Young Pipol Ask . . .

Waswe, Mi Shud Lukluk Long Olketa Music Video?

“Olketa music video barava gud. Samfala long olketa hem olsem olketa short movie. Olketa talem wanfala story, and mi laekem tumas hao olketa dance.”​—Casey.

“Hem wanfala gudfala wei for faendem niu music. Olketa givim iu moa samting winim regular top-40 music. And tu, olketa music video hem gud subject for storyim.”​—Josh.

“Evri information insaed video hem important long mi—olketa showim mi hu nao singsing, wanem nao hem werem, hao hem act. Evri samting hia givim mining long olketa toktok long song.” ​—Kimberly.

“Mi laek for lukim wanem olketa favorite band wea mi laekem tumas bae duim distaem. Mi laekem tumas spesol wei wea olketa wakem. And samfala video hem fani. Bat iu need for careful.”​—Sam.

MAET iu tu enjoyim wei for lukluk long olketa music video. Taem olketa first showaot long television, olketa simpol nomoa. Bat from hem showaot klia hao pipol laekem tumas and hao olketa mekem pipol baem staka moa record, olketa music video kwiktaem kamap barava spesol and interesting samting for lukluk long hem. Distaem hem wanfala important part bilong music world and staka young pipol barava laekem. Samfala kantri garem olketa television station for showim olketa music video nomoa!

Bat why nao olketa young wan olsem Sam, wea iumi talem finis toktok bilong hem, sei need hem stap for mas careful? Waswe, hem maet bikos samfala music video savve affectim iu long nogud wei—maet spoelem tingting and fasin bilong iu or spoelem wei wea iu fren witim Creator bilong iu? Diskaen kwestin maet luk olsem hem lelebet ova tumas. Bat tingim, Sapos iu go swim long river or long sea and iu lukim olketa warning saen wea sei hem danger for swim long there, waswe, bae iu no warim nomoa olketa warning olsem? Nomoa nao. So, iu bae wise for tingim samfala warning saed long olketa music video.

Danger Ples

Iu need for luksavve hao samting iu lukim and herem savve affectim iu! Bible talem iumi hao first king bilong Israel, Saul, iusim music for helpem hem—for strongim feeling bilong hem. (1 Samuel 16:14-23) Waswe, music savve affectim man long nogud wei tu? Datfala buk Rock and Roll—Its History and Stylistic Development talem disfala point: “Man no savve sei music garem paoa for affectim man long samfala samting, bat long olketa nara samting hem no savve affectim man. Sapos iumi luksavve hao rock music bin affectim pipol long gudfala wei (wea diswan hem tru), iumi mas willing for luksavve tu hao hem bin affectim pipol long nogud wei (wea diswan tru tu). Eniwan wea sei ‘Mi lisin long music, bat hem no affectim mi’ hem nating savve long stretfala information abaotem diswan.”

Planti taem Bible storyim wei wea eye savve affectim tingting and feeling bilong iumi. (Proverbs 27:20; 1 John 2:16) So taem olketa wea wakem video addim go long music samting wea man savve lukim, diswan barava mekem big moa paoa bilong music for affectim olketa wea lisin long hem. Wanem kaen samting for lukim nao olketa iusim evritaem?

Olsem wanfala study showimaot, samting olsem 57 percent bilong olketa rock music video garem raf fasin. Samting olsem 76 percent showim tu akson saed long sex. Narafala study wea olketa duim no longtaem go nomoa faendem tu hao 75 percent bilong olketa video wea garem story, showim samting saed long sex, and winim haf long olketa garem raf fasin, planti taem againstim olketa woman. So, waswe, wei for lukluk long olketa video olsem savve really spoelem iu? Wanfala magasin showimaot hao “olketa study wea olketa duim faendem hao wei for lukluk long olketa music video savve affectim tingting bilong olketa young wan saed long wei for duim sex taem olketa young yet or sex wea no sef.” And no eniwan savve denyim hao taem olketa man for pleim music trae for winim pipol wea sem age and olketa nara music grup long wei for mekem pipol seke long samting olketa duim, diswan mekem olketa music video garem olketa barava nogud samting insaed.

Wanfala savveman saed long education hem sei: “Planti pipol argue hao wanem olketa herem—and lukim, witim help bilong olketa music video—hem no difren from wei wea music affectim pipol bifor. . . Bat luk olsem bigfala haf bilong olketa wea pleim music barava hapi nomoa for iusim dirty toktok and duim rabis samting olsem gudfala wei for sellim staka moa music.” And Chicago magasin hem sei olsem abaotem olketa wea lukluk long wanfala music video channel: “Samting olketa lukim hem fulap witim olketa rabis samting saed long sex wea ova tumas and wea mekem man garem dirty tingting.”

Chicago magasin storyim tu wanfala music video wea showim “wanfala young man wea sidaon long wanfala tebol long ples for kaikai and muvim bak hed bilong hem. Wanfala big red kat kamap long nek bilong hem then hed bilong hem foldaon.” Narafala video showim rabis wei wea wanfala man isisi aotem kaleko bilong hem, and long semtaem hem aotem skin and olketa masol bilong hem. Olketa nara samting hem nogud tumas and hem no fitim for iumi storyim.

Bat maet samfala ting smol long diswan from olketa sei olketa video hia barava ova tumas, bat staka video no olsem. Samfala maet talem hao olketa no faendem hao olketa music video barava nogud samting. Bat maet olketa sei olsem bikos wei for lukim olketa video olsem evritaem mekem gogo no affectim feeling bilong olketa. Casey, datfala young man wea iumi talem toktok bilong hem finis, sei: “Sapos iu no putim spialaen long wanem nao iu lukluk long hem, samting wea nogud long iu firstaem savve gogo kamap samting nating long iu. Gogo, iu luk for olketa music video wea nogud go moa and iu start for acceptim nomoa samting wea nogud long iu firstaem.”

Wanem nao savve kamaot from diswan? Maet diswan spoelem wei wea iu savve disaed long stretfala wei. From nogud samting savve isi for affectim mind, Bible warnim iumi for “protectim wisdom wea helpem man and wei for tingting gud.” (Proverbs 3:21; 5:2) Nara nogud samting hem hao diswan savve spoelem wei wea iu fren witim Jehovah God. Waswe, datwan hem no barava spesol samting wea iu garem? Dastawe iu need for protectim datfala wei for fren taem iu duim samting for stap klia from enikaen nogud hapitaem. Hao nao iu savve duim diswan?

Protectim Iuseleva

First samting, plis acceptim hao hem rong for lukluk long piksa wea mekhae long olketa fasin wea Bible againstim. (Psalm 11:5; Galatians 5:19-21; Revelation 21:8) Taem wanfala video hem mekhae long olketa samting wea no ‘fitim holy pipol,’ iu mas disaed strong for no lukluk long hem. (Ephesians 5:3, 4) Hem tru, maet wei for change go long nara channel—or offem television—hem no isi taem wanfala video hem interesting. So maet iu need for prea olsem man wea raetem psalm duim wea sei: “Mekem eye bilong mi no lukim rabis samting.”—Psalm 119:37.

Iu maet garem strong feeling for no laek lukim olketa rabis video olsem olketa wea iumi storyim finis. Bat luk olsem olketa wakem samfala video long wei wea nogud samting insaed no showaot klia. Olketa savve showim piksa abaotem sex lelebet taem nomoa. Olketa arrangem gud olketa toktok and piksa bilong video long kleva wei wea apim tingting wea no followim God bat wea no showim and talem eni barava samting abaotem diswan. Nomata olsem, sapos iu lelebet feel guilty bihaen iu lukim kaen video olsem, luk olsem video hem nogud and no fitim Christian long samfala wei. So hao nao iu savve disaedem wanem for lukluk and wanem for stap klia long hem sapos iu no sure?

Tru, for lukluk long olketa music video or nomoa hem disison bilong iuseleva and parents bilong iu, wea garem responsibility for disaedem wanem iu savve lukluk or no savve lukluk long hem. (Ephesians 6:1, 2) Bat sapos parents bilong iu letem iu for lukluk long olketa music video, nomata maet iu tingse wanfala video hem fitim, iu need for ting raonem moa samting. Hebrews 5:14 encouragem iumi for “trainim paoa bilong iumi for luksavve long stret samting or rong samting.” Paoa bilong iumi for luksavve kasem training thru long wei for studyim olketa Bible principle, wea leadim iumi taem iumi disaedem wanem hem gud and wanem hem nogud long tingting bilong Jehovah. Taem iu ting raonem olketa Bible principle olsem, iu bae fit for luksavve long samting wea savve spoelem spiritual health bilong iu, nomata no eni Bible rul stap for leadim iu.

So, olketa wanem Bible principle savve leadim iu saed long wei for lukim olketa music video? Iumi bae storyim diswan long article wea bae kam bihaen.

[Blurb long page 20]

“Eniwan wea sei ‘Mi lisin long music, bat hem no affectim mi’ hem nating savve long stretfala information abaotem diswan”

[Olketa piksa long page 25]

Waswe, fitim for sei man savve lukim nogud samting and datwan bae no affectim hem?