Young Pipol Ask . . .

Olketa Music Video​—Hao Nao Mi Savve Chus Gud?

“Taem mi lukim nem bilong wanfala grup or song wea no fitim, mi kwiktaem chusim difren Television channel.”​—Casey.

OLKETA MUSIC VIDEO​—planti young wan barava enjoyim. Bat olsem wanfala article bifor wea storyim diswan showimaot, planti music video garem olketa barava dirty piksa saed long sex and raf fasin.a Tru nao, taem eni hapitaem hem mekhae long samting wea God againstim, Christian shud stap klia from wei for lukluk long hem. Bat, no evri music video showimaot dirty piksa. Samfala maet lelebet gud. Olketa narawan maet luk olsem no eni nogud samting stap insaed. Nomata olsem, olketa video olsem savve givim idea wea go againstim Word bilong God long wei wea haed.

Sapos parents bilong iu letem iu for lukluk long olketa music video, iu bae need for chus gud and iusim ‘paoa for luksavve’ wea Bible trainim mekem iu luksavve long wanem nao hem fitim or no fitim for lukim. (Hebrews 5:14) Olketa wanem Bible principle nao savve helpem iu long disfala samting? Long hia hem samfala Bible text and koment wea savve helpem iu.

Proverbs 4:23: “Winim eni nara samting wea iu mas protectim, protectim gud heart bilong iu, from olketa samting bilong laef kamaot from hem.” Waswe, iu garem samfala samting for sports or wanfala music instrument wea barava spesol tumas long iu? For sure iu trae for keepim gud and putim long wanfala sef ples. Tru nao, iu bae no putim long road and no lukluk long hem, nomata for shortfala taem, from iu fraet nogud eniwan spoelem or stealim. Tru nao, iu protectim datfala samting. Long sem wei, iu mas disaed strong for protectim heart bilong iu, no putim hem long danger thru long olketa nogud hapitaem nomata for shortfala taem nomoa.

Ephesians 2:1, 2: “Iufala nao God mekem laef nomata iufala dae finis long olketa rong and sin bilong iufala, wea bifor iufala wakabaot followim system bilong disfala world, followim ruler bilong paoa bilong air, datfala spirit wea waka distaem insaed olketa son wea no obey.” Disfala air hem spirit bilong world, wei for tingting wea mekem kamap olketa fasin wea no followim God. Disfala spirit hem showaot long planti music video and hem barava againstim spirit bilong God, wea mekem kamap olketa fasin olsem hapi, peace, and fasin for bossim seleva.—Galatians 5:22, 23.

2 Timothy 2:22: “Ranawe from olketa samting wea young pipol wantem.” Wei for lukluk long olketa piksa wea showim sex—nomata for shortfala nomoa—bae mekem feeling for laek duim sex kamap moa strong. Planti young wan talemaot hao olketa faendem hard for forgetim olketa piksa olsem; olketa savve lukim moa insaed mind bilong olketa. Wanfala young man wea nem bilong hem Dave, wea lukim wanfala nogud video, talemaot olsem: “Bihaen datwan, evri taem mi herem datfala song mi tingim nao datfala video.” For lukluk long kaen video olsem savve mekem kamap feeling for laekem sex.—1 Corinthians 6:18; Colossians 3:5.

Proverbs 13:20: “Man wea wakabaot witim wise pipol bae kamap wise, bat man wea kaban witim stupid pipol bae kasem trabol.” Askem iuseleva, ‘Waswe, mi bae invaetem olketa wea duim raf fasin, spiritism, drunk, or dirty fasin insaed haos bilong mi?’ Wei for kaban witim pipol olsem thru long television hem olsem wei for invaetem olketa kam long haos bilong iu. Waswe, for duim olsem savve mekem iu “kasem trabol”? Kimberly sei olsem: “Mi lukim long samfala party wei wea olketa girl dress ap or act olsem pipol wea olketa lukim insaed video.” Maet iu lukim tu sem samting olsem. Taem olketa act olsem pipol wea nating respectim olketa hae mark bilong God, olketa young wan hia showimaot olketa start finis for “kasem trabol.” So stap klia evribit from enikaen wei for “kaban witim nogud pipol.”—1 Corinthians 15:33.

Psalm 11:5: “Jehovah seleva hem lukluk gud long raeteous man and wicked man tu, and soul bilong Hem barava heitim eniwan wea lovem raf fasin.” Sapos iumi lukluk long olketa video wea mekhae long raf fasin wea spoelem man, diswan showimaot iumi ‘lovem raf fasin’!

Challenge Bilong Wei for Chus

From “full world hem stap long paoa bilong wicked wan,” hem kamap moa hard for faendem hapitaem wea free from tingting and wei bilong world. (1 John 5:19) Samfala music-video channel savve showim staka nogud video. Nomata dirty or raf fasin no showaot klia, planti taem hem still mekhae long spirit bilong world. Wanfala man for pleim music sei wanfala music-video channel wea staka pipol savve “hem change from wanfala music channel for kamap ‘wanfala channel wea mekhae long olketa difren kaen fasin and living wea world tinghae long hem.’ ”

Maet ansa for diswan hem simpol: Sapos wanfala video hem nogud, change go long difren channel. Problem nao hem, maet iu need for careful taem iu lukluk long olketa nara Television channel. Planti program barava showim raf fasin or dirty fasin and toktok or showim pipol wea garem nogud fasin. For tok stret, man savve feel nogud taem hem trae for enjoyim program long television and long semtaem mas stap redy for change go long difren channel. And samfala taem, nomata iu change go long narafala channel, samting iu lukim hem spoelem iu finis. Olketa dirty piksa hia stap insaed mind finis. Nomata olsem, iu savve sure hao Jehovah God bae blessim wei wea iu trae hard for protectim heart bilong iu.—2 Samuel 22:21.

Olketa nara samting for duim stap tu wea savve helpem iu. Casey, wea iumi story abaotem finis, explainim wanem hem faendem wea savve help: “Planti taem olketa savve showim nem bilong olketa grup and song title long start bilong datfala video. Pipol savve long olketa grup wea pleim music, so evritaem iu savve long olketa grup and wanem song nao hem nogud. So taem mi lukim nem bilong wanfala nogud grup or song, hem nao taem for change go long difren channel bifor iu savve lukim nogud samting.”

‘Talem Trufala Toktok Insaed Heart Bilong Iu’

Nomata iu savve gud long olketa Bible principle, maet iu savve start for acceptim nogud samting. Hao nao olsem? Long wei for letem giaman tingting bossim iu. (James 1:22) Bible talem iumi hao fren bilong Jehovah hem man wea “talem trufala toktok insaed long heart bilong hem.” (Psalm 15:2) So mas honest witim iuseleva. Stap klia long giaman fasin. Sapos iu talem iuseleva hao hem olraet nomoa for lukluk long samting wea maet hem nogud, askem iuseleva, ‘Waswe, Jehovah bae really appruvim wei wea mi lukluk long diswan?’ Remember, planti taem challenge hem no for savve long wanem hem stret or rong bat for disaed strong hao iu bae duim wanem hem stret! Iu mas tingim wei wea iu fren witim Jehovah nao hem moa spesol winim samfala kaen hapitaem.—2 Corinthians 6:17, 18.

Disison for chus gud wea hafhaf lelebet hem no inaf. Wei wea iu disaed olsem savve kwiktaem lus from iu no disaed strong. Bible talem iumi hao datfala man bilong God wea nem bilong hem Job disaed strong for faithful long waef bilong hem. Hem sei: “Wanfala covenant nao mi mekem witim eye bilong mi. So hao nao mi savve interest long eni young girl?” (Job 31:1) Tingim datwan! Job mekem wanfala covenant, or serious kontrak, witim hemseleva for wanem nao hem savve letem eye bilong hem lukim. Iu savve duim sem samting. Disaed strong—wanfala serious promis wea iu mekem long iuseleva—for no lukluk long olketa nogud samting. Markem olketa spialaen. Prea abaotem diswan. Then keepim agreement bilong iu, wea iu savve raetem sapos datwan bae helpem iu. Sapos iu needim extra saport, iu savve storyim diswan witim samwan wea moa old wea iu trustim—olsem parents bilong iu.

From olketa tingim olketa danger hia, samfala young Christian disaed for no lukluk long eni music video. Nomata wanem nao disison bilong iu long diswan, iusim paoa bilong iu for luksavve. Keepim klinfala conscience. Sapos iu bae acceptim nomoa olketa hapitaem wea gud and wea savve strongim man, iu savve stap klia long wei for kasem nogud samting and tu iu bae keepim wei wea iu fren witim Jehovah.

[Footnotes]

[Piksa long page 20]

Samfala video wea no showimaot klia dirty fasin still mekhae long olketa nogud idea

[Piksa long page 21]

Disaed strong hao iu bae no lukluk long olketa samting wea God no appruvim