Hapi and Hard Samting wea Olketa Young Wan Feisim
MAN savve really enjoyim taem wea hem young. Tru nao, staka young wan enjoyim datfala taem. And staka wea big finis garem hapi feeling taem olketa ting bak long taem wea olketa teenage.
Nomata olsem, iumi need for luksavve hao iumi stap long ‘olketa last day wea hard for iumi deal witim.’ (2 Timothy 3:1) Diswan addim go hevi long olketa young wan. Disfala hevi hem difren from wanem olketa young wan bifor feisim. Maet diswan nao reason why Sabrina Solin Weill, executive editor bilong wanfala magasin for olketa teenager, hem sei, taem man young hem olsem hem wakabaot followim wanfala rope wea stap hae antap bat hem no garem eniting for protectim hem sapos hem foldaon. Tru nao, taem wea man young, laef savve fulap witim eni kaen samting olsem wei for no feel free, wari, and konfius. Weill hem sei: “Olketa teenager no pikinini and olketa no big man tu, so olketa mas deal witim olketa nogud saed wea kamap from wei wea olketa pikinini and olketa kakamap big man.”
Sapos iu wanfala young wan, hao nao iu savve deal witim hard samting wea iu feisim? Sapos iu wanfala mami or dadi wea garem teenager, wanem nao bae helpem iu for ting go bak long datfala taem mekem iu minim olketa samting wea son or dota bilong iu feisim distaem? Mifala invaetem iufala olketa young wan and iufala wea big finis for ting raonem laef wea young wan feisim. Diswan savve helpem olketa young wan for deal witim and winim olketa hard samting wea savve kamap.