Hao Mi Satisfaem Spiritual Wei for Thirsty
STORY BILONG LUCIA MOUSSANETT
LONG olketa maunten long wanfala farawe ples long northwest bilong Italy, klosap Swiss Alps and Mont Blanc bilong France wea planti pipol savve abaotem, hem ples bilong Valle d’Aosta. Mi born long there long 1941 long wanfala smol community bilong Challant St. Anselme.
Mi nao firstborn long faevfala pikinini; and mi garem fofala brata. Mami hem woman for waka hard and hem wanfala strong Catholic. Dadi tu kam from famili wea tinghae long lotu. Tufala aunty bilong mi saed long dadi, tufala sista bilong Catholic Church. Parents bilong mi duim planti gud samting for mi long material wei, insaed diswan hem wei for givim mi chance for kasem education. No eni skul stap long smol community bilong mifala, so taem mi 11 year, parents bilong mi sendem mi go long wanfala skul wea olketa sista bilong Catholic Church nao ranem.
Long there mi lanem Latin and French languis, witim olketa nara subject. Taem mi 15 year, mi start for tingting moa strong abaotem hao for servem God. Mi ting best wei for duim diswan hem for mi go long wanfala convent. Bat, parents bilong mi no laekem disfala idea, from diswan minim Mami seleva nao mas lukaftarem olketa brata bilong mi. Parents bilong mi hope hao education wea mi kasem bae mekem mi garem gudfala waka and saportim famili saed long selen.
Nomata mi feel sorre hao parents bilong mi no laekem diswan, mi laek for garem really purpose long laef and feel olsem God mas kam firstaem. So, long 1961, mi go long wanfala Roman Catholic convent.
Laef Olsem Wanfala Sista Bilong Catholic Church
Insaed olketa firstfala month, mi studyim olketa standard and rul bilong church and duim waka olsem haos girl long convent. Long August 1961, mi start lane for kamap wanfala sista bilong Catholic Church, and werem kaen kaleko bilong olketa. Mi mekem wanfala niu nem for miseleva, Ines, wea hem nem bilong mami. Olketa acceptim datwan and kolem mi Sister Ines.
Nomata planti wea start lane for kamap sista bilong Catholic Church duim waka olsem haos girl long convent, education wea mi kasem hem fitim for mi waka olsem wanfala primary skul teacher. Tufala year bihaen, long August 1963, mi mekem spesol promis and kamap wanfala sista bilong Catholic Church bilong Sisters of San Giuseppe long Aosta, Italy. Bihaen, datfala convent saportim mi for kasem moa education and sendem mi long University bilong Maria Santissima Assunta long Rome.
Bihaen mi finis skul long Rome long 1967, mi go bak long Aosta and start for teach long wanfala hae skul. Long 1976, mi waka olsem hed bilong datfala skul. Nomata mi teachim samfala class, mi kasem assignment tu olsem principal and kamap wanfala member bilong Valle d’Aosta skul board bilong datfala ples.
Samting wea mi barava laek duim hem for helpem poor pipol. Mi feel sorre tumas for poor pipol. So mi organizem olketa difren program, wea wanfala hem for helpem olketa wea garem sik wea gogo for dae and wea no garem famili. Mi startim tu wanfala program for teachim olketa pikinini wea kam from difren kantri wea stap long there. And tu, mi faendem waka and haos for poor pipol and organizem wei wea olketa savve kasem medical help wea olketa needim. Mi trae hard for followim olketa principle bilong church.
Long datfala taem, mi acceptim Catholic teaching, wea insaed diswan hem olketa teaching olsem Trinity, soul wea no savve dae, and Catholic biliv abaotem laef olowe. Long datfala taem, Catholic teaching letem tu wei for garem winim wanfala faith, wea hem minim for acceptim and stap gud witim pipol bilong difren religion.
Olketa Samting wea Mi Start for No Hapi Long Hem
Bat, samfala samting wea go ahed insaed Catholic Church mi no hapi long hem. Olsem example, bifor man baptaes and kamap wanfala member bilong church, parents and olketa pikinini mas studyim firstaem mining bilong olketa samting hia. Bat, planti nating attendim class for lanem olketa samting hia, and olketa narawan no willing for study. And tu, sapos olketa no acceptim olketa for baptism and kamap member bilong church long wanfala parish olketa go long nara parish for kasem datwan. Long mi diswan hem olsem olketa laek for Catholic long nem nomoa and hem showimaot hypocrite fasin.
Samfala taem mi savve tingting and askem tu olketa nara sista bilong Catholic Church, “Waswe, iumi shud preachim Gospel winim wei for dedicatem iumiseleva for duim olketa narakaen waka?” Olketa ansarem mi olsem: “Iumi preach thru long wei for duim olketa gudfala samting.”
And tu, mi faendem hard for bilivim hao mi mas konfesim olketa sin bilong mi long wanfala priest. Mi ting miseleva shud storyim diswan long God. Mi no savve acceptim tu disfala idea for baeheartim and talem sem prea olowe. Mi faendem hard tu for bilivim pope no savve rong. Gogo, mi disaed for keepim olketa biliv bilong miseleva and go ahed nomoa long waka bilong church.
Barava Laekem Savve Bilong Bible
Mi bin evritaem garem deepfala respect for Bible and laek for savve moa samting abaotem Bible. Long olketa taem wea mi mas mekem wanfala disison or needim saport bilong God, mi readim Bible. Nomata mifala no studyim Bible long convent, mi savve readim Bible. Disfala scripture long Isaiah 43:10-12, wea Jehovah God sei, “Iufala nao olketa witness bilong mi,” barava muvim mi. Bat, mi no savve long full mining bilong datfala toktok.
Taem mi attendim university long Rome long olketa year midol long 1960, mi duim wanfala foa year course abaotem olketa teaching bilong church wea Vatican peim fee for datwan. Bat mifala no iusim Bible. Bihaen mi go bak long Aosta, mi attendim planti meeting wea tok abaotem wei for olketa Christian raonem full world for garem wan mind, and tu olketa semkaen meeting wea olketa difren religion and organization wea no Catholic arrangem. Diswan mekem mi laekem tumas for savve long olketa teaching bilong Bible. Bigfala wei for konfius nao kamap midolwan pipol wea sei olketa teachim Bible!
Lanem Moa Samting Abaotem Bible
Long 1982, wanfala Jehovah’s Witness kam long ples mi waka and trae for startim story witim mi abaotem Bible. Nomata mi busy tumas, mi interest for lane abaotem Bible. So mi sei, “Plis kam lukim mi long skul, and sapos mi garem free taem iumi bae story.”
Nomata datfala woman visitim mi, mi no garem eni “free taem.” Then mami bilong mi kasem sik cancer, so mi mas lusim waka and go helpem hem. Bihaen hem dae long April 1983, mi go bak waka, bat olketa Witness no kam lukim mi. No longtaem bihaen, wanfala nara Witness wea age bilong hem samting olsem 25, visitim mi for story abaotem Bible. Mi bin readim Bible buk bilong Revelation. So mi askem hem, “Hu nao 144,000 wea Bible storyim long Revelation chapter 14?”
Church teachim mi hao evri gud pipol bae go long heven, so mi no minim hao 144,000 hia stap separate from olketa narawan long heven. Mi laek for savve, ‘Hu nao 144,000 hia? Wanem nao olketa bae duim?’ Mi ting raonem olketa kwestin hia long mind bilong mi. Datfala Witness go ahed trae for faendem mi, bat from planti taem mi no savve stap long haos hem no savve kasem mi.
Gogo, datfala Witness givim address bilong mi long Marco, wanfala elder long kongregeson bilong hem. Then, long February 1985, hem faendem mi. Mifala story for shortfala taem nomoa, from mi busy, bat mifala mekem arrangement for story moa narafala taem. Bihaen hem and waef bilong hem, Lina, evritaem visitim mi, and helpem mi for minim Bible. Insaed shortfala taem nomoa, mi luksavve hao olketa Catholic teaching olsem Trinity, soul wea no savve dae, and hellfire no kam from Bible.
Kaban Witim Olketa Witness
Taem mi go long wanfala meeting bilong Olketa Jehovah’s Witness long Kingdom Hall, mi lukim hao hem barava difren from Catholic Church. No wanfala choir nomoa sing bat evriwan nao sing. Then olketa tek part long meeting. Mi lukim tu hao evriwan insaed organization olketa “brata” and “sista.” Evriwan barava kea for each other. Olketa samting hia barava muvim mi.
Taem mi attendim olketa meeting mi werem kaen kaleko bilong mifala. Samfala showimaot olketa hapi for lukim wanfala sista bilong Catholic Church long Kingdom Hall. Mi hapi and satisfae from mi kasem love from wanfala big famili. And tu, taem mi study, mi start for lukim hao planti principle wea mi followim hem no kam from Word bilong God. Olsem example, Bible nating sei for olketa servant bilong God werem spesol kaleko. For garem olketa bigman long church wea werem spesol kaleko and hae position hem difren from wanem Bible teachim abaotem olketa hambol elder wea leadim kongregeson.
Mi feel olsem mi standap long sand wea mi bae sink insaed, and mi no standap long strong graon. Mi hard for acceptim hao samting wea mi bilivim for 24 year hem no stret. Bat, hem barava klia long mi hao niu samting mi lanem hem truth from Bible. Mi fraet for tingim hao taem mi 44 year, mi mas startim bak moa laef bilong mi. Bat from mi lukim finis really samting wea Bible teachim mi kanduit denyim datwan.
Wanfala Important Disison
Mi savve hao sapos mi lusim convent mi bae no garem eni material samting or selen. Nomata olsem, mi rememberim toktok bilong David abaotem olketa wea raeteous, hao hem nating lukim olketa ‘no garem eni samting or pikinini bilong olketa ask for bred.’ (Psalm 37:25) Mi savve mi bae lusim lelebet wei for sef long physical wei, bat mi trustim God and garem disfala tingting, ‘No eni samting for mi fraet long hem.’
Famili bilong mi ting mi krangge nao. Mi wari abaotem datwan, bat mi tingim toktok bilong Jesus: ‘Olketa wea lovem tumas dadi or mami winim mi olketa no fit for disaepol bilong mi.’ (Matthew 10:37) Wei wea olketa Witness showimaot olketa kea encouragem and strongim mi. Taem mi wakabaot long street and werem kaleko bilong sista bilong Catholic Church, olketa Witness evritaem mas kam hello long mi. Diswan mekem mi feel moa klos long olketa brata and mi feel olsem mi member bilong datfala spiritual famili.
Gogo, mi go lukim Mother Superior and explainim why mi disaed for leavim convent. Nomata mi laek showim hem from Bible why mi disaed olsem, hem no laek lisin, and sei: “Sapos mi laek minim eni samting insaed Bible, mi savve lukim wanfala savve man bilong Bible!”
Catholic Church seke tumas for herem mi bae lusim convent. Olketa accusim mi for sei mi krangge and garem nogud fasin. Bat, pipol wea savve long mi, no bilivim diswan. Pipol wea mi waka witim garem olketa difren tingting. Samfala ting wanem mi duim showimaot fasin for no fraet. Olketa narawan wari abaotem mi from olketa tingse samting mi duim hem no stret. Samfala feel sorre for mi.
Long July 4, 1985, mi lusim Catholic Church. From olketa Witness savve hao pipol spoelem samfala wea tekem stand olsem, olketa haedem mi for wanfala month. Olketa tekem mi go long olketa meeting and then lusim mi bak long ples wea mi stap. Mi no go aot long pablik go kasem taem wea hem luk olsem pipol no kros tumas nao. Then, long August 1, 1985, mi start for share long ministry witim Olketa Jehovah’s Witness.
Taem mi attendim Distrik Convention bilong Olketa Jehovah’s Witness long August, olketa nius pipol faendaot hao mi lusim church and raetem story abaotem datwan. Taem mi baptaes long December 14, 1985, lokol television station and niuspepa tingim diswan olsem samting for barava sapraes long hem so olketa pablisim moa datfala story abaotem mi, mekem evriwan mas savve long wanem mi duim.
Mi no garem eni material samting taem mi lusim convent. Mi no garem waka, haos or pension. So for wanfala year, mi waka for lukaftarem wanfala woman wea paralyze. Long July 1986, mi kamap wanfala pioneer, wea hem nao Olketa Jehovah’s Witness kolem olketa full-taem minister. Mi go stap long ples wea wanfala niu kongregeson just start nomoa. Mi iusim savve wea mi kasem taem mi skul for duim olketa private leson for teachim languis and olketa nara samting. Diswan givim mi wanfala schedule wea isi for change.
Serve Long Difren Kantri
From mi lanem Bible truth, mi laek for sharem witim planti moa pipol. Mi savve long French languis, so mi ting for serve long samfala kantri bilong Africa wea iusim datfala languis. Bat long 1992, olketa registerim Olketa Jehovah’s Witness saed long law long Albania. Long end bilong datfala year, wanfala smol grup bilong olketa pioneer from Italy kasem assignment for go long there. Insaed grup hia nao Mario and Cristina Fazio wanfala hasband and waef from kongregeson bilong mi. Tufala invaetem mi for visitim olketa and ting raonem wei for serve long Albania. So bihaen mi ting raonem gud long careful wei and prea, taem mi 52 year, mi lusim ples bilong mi and go long wanfala ples wea barava difren.
Datwan hem long March 1993. Taem mi arrive mi luksavve hao nomata mi no farawe from kantri bilong mi, mi long wanfala kantri wea garem barava difren kastom. Pipol wakabaot for kasem ples olketa laek go long hem, and iusim Albania languis, wanfala languis wea mi no minim. Disfala kantri go ahed for mekem barava bigfala change for go from wanfala politik system go long nara politik system. Nomata olsem, pipol thirsty for Bible truth, and lovem tumas wei for read and study. Olketa Bible student muv ahed kwiktaem long spiritual wei, and diswan mekem mi barava hapi, and helpem mi for getius long datfala niu ples.
Taem mi arrive long Tiranë, wea hem nao kapitol taon, long 1993, Albania garem nomoa wanfala kongregeson and samting olsem 100 Witness wea stap long olketa difren ples bilong datfala kantri. Long datfala month, long first spesol assembly day long Tiranë, 585 nao attend and 42 baptaes. Nomata mi no minim eniting, hem barava muvim mi for herem olketa Witness sing and lukim olketa lisin gud. Long April mifala celebratem Memorial long dae bilong Jesus Christ, and 1,318 nao attend! Start from datfala taem Christian waka go ahed for grow long Albania.
From verandah long mek-foa story haos wea mi stap, mi savve luk go aot and ting olsem, ‘Long wanem taem nao mifala savve kasem evri pipol hia?’ Jehovah God nao lukaftarem datwan. Distaem Tiranë garem 23 kongregeson bilong Olketa Jehovah’s Witness. Long full kantri, hem garem 68 kongregeson and 22 grup, witim 2,846 Witness. Bigfala wei for grow olsem hem happen insaed tu-thri year nomoa! And long 2002 Memorial, 12,795 nao attend!
Insaed tenfala year mi stap long Albania, mi hapi tumas for helpem 40 pipol baptaes. Samfala serve olsem pioneer and olketa narawan duim samfala difren kaen full-taem service. Insaed olketa year hia, sixfala grup bilong olketa pioneer long Italy kasem assignment for help witim waka long Albania. Each grup olketa lanem Albania languis for thrifala month, and mi kasem invitation for teachim last fofala class.
Taem olketa fren bilong mi savve mi disaed for lusim church, olketa barava sapraes and garem kros feeling abaotem datwan. Bat, bihaen planti year, olketa katdaon lelebet, from olketa lukim hao mi no wari and mi garem peace. Mi hapi from famili, and aunty bilong mi wea 93 year and wea wanfala sista bilong Catholic Church, saportim mi.
Start kam from taem mi savve long Jehovah, hem lukaftarem mi long planti difren kaen samting wea mi feisim! Hem showim mi wei for go long organization bilong hem. Taem mi ting go bak, mi rememberim hao mi laekem tumas for helpem poor pipol, olketa wea no garem planti samting, and wea garem need, and hao mi barava want for servem God evribit. Dastawe mi thankiu long Jehovah, from hem mek sure mi satisfaem spiritual wei for thirsty.
[Piksa long page 17]
Wanfala famili long Albania wea mi studyim Bible witim olketa. Elevenfala nao baptaes
[Piksa long page 17]
Distaem, planti woman wea mi studyim Bible witim olketa long Albania insaed full-taem ministry