brata wea iumi storyim finis mas duim. Internet savve helpem iumi sapos iumi garem ‘gudfala tingting and wei for luksavve.’—Prov. 2:10, 11.

[Footnote]

[Piksa long page 4]

Wanem nao bae helpem iu luksavve information wea iu kasem hem tru?

[Piksa long page 5]

Wanem nao iu shud tingim bifor iu sendem information long narawan?